Cheăm Ea M'Droh châ mơjiâng ing tơdroăng tơ'mot pái to cheăm Ea M'Droh, Ea Mnang ƀă Quảng Hiệp, ối tung tơring Cư̆ Mgar hdrối nah. Mơ'nui hơnăm 2025, cheăm ối 202 rơpŏng kơtiê, châ 2,67% kơxô̆ rơpŏng kuăn pơlê; tơdrêng amê, cheăm ối vâ chê 600 rơpŏng vâ chê kơtiê kal pơtối châ tŏng kum tơniăn tơdroăng rêh ối.

A rôh tơpui tơno, hên rơpŏng kuăn pơlê tối tơdrêng mâu tơdroăng pá puât, pâ thế troăng hơlâ tŏng kum cheăng kâ, cheăng pêi ƀă hngêi ối. Pôa Lê Tiến Dũng, ối a thôn Bình Hòa ăm 'nâi, klêi kơ'nâi môi hơnăm châ tŏng kum ro ai kuăn la tá hâi châ tơ-ƀrê, pôa pâ thế 'mâi rơnêu troăng hơlâ tŏng kum ăm tơtro tâ ƀă tơdroăng rơpŏng hngêi.

“Hơnăm nah á châ tŏng gum ăm péa to ro la hiăng châ môi hơnăm ro xuân tá hâi ai kuăn mê hâi kố á ai rơkong tơpui ăm cheăm pâ pơhlêh păn ro xo têa tôu. Cheăm hiăng tơbleăng tơdrêng ăm á, kô pơhlêh ăm 4 to ro mê cho 2 to ro kăn ƀă 2 to ro kuăn. Kăn pơkuâ xuân tơmâng ngăn troh kuăn pơlê hlo tiah mê ngin mơnê khât”.

Rơtế ƀă rơkong pâ thế ‘na túa rêh kâ ối, hên rơpŏng kơtiê tối rơhêng vâ châ tŏng gum tăng cheăng pêi, ai hngêi ối krá kâk. Kăn pơkuâ cheăm Ea M’Droh tơdah xo, tơpui tơno tơdrêng ‘na mâu tơdroăng púi rơhêng vâ dêi rơpŏng, vâ pro tíu mơnhên tơdroăng rơhêng vâ tŏng gum dêi mâu rơpŏng.

Sap ing hơnăm 2025 troh nôkố, pêi pro mâu tơdroăng pơkâ, tơdroăng tơkêa bro tŏng gum túa rêh kâ ối, tơdroăng rêh ối, cheăm Ea M’Droh hiăng ai mâu tơdroăng teăm tŏng gum tơdrêng troh mâu rơpŏng kơtiê. Tung mê, cheăm hiăng gum 76 to ro kăn vâ 38 rơpŏng kơtiê păn ăm ai kuăn. Laga, ki khât gá tơbleăng ăm hlo kal pêi pro tiô rêm rơpŏng vâ ‘mâi hơ’lêh túa tŏng gum rêh kâ ối tiô tơdroăng kơtiê ƀă ivá mơ-eăm dêi rêm rơpŏng.

Pôa Trần Doãn Tới, Kăn pơkuâ hnê ngăn Đảng ủi cheăm Ea M'Droh tối ăm 'nâi, cheăm kô tơbleăng mâu troăng hơlâ ki phá tơ-ê dêi pó, ing tŏng kum pêi cheăng kâ troh tăng cheăng pêi ƀă rak tơniăn tơdroăng rêh ối pơlê pơla:

“Hơ'lêh khôi túa tơlá ki ôh tá tro, tŏng kum hnê 'na khoa hok kih thuât hdrê pêt, mơnăn păn ƀă rơpŏng hngêi ki ối ai tơmeăm khoăng vâ pêi cheăng kâ. Ƀă mâu rơpŏng ki ối ai ivá pêi cheăng tung rơpŏng hngêi mê kô tăng cheăng pêi, tŏng kum lăm pêi cheăng a kong têa ê ƀă tơdroăng cheăng pêi tung tơnêi têa. Ƀă mâu rơpŏng ki ôh tá ai ivá pêi cheăng, ôh tá ai ivá pêi cheăng mê khu kăn pơkuâ kô pro tơ'lêi hlâu 'na tơdroăng rêh ối pơlê pơla ƀă tŏng kum 'na hngêi ối, tơmeăm xúa rêm hâi".