Ƀă o Nông Trà Vy, hok tro lâm 6A2 Hngêi trung ai tíu kâ koi ối pơtê péa râ Râ má môi ƀă râ má péa Ea Rốk, châ ối a hngêi trung hriâm tâp, mê cho tơdroăng ki ro kân khât.

“Á hlo hngêi trung ai tíu kâ koi ối pơtê kố ro khât, hngêi trung kân phuâng rơngiâp lĕm, thái cô rak ngăn hok tro, hơ-ui khât kơ ngin o”.

Hngêi trung nếo châ mĕn mơjiâng kân lĕm, krá kâk, kơpong ối pơtê krúa lĕm, ai tŭm mâu tơdroăng gum mâu vâi o hmiân tuăn kâ ối, ai tơ’nôm chôu hriâm tâp ƀă xah ro rơtế ƀă mâu vâi pú. O Trần Hà Thiên, hok tro lâm 7A2, ăm ‘nâi:

“Á mơnê xua tâ ro hâk vâ drêng châ mot hriâm a hngêi trung ai tíu kâ koi ối pơtê lĕm krip kố, mâu vâi pú kơdrâm, ro rih, thái cô rak ngăn tơrêm rôh kâ hmê ƀă tơmâng ngăn troh hok tro ngin o”.

Tơdroăng phiu ro mê rế ai pơxúa drêng hngêi trung kố cho hngêi trung ki kal kân xua Khu xiâm pơkuâ ngăn lêng mơjiâng pro diâp ăm kuăn pơlê cheăm Ea Rốk, cheăm kơpong 3 ối trâm hên xơpá. Hngêi trung mơhno tơdroăng ki tơmâng ngăn, rơtế prôk dêi Khu xiâm pơkuâ ngăn lêng ƀă kăn pơkuâ cheăm tung tơdroăng cheăng hnê hriâm, pro tơ’lêi hlâu tung hriâm tâp, rêh kâ ối tơniăn tro tâ ăm kuăn muăn a pơlê cheăm.

Pơxiâm pro a khế 3/2026, bu kơ’nâi mê 6 khế pro, hngêi trung hiăng pro klêi ƀă hiăng châ mot hriâm klăng a hâi mot hriâm hơnăm nếo khế 6/2026, rĕng tâ môi hơnăm hriâm tâng vâ pơchông ƀă túa pơkâ apoăng.

Cô Lương Thị Hoa, cô hnê a hngêi trung kố ăm ‘nâi,  hngêi trung ai tíu kâ koi ối pơtê pơkâ mơ’no tơdroăng nếo ƀă mâu thái cô, ôh tá xê to tung hnê hriâm mê tá tơdroăng ki pơkuâ ngăn, rak ngăn hok tro, malối cho mâu vâi o rôh apoăng hngế dêi rơpŏng.

“Pơkuâ ƀă rak ngăn mâu vâi o hok tro a hên hơnăm phá dêi rơpó, malối cho mâu vâi o hriâm râ má môi, drêng nếo hngế dêi ing rơpŏng hngêi troh hngêi trung hriâm, hên ngế o tá hâi hlê plĕng klâi, ối khéa pâ dêi nôu pâ, hngêi trăng. Xua mê, pơkuâ ngăn hok tro ôh tá xê pêi pro hnoăng cheăng pơkuâ ngăn túa rêh kâ ối, mê ối athế tơmâng ngăn, rak ngăn ƀă mơhnhôk vâi, đi đo ối achê ƀă vâi, rak ngăn ivá, hiâm mơno vâi muăn”.

Tơdroăng ki rak ngăn mê ối mơhno tung rêm rôh kâ hmê rêm hâi dêi mâu vâi o hok tro. Nâ Đinh Thị Thỏa, ngế cheăng ngăn ‘na mâu kế kâ dêi hngêi trung, ăm ‘nâi, pơxiâm pêi cheăng sap ing 4 chôu 30 phut kơxo má ƀă mơgêi a 7 chôu măng. Tơdroăng ki hbrâ rơnáu mâu kế kâ, pế pơchên, xoăng hmê kâ, mơgrúa lĕm hngêi pế pơchên hmê kơchâi, hmếo pơ pêi plâ hâi tiah mê.

“Ngin pơxiâm pêi cheăng sap ing hâi lơ 13/10. Khu pêi cheăng nôkố xuân trâm hên tơdroăng ki tơbrê tơbrêh, xuân athế kơnôm ing tŏng gum dêi mâu thái cô há. Ngin kô mơ-eăm tâi ivá, vâ pêi klêi hnoăng cheăng dêi tơná”.

Vâ tơkŭm po ăm ối pơtê, kâ koi tung hngêi trung kố ối djâ ăm xúa rĕng tâ hâi khế pơcháu, hngêi trung hiăng hbrâ rơnáu tŭm mâu túa pơkâ, tơrŭm ƀă kăn pơkuâ cheăm ƀă mâu khu ki veăng tŏng gum a cheăm kố.

