To lâi hơnăm hdrối nah, pôa Briu Chéo, hdrông kuăn ngo Cơ Tu, a cheăm kong ngo Bến Giằng, pơlê kong kân Đà Nẵng (tơring Nam Giang, kong pơlê Quảng Nam ton) hmâ pêi to chiâk deăng, pêi ăm vâi pêi tŭm tơdroăng cheăng la tơdroăng rêh ối xuân hmôu pơ ối kơtiê. Pôa Briu Chéo hiăng mung liăn dêi hngêi rak liăn lối 200 rơtuh, châ kăn pơkuâ cheăm gum ăm hdrê pêt, mơnăn păn, pôa Briu Chéo pro kơdroăng vâ păn ro, chu, pêt loăng plâi kâ. Nôkố kơdroăng dêi pôa Briu Chéo châ hên ngế troh ngăn hriâm ƀối. Rơpŏng ki lâi tung thôn, pơlê xơpá, pôa Briu Chéo xuân tŏng gum kơ vâi.

“Rơpŏng á pơtối châ mung liăn ƀă liăn liah rơpâ mê pêi cheăng kâ gum rơpŏng hngêi tơniăn ƀă mơnhông tâ, tơdroăng rêh ối rơpŏng hngêi hiăng chía tơniăn tâ hdrối. La ngiâ ah rơhêng vâ kăn pơkuâ cheăm pro tơ’lêi hlâu tŏng gum kơxô̆ liăn mung, rak ngăn mâu hdrê loăng pêt hnê ăm kih thuât păn mơnăn mơnoâ tơdroăng mơnhông cheăng kâ. Kuăn pơlê a cheăm, rơpŏng ki lâi kal pin tối ăm túa pêi cheăng kâ ăm vâi ai rôh vâ mơnhông cheăng kâ ƀă pro tơ’lêi hlâu gum vâi krâ nhŏng o ai tơ’nôm cheăng pêi”.

Nâ Bhnướch Thị Blắc, kuăn ngo Cơ Tu a cheăm A Vương, pơlê kong kân Đà Nẵng (tơring Tây Giang, kong pơlê Quảng Nam ton) kot mâ tung môi rơpŏng ki xơpá. Hâi ki xo on veăng, nâ tơpui dêi ƀă mâi, tơno tơdroăng po hngêi mơdró tê tơmeăm ăm vâi krâ kuăn pơlê tung thôn. Kơnôm ing kơdĭng liăn, nâ mung tơ’nôm hngêi rak liăn, păn mơnăn mơnoâ ƀă pêt hdrê loăng plâi kâ. Troh nôkố, nâ Blắc pêt lối 2 ha loăng plâi krui Vinh, 800 xiâm loăng plâi krui ƀŏng kơtôu ngiât pêi châ liăn lối chât rơtuh tung môi rơnó. Xúa tơnêi ngo ƀă kế kâ akố, nâ Blắc pro kơdroăng păn chu, í ƀă pêt tơ’nôm mâu hdrê loăng ki kân.

Rơpŏng nâ Blắc hiăng hluăn ing rơpŏng kơtiê ƀă ai kế kâ, kế 'măn, mơjiâng pro hngêi lĕm, roê rơxế ô tô lăm pêi cheăng kâ. Nâ Bhnướch Thị Blắc ối tăng cheăng pêi ăm hên ngế pêi cheăng kơtiê a pơlê, pêi lo liăn tơniăn. Klêi kơ'nâi riân kơxô̆ liăn 'no hrê, rêm hơnăm rơpŏng nâ Bhnướch Thị Blắc châ xo dêi liăn laih ing tơdroăng cheăng kâ vâ chê 200 rơtuh liăn.

“Hdrối nah, rơpŏng á xơpá khât, sap ing châ Hngêi rak liăn tŏng gum ăm mung liăn mê rơpŏng á hiăng po rơdâ tơ’nôm mâu tíu pêt krui ngeăm ƀă pêt loăng nhĕn ƀă păn tơ’nôm kơpôu ro chu í, ing mê, tơdroăng rêh ối rơpŏng hngêi á hiăng chía mơnhông. Nôkố tơdroăng rêh ối hiăng tơniăn pêi lo liăn xuân chía hên. Xo ah hmôi on veăng á tơmiât vâ mung tơ’nôm liăn po rơdâ tíu tê tơmeăm”.

Vâ pro tơ'lêi hlâu ăm kuăn pơlê mơnhông cheăng kâ, mơdêk pêi lo liăn ngân, khu kăn pơkuâ cheăm A Vương tŏng kum hdrê pêt, mơnăn păn, tŏng kum kuăn pơlê mơnhông cheăng kâ. Pôa Lưu Văn Khương, Kăn phŏ hnê ngăn Vi ƀan cheăm tơkăng kong A Vương, pơlê kong kân Đà Nẵng ăm 'nâi, cheăm đi đo mơnhên hnoăng cheăng kơdroh kơtiê cho hnoăng cheăng kal kí, tơbleăng pêi kơtăng mâu troăng hơlâ tŏng kum dêi Tơnêi têa, pơlê kong kân vâ mơhnhôk, tŏng kum kuăn pơlê pêi pro tơdroăng xăm kơklêa, kơdroh kơtiê.

“Hên rơpŏng nôkố hiăng khên tơnôu mung liăn vâ pêi cheăng kâ, ai hên rơpŏng hiăng chiâng rơpŏng mơjiâng pro tơmeăm pêi cheăng kâ rơkê. Ki xiâm môi tiah rơpŏng nâ Blắc, rơpŏng ngoh Khánh mê nếo ối ai mâu rơpŏng ki ê hía a mâu thôn pơlê ki ê. Cheăm  tơveăng gum, pro tơ’lêi hlâu tâi ivá vâ pơkâ mơ’no ăm hngêi rak liăn tŏng gum rêh ối pơlê pơla, hngêi rak liăn pêi chiâk deăng mơdêk kơxô̆ liăn ăm mung chía hên iâ vâ vâi krâ nhŏng o ai liăn ‘no hrê rak tơniăn cheăng tŏng gum mơnhông cheăng kâ”.

Pơlê kong kân Đà Nẵng nôkố ai lối 50.000 ngế kuăn pơlê pêi chiâk deăng rơkê, tung mê ai hên ngế ki djâ troăng ahdrối cho hdroâng kuăn ngo Cơ Tu. Rêm hơnăm, Khu pơkuâ kuăn pơlê pêi chiâk deăng Pơlê kong kân Đà Nẵng tơrŭm ƀă mâu kơvâ cheăng, kong pơlê, Hngêi rak liăn tŏng kum kuăn pơlê mung liăn mơdrếo laih rơpâ, xing xoăng hdrê pêt, mơnăn păn, kum mơngế tung khu mơnhông cheăng kâ. Hên rơpŏng kuăn pơlê cho hdroâng kuăn ngo Cơ Tu hiăng khên tơnôu 'no liăn mơnhông cheăng kâ rơpŏng hngêi, veăng mơjiâng thôn pơlê nếo.