Pơkâ kơphô̆ Buôn Ma Thuột troh hơnăm 2050 cho dâng 37.738 ha, tung mê ai tâi tâng tơnêi tơníu troăng prôk ki xiâm dêi 5 to bêng: Buôn Ma Thuột, Tân An, Tân Lập, Thành Nhất, Ea Kao ƀă cheăm Hòa Phú. Pơkâ pêi cho mơjiâng Buôn Ma Thuột chiâng tíu xiâm tơkŭm, kơvâ cheăng râ kơpong ƀă râ kong pơlê; tíu xiâm tơrŭm pơla Tây Nguyên ƀă kĭng têa kơxĭ Peă hdroh Tơnêi têa. Kơphô̆ mơnhông tiô troăng tơniăn lĕm, kong kế, rơkê, tiô chal nếo, ai hên túa lĕm tro, hmâ ƀă kong prâi pro pơhlêh.

Môi tung mâu tơdroăng ki kal vâ ‘nâi dêi túa pơkâ kố cho tơkŭm tơnêi tơníu kơphô̆ chiâng 6 kơpong, 9 tíu xiâm, 2 to triăng ki xiâm ƀă 2 cheăng mơnhông. Tung mê, bêng Buôn Ma Thuột cho tíu kơphô̆ long têa Ea Tam. Mâu kơpong ki u ối châ pơkâ ƀă mâu ivá cheăng tơdjâk krê. Bêng Tân Lập cho kơphô̆ ki xiâm peăng mâ hâi Lo. Bêng Ea Kao xo long têa Ea Kao pro tơdroăng ki vâ mơnhông ôm hyô kong kế nhâ loăng, tê mơdró, kong ngê̆ ƀă hnê hriâm. Bêng Thành Nhất cho ngế ki tŏng gum kuăn pơlê ăm kơpong tíu xiâm dế ai nôkố. Cheăm Hòa Phú châ pơkâ mơjiâng pro tíu cheăng ƀă kơmăi kơmok krúa, logistics tơmeăm pêi lo ing chiâk deăng.

Tơdroăng ki tơbleăng Pơkâ tơdjuôm kơphô̆ Buôn Ma Thuột troh hơnăm 2050 cho tơdroăng ki kal vâ Dak Lak ƀă mâu cheăm bêng pơhlêh troăng mơnhông, tơkŭm tơnêi tơníu kơphô̆ ƀă mơhnhôk veăng tơlo liăn ngân pêi cheăng. Pôa Đỗ Hữu Huy, Kăn hnê ngăn Vi ƀan kong pơlê Dak Lak tối nhên, túa pơkâ tơdjuôm kơphô̆ Buôn Ma Thuột troh hơnăm 2050 ôh tá xê to mơjiâng pro troăng ngăn mơnhông nếo ăm kơphô̆ tíu xiâm Tây Nguyên mê ối po rơdâ tơnêi tơníu tơrŭm pơla kong ngo ƀă têa kơxĭ Peă Hdroh Tơnêi têa.

“Kong pơlê mơnhên tơbleăng túa pơkâ athế tro ƀă tơkŭm pêi pro tơƀrê, mơhnhôk veăng tơlo liăn ngân, tơbleăng pro mâu tơdroăng tơkêa bro ki kal ƀă rak tơniăn mơnhông tơdroăng tơdâng tơ’mô, krá ton. Ƀlêi chiâng dêi túa pơkâ ôh tá xê tơkôm tung troăng ngăn mơnhông mê ối tơkôm tung ivá pơkuâ. Rêm troăng hơlâ pơkâ pêi athế châ pơhlêh ƀă pêi pro, rêm tơdroăng tơhrâ athế châ pơhlêh ƀă pêi tơƀrê, rêm rôh tơ’lêi hlâu mơnhông athế châ pơhlêh chiâng ivá pêi cheăng thăm mơnhông nếo”.

Túa pơkâ tơdjuôm kơphô̆ Buôn Ma Thuột troh hơnăm 2050 po troăng ngăn ƀă tơdroăng mơnhông mơdêk nếo ăm kơphô̆ tíu xiâm Tây Nguyên. Vâ pêi pro châ troăng ngăn kố, tơdroăng ki kal cho ivá khŏm mơ-eăm tung pơkuâ pêi pro, mơhnhôk veăng tơlo liăn ƀă tơbleăng tơdâng tơ’mô mâu tơdroăng tơkêa bro, rế hía rế mơjiâng Buôn Ma Thuột chiâng kơphô̆ ngiât, rơkê, ai hên túa lĕm tro, tơxâng ƀă tơrŭm kơpong.