Mơđah tơbleăng tiô tối hdrối po sap ing hâi lơ 15/12/2026 troh hâi 4/4/2027, ƀă mâu tơdroăng pêi pro ki kal a khế 3 ƀă apoăng khế 4/2027, mơ-eăm tơ’mot châ 1 rơtuh 300 rơpâu ngế tơmối troh lăm ngăn.

Tơdroăng ki nếo dêi po mơđah tơbleăng rôh kố cho tơrŭm mơđah tơbleăng kơphế ƀă mơnhông dêi kơvâ cheăng, sap ing kơpong pêt troh uâ pơliê, mơdiê ƀă tê mơdró. Mâu tơdroăng tơkŭm po Măng mơđah tơbleăng Kơphế lĕm Việt Nam, Tơdroăng pơhlêh nếo tơmiât pêi rơkê dêi kơvâ kơphế, Rôh tơ’noăng Kuăn pơlê pêi chiâk, Rôh hôp kong têa ê “Buôn Ma Thuột – Tíu pêt dêi kơphế Robusta dêi lâp plâi tơnêi” ƀă pơkâ mơdêk ‘no liăn uâ pơliê trâu rơdâ châ tơngah veăng gum mơdêk ki kơnía dêi kơphế.

Tíu po mơđah tơbleăng xuân châ po rơdâ tiô troăng tơdjêp mâu tíu troh sap ing Buôn Ma Thuột, Buôn Đôn, Long Lăk, Long Ea Kao troh Tuy Hòa, hlối tơrŭm tơkŭm po túa lĕm tro, tơ’noăng ivá, pế kế kâ ƀă ôm hyô têa kơxĭ. Kơxop hlá mơ-éa mơ’no tơkŭm po tơdroăng roadshow “Sap ing kong ngo troh a têa kơxĭ ngiât”, rơtế ƀă măng tĭng po mơđah tơbleăng kơphế po tê kơtê a kơpong peăng mâ hâi Lo vâ thăm mơnhông tơrŭm pro ôm hyô.

Ki rơhêng vâ tối, Dak Lak tiô tối hdrối mơjiâng pro mâu tơmeăm pơtối gum ăm kuăn pơlê ƀă tơmối klêi kơ’nâi po mơdĭng, ai Kơphô̆ Kaphế Buôn Ma Thuột, péa khu tơrŭm cheăng check-in a Plông kân 10 khế 3 ƀă Plông kân Phú Yên, rơtế ƀă tơdroăng Hngêi trá xŏn show a Tíu ‘măn rak tơmeăm Dak Lak. Tung mê, Hngêi trá xŏn show châ pơkâ xúa tung hơnăm.

Tiô pôa Trần Hồng Tiến, Kăn pơkuâ Khu ngăn Túa lĕm tro, Tơ’noăng ivá ƀă ôm hyô kong pơlê Dak Lak, leh tơbleăng rôh kố tơtrŏng mơdêk râ khu pơtâng tối, djâ um méa kơphế Ƀuôn Ma Thuột troh achê tâ ƀă pơlê pơla lâp plâi tơnêi. Pakĭng mâu hlá tơbeăng ƀă tung măng pơlê pơla, Khu pơkâ thế tơrŭm ƀă Kŏng ti xiâm Tơƀai Việt Nam tơbleăng leh tơbleăng tung mâu rôh tơƀai kơneăng tung tơnêi têa ƀă lâp plâi tơnêi.

‘’Hơnăm kố pơkâ akố, pin vâ tơbleăng, pơtâng tối leh tơbleăng ƀă djâ leh ki kố ro tâ, kân tâ troh a râ lâp plâi tơnêi. Khu pơkâ thế tơrŭm ƀă Tíu xiâm Hunitech dêi Kŏng ti xiâm Tơƀai Việt Nam vâ tơbleăng leh tơbleăng ăm a mâu rôh tơƀai kơneăng dêi Vietnam Airlines’’.

Pôa Đỗ Hữu Huy, Kăn hnê ngăn Vi ƀan kong pơlê Dak Lak tối ăm ngin ‘nâi, mơnhông mơdêk ôm hyô – tê mơdró môi tơdroăng cho troăng prôk ton xŏn, leh tơbleăng Kơphế Ƀuôn Ma Thuột ôh tá xê to tot dâng to a tơdroăng mơđah tơbleăng mê thế mơjiâng ivá tơtêk, mơdêk ki kơnâ tơmeăm pêi lo ing chiâk deăng ƀă tíu ối ôm hyô dêi kong pơlê. ‘Na mơnhên inâi, pôa Đỗ Hữu Huy môi tuăn inâi krếo xiâm ‘’Leh tơbleăng Kơphế Ƀuôn Ma Thuột’’, tơdrêng amê pơkâ pơtâng hnê tối pro rơdêi ki châ pơxúa dêi kơphế Robusta kong pơlê.

‘’Leh tơbleăng Kơphế Ƀuôn Ma Thuột cho inâi dêi tơnêi têa, ƀă nâl chêh tố slogan vâ pro inâi mơđah tơbleăng mê cho ‘’Buôn Ma Thuột – Tíu pêt hên kơphế Robusta ối má 1 lâp plâi tơnêi. Pin mơnhên Robusta pin cho hiăng to a kơlo má 1, ƀă kơphế tơdjuôm lâp plâi tơnêi mê pin ối má 2. Ƀă Buôn Ma Thuột châ 40% kơxô̆ kơphế dêi lâp tơnêi têa’’.