Bu tung lối péa khế, ƀă pơkâ khŏm pêi dêi khu kăn pơkuâ, ngế rah chêh, kih sư ƀă kih thuât viên dêi Rơ’jíu Việt Nam hiăng thâ mơjiâng tơdroăng ki nếo, rah xo mâu ƀai, kêi đeăng kih thuât, hbrâ ăm môi tíu mơ’no rơ’jíu nếo, tíu idrâp tơdrá hên tơdroăng ngê̆ thuât châ kơjo tơdjêp ihiâm mơno ƀă ngế ki tơmâng.

Ing mâu ƀai tơdrá nhak chêh lĕm po apoăng hâi nếo tung tơdroăng ‘’Idrâp chuât tơdrá mâ hâi’’, troh mâu tơdrá ki ro tơniâ dêi ‘’Tơdrá mê nah’’, lơ tíu vâ tơmâng rêi prôa djâ ki tơdroăng ki phá krê. Vâ mâu ƀai rêi ki ro tơniâ, mâu tơdrá thính phòng, Jazz ôh tá xê to chuât tung kơbong rêi nhak, mê ối ai tung tơdroăng rêh ối rêm hâi; vâ rêm ngế tơmâng ai tơ’nôm rôh tâ ki hai, ki ro lĕm dêi idrâp tơdrá, mơjiâng chiâng tơdroăng ki hmâ tơmâng ngê̆ thuât ƀă păn ihiâm mơno.

Mê xuân cho ki kơnâ VOV Sonata FM 89 tơmiât pêi la ngiâ vâ idrâp tơdrá ôh tá xê to châ tơmâng, mê ối gum pro hên tơdroăng rêh ối ihiâm mơno ƀă troh lâp lu ki kơnâ khôi túa lĕm tro krá tơniăn tung pơlê pơla. VOV Sonata FM 89 mơ’no 24/24 chôu rêm hâi a kơlo troăng hyôh kơxô̆ FM 89 MHz.