Kăn xiâm pơkuâ hnê ngăn Đảng, Kăn xiâm hnê ngăn tơnêi têa Tô Lâm ăm 'nâi, Việt Nam pơkâ mơ-eăm chiâng tơnêi têa pêi lo liăn tơdâng hên, pêi cheăng xúa kơmăi ki dâi lĕm tiô túa nếo a hơnăm 2030 ƀă tơnêi têa mơnhông tơƀrê, pêi lo liăn hên a hơnăm 2045. Việt Nam mơnhên khoa hok kŏng ngê̆, pơhlêh nếo tơmiât pêi rơkê, cheăng kâ 'na tuăn ngôa rơkê ƀă pơhlêh ngiât cho mâu ivá ki kal; tơdrêng amê xo kuăn mơngế pro xiâm, rak tơniăn kuăn pơlê châ pơxúa tơƀrê tơdâng tơ'mô, păng 'nâng.

Khĕn kơdeăn tơdroăng tơrŭm cheăng 55 hơnăm pơla péa tơnêi têa, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ mơjiâng troăng tơrŭm cheăng ton xŏn ƀă tâi tâng, po rơdâ tơrŭm cheăng 'na tê mơdró, 'no liăn cheăng, hnê hriâm, khoa hok kŏng ngê̆, on tơhrik ƀă pơhlêh ngiât. Péa pâ xuân kal mơdêk tơrŭm tơpui tơno ƀă khu rơkê, hnê mơngế pêi cheăng rơkê ƀă mơdêk hnê cheăng xúa kong ngê̆. ‘Na mơnhông krá tơniăn, Việt Nam púi vâ Đan Mạch mơdêk tơpui tơno, tơrŭm cheăng tơniăn, hlâu lĕng tơniăn a têa kơxĭ tơtro ƀă luât lâp plâi tơnêi, veăng mơjiâng lâp plâi tơnêi hơniâp, tơdâng ƀă mơnhông tơbrê.