Peăng xêi hâi tĭng, nâ H'Theo ƀă kuăn kơdrâi H'Giang rơtế lo a plông pơtâp tơ'noăng kơtú ƀa long. H'Theo-35 hơnăm, cho ngế ki kân má môi, ‘na H'Giang, 16 hơnăm- ngế ki ối nếo má môi tung khu kơtú ƀa long vâi kơdrâi Đak Đoa, Gia Lai.

Nâ H'Theo hmâ ƀă khu kơtú ƀa long hiăng 7 hơnăm, sap ing kuăn kơdrâi H'Giang nếo hriâm lâm 4. Mâu rôh tiô dêi nôu lo a plông, ối a kĭng troăng veăng tríu têa kong mơhnhôk tung mâu rôh tơ'noăng a cheăm, tơring mê mâu rôh lăm tơ'noăng hơngế hngêi hiăng pro H'Giang hâk vâ kơtú ƀa long drêng lâi ôh tá 'nâi. Sap ing tí tăng ngăn dêi nôu tơ'noăng, o pơxiâm pơtâp ƀă nôkố rơtế dêi nôu veăng tung khu ki hbrâ vâ mot tung khu kơtú ƀa long ki rơkê. Ƀă H'Theo, tơdroăng ki hơniâp ro mê ối kân tâ xua hiăng pơtroh ăm dêi kuăn kơdrâi tơdroăng ki loi tơngah vâ rah xo tơdroăng ki tơná hâk vâ:

“Roh vâi krâ nah, vâi tối vâi kơdrâi chêng kŏng ôh tá rơdêi. La hâi kố ôh tá pơrah ngăn tơ'mô há, kơnốu kơdrâi xuân môi tiah dêi rơpó há. Vâi kơnốu 'nâi kơtú ƀa long mê vâi kơdrâi xuân 'nâi kơtú ƀa long. Tơdroăng ki pá gá hên 'nâng, xua á cho ngế nôu, xuân cho ngế ki pêi cheăng xiâm tung rơpŏng hngêi há. Xua hâk vâ, tơná kô tiô, tơná hiăng hên hơnăm há, mê ôh tá ai hên tơdroăng cheăng xếo. A hnê djâ troăng hnê ăm dêi kuăn vâ kuăn tiô tơdroăng púi vâ kơtú ƀa long ki rơkê".

Tâng H'Theo athế xing xoăng tơdroăng cheăng pêi tung rơpŏng hngêi, tơdroăng pêi chiâk pêi deăng vâ hmâ ƀă kơtú ƀa long, mê Rơ Chăm H'Vưn - ngế ki kơtú ƀa long mơngế Jarai (a Pleiku Roh, bêng Diên Hồng) ối athế tăng troăng mơhnhôk dêi rơpŏng hngêi ăm tơná châ kơtú ƀa long. Mâu hâi apoăng, ngế droh kot mâ hơnăm 2009 hmâ kơtú ƀă mâu vâi pú kơnốu tung pơlê xua iâ ai vâi kơdrâi ki hâk vâ kơtú.

Nôkố, drêng khu mot tung môi hneăng ki nếo, troh ƀă tơdroăng kơtú ƀa long, xuân cho rôh H'Vưn dế hriâm hơnăm má mơ'nui râ má pái phôh thong ƀă hlối ai veăng mơhnhôk dêi rơpŏng hngêi:

“Á nôkố ôh tá châ pơtê: kơxo hriâm, kơxê lăm kơtú ƀa long, kơmăng á kô hriâm tơ'nôm vâ hbrâ tơ'noăng mơgêi hriâm râ má pái. Á kô xing xoăng chôu vâ lăm kơtú. Á tiô kơtú ƀa long kố apoăng pâ á ôh tá ăm. La hiăng cho tơdroăng ki hâk vâ ôh tá ai kơbố kâi mơdât. Apoăng á kơtú a plông tơnêi tê, ôh tá ai liăn kơtú a plông ki lĕm ai nhâ. Klêi roh tơ'noăng tơbriêt kâ pri apoăng mê pâ á hiăng ăm thế mơ-eăm”.

Tơdroăng hơ'muăn dêi H'Theo ƀă H'Vưn xuân cho môi tơdroăng ki tơdjuôm dêi khu kơtú ƀa long vâi kơdrâi Đak Đoa, kong pơlê Gia Lai. Mâu ngế kơtú ƀa long hdroâng kuăn ngo Bơhnéa, Jarai lo ing hên tíu, a mâu hơnăm hên iâ ƀă tơdroăng rêh ối pơrá phá dêi pó: ngế ki ‘nâ ối lăm hriâm, ngế ki ‘nâ pêi chiâk, ai ngế ki 'nâ hiăng ai kuăn ƀă cho ngế ki pêi cheăng xiâm tung rơpŏng hngêi. Vâi trâm dêi pó a tơdroăng ki hâk vâ ‘na kơtú ƀa long ƀă môn tơ'noăng ivá. Vâ rak tơniăn mâu rôh pơtâp, vâi athế xing xoăng tơdroăng cheăng hngêi, cheăng chiâk deăng; hên ngế ối kơnôm dêi kơnốu, nôu pâ tŏng kum, mơhnhôk. Tơdroăng ki kơdo mơ-eăm ing rêm rôh tơ’noăng xuân rế pro mâu ngế tung rơpŏng hngêi hdrối tô tuăn, nôkố hiăng loi tơngah troăng prôk ki vâi rah xo dêi.

