Mâu idrâp chêng koăng chuât pu hung pu hung tung dế kong kế, ngo ngối, mâu vâi krâ nhŏng o kơhnhon xuăng tâ tá on koh kân lĕm bâ a ngiâ plông kuât, mơngiơk reăng mâ hâi kong tơpo lâp ngo rơtế ƀă mơngiơk mâu ếo pơtâk eăng bâ…Tâi tâng dế tơkŭm dêi pó, chiâng um méa khôi túa lĕm tro ki krip tơdrŏm.

Festival Chêng koăng – Măng tĭng leh Reăng Mâ hâi kong – Ngo on Chư Đang Ya hơnăm 2026 a Gia Lai tơkŭm po sap hâi lơ 30/10 troh lơ 8/11, ƀă hên tơdroăng mơhno khôi túa lĕm tro, ngê̆ thuât ki krip ro má môi a bêng Pleiku, cheăm Biển Hồ ƀă mâu cheăm pơlê ki ê dêi kong pơlê Gia Lai.   

Mơhnhôk pêi pro, rak vế tơdroăng mơhno khôi túa lĕm tro ki krip tơdrŏm má môi kố, Vi ƀan cheăm Chư A Thai, kong pơlê Gia Lai tơkŭm po pơtối 3 măng tôu chêng koăng, mơdrâu on koh kân ƀlô blông eăng bâ ƀă pế pơchên hên khu kơchâi kâ ing mâu thôn Plei Pông, Plei Hek, Glung Mơlan ƀă Plei Ơi. A plông kuât thôn Plei Pông a kĭng on khâng bâ lĕm, kơdrâm kuăn pơlê ƀă mâu vâi krâ, ngê̆ nhân hiăng tôu chêng, kơ’ngrâu xuăng kheăn kơdeăn tơdroăng tơrŭm môi tuăn, tơdroăng pêi cheăng, pâ pơlê xiâm tơnêi têa. Nâ Đinh Đjơn ối a Plei Pông, cheăm Chư A Thai tối:

“Ôh tá xê to á mê tâi tâng kuăn pơlê tung thôn pơrá sôk suâ, phiu ro xua châ trâm mâ, mơđah tơbleăng ki lĕm tro dêi chêng koăng dêi mơngế Bơhnéa ngin’’.

Veăng kơ’ngrâu xuăng tiô chêng, tơdrá kơhnhon rơmuô̆n, kuăn pơlê ƀă tơmối ối châ ôu drôu xiâm ƀă mâu kơchâi kâ tiô khôi vâi krâ nah dêi mơngế Bơhnéa môi tiah: kơchâi hlá pôm loăng, hơ’nêh mâm chu pôh, hmê phái chiâk. Pôa Đinh Byo – Krâ pơlê thôn Plei Pông tâ sôk ro xua rơxông ối nếo pơtối rak vế khôi túa lĕm tro dêi hdrông kuăn ngo tơná.

“Á nôkố hiăng krâ laga xuân veăng tôu chêng koăng ƀă  mâu khu pú tôu chêng dêi pơlê. Tung la ngiâ ah, á kô pơtối hnê ăm kuăn cháu tôu chêng vâ rak vế khôi túa lĕm tro dêi hdrông mơngế Bơhnéa tung cheăm Chư A Thai’’.

A pơlê Ia Gri, cheăm Biển Hồ, tơdroăng po leh tơbleăng phiu ro kố thăm rế pêng păm tơdroăng sôk ro drêng pơlê pơla mơngế Jarai tơkŭm po leh hơniâp ro, phiu niu, sôk suâ mơdâng kuât nếo. A tíu krip krih, toăng  kâng châ mơdâng, tơmeăm pleăng hiăng châ hbrâ, idrâp chêng koăng môi tiah rơkong koh tơdah, rơkong pói châ tơniăn, pêi lo châ hên tơmeăm ƀă tơdroăng rêh ối phâi hơtô. Pôa Pyui – Kăn pơkuâ Chi ƀô̆ pơlê Ia Gri mơnhên, kuât nếo ôh tá xê to tơmeăm kơnía tiô khôi vâi krâ nah mê ối mơhno um méa dêi hiâm mơno tơrŭm môi tuăn, rơtế dêi pó mơjiâng pơlê pơla, cheăm bêng.

“Ki kơnâ dêi tơdroăng xối pleăng kuât kố cho vâ kuăn pơlê rak vế tơmeăm kơnía dêi hdrông kuăn ngo tơná, má péa cho mơđah tơbleăng ôm hyô pơlê pơla troh tơmối tung tơnêi têa ƀă kong têa ê. To lâi khế kuăn pơlê tơbrê tơbrêh, tơdjuôm ivá môi hiâm mơno châ mơdâng mơjiâng kuât kố. Kuăn pơlê phiu ro ‘nâng xua kơnôm châ Đảng ƀă Tơnêi têa tŏng gum ăm pơlê, pói vâ kô mơnhông mơdêk tâ mê nếo’’.

Festival Chêng koăng – Măng tĭng leh Reăng mâ hâi kong – Ngo on Chư Đang Ya hơnăm 2026 a Gia Lai ai tơdroăng ki veăng dêi vâ chê 1.500 ngê̆ nhân, vâi krâ-nhŏng o djâ troh tíu trâm mâ mơhno khôi túa lĕm tro hên hĭn. Idrâp chêng koăng, hơkâ, kơhnhon xuăng rơtế chuât dêi koăng t’rưng, klŏng put, chiâng tâng ro tơniâ ki phá tơ-ê. Rơtế amê cho tơdroăng ki tơkŭm dêi ếo pơtâk tiô khôi vâi krâ nah, ngê̆ thuât pong rơgi loăng ƀă teăn pong chêa ing ton nah. Mơhnhôk tơdroăng kố, pôa Ngô Đức Mạo – Kăn pơkuâ Tíu xiâm Khôi túa lĕm tro – Tơdroăng nếo ai ƀă Tơ’noăng Ivá cheăm Phú Túc, kong pơlê Gia Lai tối ăm ‘nâi:

“Ngin rah xo mâu ngê̆ nhân chiâng pêi rơkê a mâu kơvâ ƀă xing xoăng a rêm cheăm ai ki phá krê. Pơtih teăn ếo pơtâk ƀă xah tôu koăng tơ’rưng, klŏng put, têng nêng hdrông kuăn ngo mê a cheăm Ia Dreh, vâi krâ pong rơgi loăng ƀă teăn pong chêa ƀă rơnâu pât chêng mê a mâu cheăm Ia Rsai, Phú Túc ƀă Uar. Ngin djâ troh hâi xah hêi ro môi tơdroăng tŭm têk, vâ mơđah tơbleăng um ƀă khôi túa lĕm tro dêi mơngế Jarai’’.

Ing idrâp chêng koăng pu hung pu hung chuât troh hơngế, mâu ếo pơtâk mơngiơk tơ-eăng lĕm, mâu um loăng ki pro hên ki lĕm tơ-ê,…rêm um pơrá veăng hơ’muăn môi tơdroăng ‘na tơdroăng rêh ối tiô khôi túa lĕm tro dêi mâu hdrông kuăn ngo Gia Lai. Mâu ki kơnía khôi túa lĕm tro dêi mâu hdrông kuăn ngo pơtối châ rak, gum pro chiâng mơngiơk krê dêi tơdroăng rêh ối kơpong kân rơdâ hâi kố.