Pôa Võ Viết Khoa, Ngế pơkuâ hngêi trung ai tíu kâ koi ối pơtê péa râ Râ má môi ƀă Râ má péa Ea Rốk, tối ăm ngin ‘nâi, drêng hngêi trung châ tíu mơjiâng pro, pơcháu, hngêi trung rĕng xing xoăng mâu tơdroăng ki kal vâ tơkŭm mâu tơdroăng cheăng. Hâi lơ 13/10, hngêi trung tơkŭm po ăm kâ koi ối pơtê ăm tâi tâng 515 ngế hok tro, teăm tŏng gum nôu pâ tung tơdroăng ki tá hâi châ tơkŭm ăm kâ koi ối pơtê. Troh hâi lơ 30/10, hngêi trung păng ‘nâng tơkŭm ăm 337 ngế hok tro châ kâ koi ối pơtê.

“Hngêi trung tí tăng ‘nâi plĕng ăm Đảng ủi, kăn pơkuâ cheăm bêng ai troăng hơlâ tŏng gum mâu vâi o ối tung kuăn pơlê hdrông kuăn ngo xuân môi tiah mâu vâi o ki ai tơdroăng rêh ối xơpá ‘na hriâm tâp. Ngin tơrŭm krá tơniăn ƀă nôu pâ mâu vâi o hok tro, khu ki teăng mâ nôu pâ hok tro vâ pro cheăng tơrŭm cheăng drêng mâu vâi o troh akố hriâm tâp, pro tiah lâi vâ pro tơ’lêi hlâu má môi vâ kuăn ‘nĕng rơkê tung tơdroăng rak ngăn dêi tơná”.

Rơtế ƀă ivá mơ-eăm dêi hngêi trung, kăn pơkuâ cheăm ối đi đo lăm ngăn, tơrŭm lêi tah xơpá tung pơla tơkŭm ăm kâ koi ối pơtê a hngêi trung. Pôa Trịnh Văn Cường, Phŏ kăn hnê ngăn Vi ƀan cheăm Ea Rốk, ăm ‘nâi, hngêi trung ai tíu kâ koi ối pơtê Ea Rốk châ mơjiâng pro rĕng klêi. Khu ki xo pro hiăng tơkâ luâ kong tô, kong mê vâ pro klêi bu klêi kơ’nâi dâng 6 khế, teăm ăm mot hriâm tung hơnăm hriâm 2026 – 2027. Troh nôkố, tâi tâng mâu kế tơmeăm pơrá hiăng pro klêi ƀă hiăng châ xúa.

Pôa Trịnh Văn Cường tối nhên, kố cho tơmeăm pro ki tơviah ai pơxúa khât xua Khu xiâm pơkuâ ngăn lêng mơjiâng pro diâp ăm kuăn pơlê cheăm Ea Rốk. Hngêi trung ôh tá xê ‘mot tơ’nôm hngêi trung hriâm mê ối pro tơ’lêi hlâu vâ cheăm rak ngăn tro tâ mâu vâi o, malối cho hok tro ối tung rơpŏng kơtiê, rơpŏng châ tơnêi têa gum ƀă mâu vâi o ki ai tơdroăng rêh ối xơpá.

“Cheăm hnê mơhno tơdrêng cho Ƀơrô cheăng Mơhno túa lem tro Pơlê pơla ƀă Khu pơkuâ ngăn Hngêi trung, đi đo lăm ngăn cheăng kâ koi ối pơtê, malối cho cheăng rak vế tơniăn krúa lĕm kế kâ, pơkâ tơbleăng tơdrăng mâu trếo kơhiâm tung rôh kâ hmê ăm mâu vâi muăn. Rak tơniăn pro tiah lâi rôh kâ hmê ai tŭm trếo kơhiâm ƀă xua mâu vâi muăn tối tung rôh kâ hmê gá kơhiâm, ai tŭm trếo kơhiâm vâ hmiân tuăn hriâm tâp”.

Sap ing tơdroăng ki ro dêi hok tro troh tơdroăng kơhnâ krâu dêi thái cô, mâu ngế cheăng ki gum ăm mâu trếo kơhiâm ƀă hnoăng cheăng pôu râng dêi kăn pơkuâ cheăm, hngêi trung ai tíu kâ koi, ối pơtê xua Khu xiâm pơkuâ ngăn lêng mơjiâng pro diâp ăm cheăm kơpong 3 Ea Rốk dế chiâng tíu tŏng gum ăm vâi hdrêng kơpong xơpá. Ki kơnía dêi hngêi trung kố ôh tá xê to hngêi trung hriâm krá kâk mê ối cho rôh hriâm tâp, ối pơtê ƀă mơnhông tro tâ, malối cho ƀă mâu hok tro ki ai tơdroăng rêh ối xơpá.