A rôh tơ'noăng kơtú ƀa long vâi kơdrâi mâu hdroâng kuăn ngo Việt Nam rôh má môi hơnăm 2026, khu Đak Đoa ai 10 ngế kơtú ƀa long cho Bơhnéa  ƀă 4 ngế kơtú ƀa long cho Jarai. Mâu vâi o mot tung rôh tơ'noăng má mơ'nui trâm khu Lục Yên dêi kong pơlê Lào Cai ƀă châ kâ ối má môi. Khu kơtú ƀa long hiăng djâ ăm tơdroăng hâk tơngăm ăm tơná ƀă tá mơngế ki hâk vâ ngăn a pơlê xiâm. Pôa Nguyễn Hữu Tường, ối a tôh kơphô̆ 5, cheăm Đak Đoa, Gia Lai, tối:

“Khu kơtú ƀa long dêi Đak Đoa kơhnâ khât. Mâu vâi o ai klâng chiâk hên la mâu vâi o xing xoăng dêi tơdroăng pêi chiâk deăng vâ veăng tung khu kơtú ƀâ long. Á hlo mâu vâi o kơhnâ khât tiah mê, pin phiu ro, hâk tơngăm há. Vâi châ kâ pri a râ tơnêi têa, pin phiu ro khât ăm mâu vâi o".

Ngế ki pơkuâ djâ khu kơtú ƀa long vâ chê 7 hơnăm hiăng hluâ cho Nguyễn Anh Dũng ngế ki hnê kơtú, châ mâu ngế ki kơtú ƀa long khĕn cho "Pâ Dũng". Apoăng hơnăm 2019, pôa tơkŭm mâu vâi kơdrâi ki hâk vâ kơtú ƀa long, mơjiâng khu kơtú ƀa long Link Coffee. Ing mâu rôh tơ'noăng a Tây Nguyên, peăng Tơdế tơnêi têa, khu châ kâ ối má môi môi rôh tơ'noăng futsal a Pơlê kong kân Hồ Chí Minh hơnăm 2022. Troh hơnăm 2026, mâu vâi o kơdrâi Đak Đoa châ kâ ối má môi kơpong Tây Nguyên, klêi mê châ kâ ối má môi Rôh tơ'noăng kơtú ƀa long vâi kơdrâi mâu hdroâng kuăn ngo Việt Nam.

Klêi kơ'nâi hên hơnăm thái hnê ƀă hok tro pơtâp xêh vâ rak vế khu kơtú ƀa long vâi kơdrâi Đak Đoa păng 'nâng châ pơcháu ăm Kâu lăk ƀô̆ Kơtú ƀa long Hoàng Anh Gia Lai. Sap ing kố, mâu ngế kơtú ƀa long châ tŏng kum mâu tơdroăng pơtâp lĕm, ai liăn khế ƀă liăn kum, vâ hâk vâ ƀa long. Pôa Nguyễn Anh Dũng Ngế hnê loi tiah kố, kố cho tơdroăng ki vâ pơtâp kơtú ƀa long rơkê dêi khu.

“Nhŏng o ai pơkâ thế ƀă Kâu lăk ƀô̆ Kơtú ƀa long Hoàng Anh Gia Lai cho kơhâi xuân pêi cheăng, pêi tơdroăng cheăng a chiâk deăng ƀă rơpŏng hngêi a hngêi. Kơxêi măng mê khu pơtâp a plông Đăk Đoa đi đo. Kố cho tíu ki tơ'lêi hlâu ăm mâu vâi pú pêi tơdroăng cheăng rơpŏng hngêi ƀă tơdroăng ki hâk vâ. Khu kơ tú ƀa long xuân môi tuăn. Khu kơtú ƀa long hâk vâ khât xua châ tơdah xo, kô châ pơtâp, ai kế tơmeăm ƀă ai mâu ƀai hnê hriâm ki nếo vâ khoh châ veăng tơ'noăng a rôh tơ'noăng kân dêi tơnêi têa hơnăm 2027 la ngiâ".

Klêi kơ'nâi rôh pơtâp, mâu vâi droh Đak Đoa vêh dêi a hngêi, hbrâ ăm môi hâi lăm hriâm, lăm pêi cheăng, lăm  a chiâk môi tiah hmâ. La a rôh pơtâp ki pơtối, vâi kô lo a plông ƀă môi tơdroăng pơkâ ki nếo cho châ kâ ối má môi tung khu kơtú ƀa long vâi kơdrâi lâp tơnêi têa hơnăm 2027.