Ƀă 18 Khu ki veăng mơđah tơbleăng, Kong măng mơhno túa lĕm tro ‘na Ếo xŏn ƀă Ếo pơtâk dêi hdroâng kuăn ngo mơhno hên túa lĕm tro dêi mâu hdroâng kuăn ngo, rêm kơpong rơtế tơkŭm po a Dak Lak. Sap ing ếo xŏn tế, ếo xŏn ‘ngrôa pá ngiâ, pá rŏng ƀă hmân ếo pơtâk hdroâng kuăn ngo Rơđế, Jarai, M'Nông, Thái, Tày, Mường… rêm tơdroăng mơđah tơbleăng mơhno môi khôi túa krê tung khu túa lĕm tro dêi Dak Lak klêi kơ'nâi tơmot kong pơlê chiâng môi.

Veăng mơđah tơbleăng cho mâu kăn ƀô̆, hô̆i viên vâi kơdrâi, kuăn pơlê pêi chiâk deăng, vâi kơdrâi ki rơkê, vâi kơdrâi mơdró kâ ƀă vâi kơdrâi tung khu lêng. Mâu tíu pêi cheăng djâ troh a plông mơđah mâu ếo pơtâk tiô khôi vâi krâ nah rơtế ƀă mâu tơdroăng ki pro ƀối, pro tơrŭm ƀă ếo pơtâk kuăn ngo ƀă ếo tế xŏn dêi Xuăn.

Tung ếo pơtâk hdroâng kuăn ngo Thái, nâ Hoàng Thị Dương, lo ing cheăm Ƀuôn Đôn tối ăm 'nâi, kố cho rôh vâ mâu vâi nâ o a mâu pơlê cheăm châ trâm mâ, tơpui tơno ƀă hriâm tâp tơ'nôm 'na khôi túa, vêa vong dêi mâu hdroâng kuăn ngo.

“Kố cho môi hâi leh kân dêi vâi kơdrâi ƀă xuân cho rôh vâ vâi kơdrâi tơrŭm pơla vâi nâ o dêi mâu Khu ngăn vâi kơdrâi dêi mâu cheăm. Tiah hmâ, ngin tơvâ tơvân hên tơdroăng cheăng, ôh tá toh chôu phut vâ tơpui tơno ƀă dêi rơpó ƀă kố cho môi rôh vâ vâi nâ o châ tơrŭm tơpui tơno, tơdjêp, hriâm ƀối tơdroăng ki lĕm, ki tro dêi rơpó ƀă xuân châ 'nâi tơ'nôm hên khôi túa lĕm tro dêi rêm kơpong tơnêi, rêm hdrông mơngế”.

Rơtế ƀă tơdroăng mơhno khôi túa lĕm tro, tơdroăng ối tơbleăng Kâu lăk ƀô̆ KOLs, KOCs Dak Lak, vâ tơdjêp kuăn pơlê pêi chiâk deăng, khu pêi cheăng tơrŭm ƀă mâu ngế ki chêh bro tơdroăng ki kal tung măng internet, tơbleăng ƀă tê tơmeăm tung điê̆n tưh. Jâ H'Giang Niê, Kăn hnê ngăn Khu kuăn pơlê pêi chiâk deăng kong pơlê Dak Lak tối tiah kố, ai tơ'nôm hên kuăn pơlê pêi chiâk deăng chiâng mâu ngế ki ai tơdjâk kân, châ ô eăng tung măng pơlê pơla ƀă mơdêk tơƀrê hnoăng cheăng dêi kâu lăk ƀô̆, xuân cho troăng veăng kum ăm kơvâ pêi chiâk pêi deăng kong pơlê thăm rế châ mơnhông tơtêk.

“Ngin pói tơngah tiah kố, kâu lăk ƀô̆ KOLs, KOC dêi kong pơlê kô tơdjêp tơ'nôm hên kơchơ mơdró kân tung lâp tơnêi têa tối tơdjuôm ƀă thăm nếo cho lo a kong têa ê, mơjiâng chiâng môi tơdroăng vâ vâ mơđah tơbleăng mâu kế tơmeăm dêi kong pơlê Dak Lak tối krê ƀă mâu kong pơlê ki ê tung lâp tơnêi têa tối tơdjuôm. Ing kâu lăk ƀô̆ kố, ngin vâ hnê mơjiâng chiâng môi lâm kuăn ăm to vâi nâ o pêi chiâk deăng ki rơkê plĕng, tơmiât pêi thăm rế rơkê ƀă khên tơnôu vâ mơ’no tê dêi kế tơmeăm ki mơjiâng dâi lĕm troh a kơchơ mơdró điê̆n tưh”.

Xuân tung rôh kố, a Ƀuôn Ma Thuột, Dak Lak, po mơđah tơbleăng um rơneăm ƀă ché Sợi tơ Cao nguyên. Hngêi trá xŏn, tơdroăng tĕn hmôu jiâ, rơneăm ếo pơtâk ƀă mâu um ki achê, hmâ hlo tung tơdroăng rêh ối dêi kuăn pơlê Tây Nguyên châ mâu ngế ki rơkê kơchuâ hiăng chêh bro um rơneăm ƀă ché ai túa ki rơmuăn lĕm, lĕm ro, mơnâ mâ ngăn.

Ngoh Trương Văn Linh, Ngế kơchuâ um, Ngế pơkuâ kơvâ Kơchuâ um, Hngêi trung Kao đăng Văn hóa Nghệ thuật Dak Lak mơđah tơbleăng 3 kơtâ um tiô túa ki ngăn, tơmiât nhên nếo ‘nâi kơnó um ki mê. Tung mê, kơtâ um “Quà từ đất đỏ” ngoh chêh kơchuâ bro ing tơnêi ƀazan ƀă loăng kơphế, la ôh tá mơhno ƀă mâu um ki hmâ tiah hlo. Ngoh Trương Văn Linh-ngế kơchuâ um tối:

“Kơphế dêi Dak Lak hiăng châ mơhno tơbleăng troh lâp plâi tơnêi, mê á xo tơdroăng ki lĕm tro cho 'Quà từ đất đỏ' ƀă túa kơchuâ um ki pá vâ ‘nâi kơno nhên khât kố. Drêng vâi ối a ngiâ um, tiô tơdroăng ki rơhêng vâ ngăn dêi rêm ngế mê ai tơdroăng ki hâk vâ phá krê xêh”.

Rêm tơmeăm mơđah tơbleăng pơrá mơhno hiâm mơno dêi ngế ki chêh bro, kơchuâ bro ƀă kơpong tơnêi ƀă khôi túa lĕm tro dêi Tây Nguyên. Mơđah tơbleăng Sợi tơ Cao nguyên tơkŭm po a Hngêi 'măn rak kế tơmeăm lâp plâi tơnêi Kơphế, Ƀuôn Ma Thuột, Dak Lak, lôu péa ăm tơmối troh ngăn tá troh hâi lơ 30/10/2026.