Nếo klêi hriâm kao đăng la tá hâi tăng châ tơdroăng cheăng ki tơtro, nâ H'Đoái Ƀyă, ối a ƀuôn Ê Rang, bêng Thành Nhất, kong pơlê Dak Lak hiăng chêh inâi hriâm lâm sơ cấp Kih thuât pế pơchên kế kâ xua kong pơlê tơkŭm po. Nâ H'Đoái mơnhên kố rế cho tơdroăng ki rơkê tơ'nôm, rế cho môi tơdroăng cheăng pêi tâng tá hâi tăng châ tơdroăng cheăng tro kơvâ cheăng ki hiăng hriâm.

“Mâu rôh hriâm môi tiah kố ăm á mâu tơdroăng ki rơkê plĕng ƀă hnê hriâm tơtro tâ, kơ'nâi ah châ 'nâi hên tâ 'na mâu kế kâ, ai hên tơdroăng ki rơkê plĕng tâ 'na pế pơchên kế kâ, mơjiâng pro kế kâ ki lĕm tâ. Tơdroăng ki rơhêng vâ á drêng hriâm klêi hneăng hriâm kố mê kô chiâng mot pêi cheăng ăm mâu hngêi pế pơchên kế kâ lơ kŏng ti.‘’

Nâ H'Đoái Ƀyă cho môi tung 60 ngế hok tro hdroâng kuăn ngo veăng hriâm lâm sơ cấp Kih thuât pế pơchên kơchâi kâ xua Vi ƀan bêng Thành Nhất tơrŭm ƀă Hngêi trung Kao đăng Ƀuôn Ma Thuột tơkŭm po. Tung pơla péa khế, hok tro châ hnê mâu tơdroăng ki hbrâ, pế pơchên, 'măn rak kế kâ, rak tơniăn krúa lĕm kế kâ ƀă tơbleăng kơchâi kâ.

Tiô pôa Nguyễn Hữu Luật, Kăn phŏ hnê ngăn Vi ƀan bêng Thành Nhất, kong pơlê Dak Lak, lâm hriâm châ tơbleăng tiô Tơdroăng tơkêa bro 3, Tơdroăng tơkêa bro 5 'na mơnhông hnê cheăng pêi ƀă tăng cheăng pêi ăm mơngế pêi cheăng kơpong hdroâng kuăn ngo ƀă kong ngo. Kố cho lâm hriâm ki apoăng bêng tơbleăng ing kơxô̆ liăn hơnăm 2026 klêi kơ'nâi pêi pro túa pơkâ khu kăn pơkuâ kong pơlê péa râ.

 Tơdroăng rah xo tơdroăng cheăng châ kong pơlê ngăn a tơdroăng kal vâ dêi kuăn pơlê ƀă ivá xúa klêi hriâm. Mâu lâm ki pơtối xuân kô châ séa ngăn vâ tơtro tâ ƀă tơdroăng kal vâ pêi cheăng ki khât.

“Bêng Thành Nhất xuân pơtối po mâu lâm hnê tơ'nôm mâu tơdroăng cheăng ki tơtro ƀă tơdroăng nôkố vâ kum ăm vâi krâ nhŏng o ai tơdroăng ki hlê plĕng, 'nâi nhên tơdroăng cheăng ki tơtro, vâ ing mê ah, vâi krâ nhŏng o xuân môi tiah mâu ngế hriâm rah xo môi tơdroăng cheăng, môi tơdroăng pêi vâ pơkâ mơdêk pêi lo liăn ngân ƀă vâ mơnhông tơdroăng rêh ối’’.

Tơbleăng Tơdroăng tơkêa bro 3 ối tung Tơdroăng tơkêa bro 5 dêi Tơdroăng pơkâ xiâm tơnêi têa 1719, mâu cheăm bêng a kong pơlê Dak Lak pơtối séa ngăn tơdroăng kal vâ, tơrŭm ƀă tíu hnê cheăng pêi po mâu lâm tơtro ƀă tơrêm khu ngế pêi cheăng. Tơdroăng hnê ôh tá xê to pơtê a hnê tơdroăng cheăng, mê rế hía rế rơtế ƀă tăng cheăng pêi ƀă ai tơ'nôm kơxô̆ liăn pêi lo klêi kơ'nâi lâm hriâm.

A bêng Tân An, nâ H'Ju Êban, ối a ƀuôn Kmrơng Prŏng, hiăng po tíu pro lĕm mơnâ mâ ngăn a pơlê klêi kơ'nâi veăng môi lâm cheăng pro mơnâ mâ ngăn xua kong pơlê tơkŭm po. Nâ H'Ju hiăng ai kơxô̆ liăn pêi lo tơniăn.

“Á hiăng châ veăng hriâm lâm hnê cheăng (mêk -khâp) make-up xua bêng Tân An tơkŭm po. Pơxiâm sap ing apoăng hơnăm 2026 á hiăng po tíu tê, cheăng kố hiăng pêi lo liăn tơniăn ăm rơpŏng á”.

Pêi pro mâu tơdroăng pơkâ dêi tơnêi têa 'na kơdroh kơtiê, mơjiâng thôn pơlê nếo ƀă mơnhông cheăng kâ - rêh ối pơlê pơla kơpong hdroâng kuăn ngo, hneăng hơnăm 2016-2024, kong pơlê Dak Lak hiăng hnê cheăng pêi râ sơ kâp ăm lối 34.000 ngế pêi cheăng tung thôn pơlê. Klêi tơ'mot tơdjuôm, hơnăm 2025 ai dâng 5.400 ngế pêi cheăng pơtối châ hnê. Troh mơ'nui hơnăm 2025, kơxô̆ ngế pêi cheăng klêi hriâm dêi kong pơlê châ 70%, tung mê 27% ai ƀăng, chư̆ng chih.

Vâ mâu lâm hnê cheăng pêi ki iâ khế chiâng vâ tăng cheăng pêi, tơdroăng hnê thế tơmiât troh tơdroăng kal vâ xúa mơngế pêi cheăng klêi kơ'nâi lâm hriâm. Ƀă mâu tíu hnê cheăng pêi, hâi khế hnê kô chiâng kơdroh la tơdroăng pêi pro châ tơmâng khât vâ mơngế hriâm rĕng chiâng xúa tơdroăng ki rơkê hiăng hriâm.

Pôa Trần Quốc Cường, Phŏ Kăn pơkuâ Hngêi trung Kao đăng Ƀuôn Ma Thuột, kong pơlê Dak Lak tối ăm 'nâi, klêi kơ'nâi tơniăn tơkŭm po khu pêi cheăng, hngêi trung pơtối tơrŭm ƀă mâu kong pơlê séa ngăn tơdroăng kal vâ, po mâu lâm cheăng ki tơtro ƀă tơdroăng kal vâ:

“Tơtrŏng troh tơdroăng ki rơhêng vâ dêi pơlê pơla, nôkố khu mơdró kâ dế kal ki klâi, pơlê pơla dế kal mâu kơvâ cheăng ki klâi, mê hngêi trung kô tơrŭm ƀă Vi ƀan mâu cheăm, bêng vâ hnê mơjiâng, kum mâu ngế hriâm ai hâi khế hnê mơjiâng iâ la ai tŭm tơdroăng ki hlê plĕng môi tiah hnê mơjiâng tiô túa ki păng 'nâng, hmâ hlo sap ing 3/6 khế. Ngin kô tơkŭm pêi pro tung pơla 2 khế tê, vâ kum mâu ngế pêi cheăng drêng lo ing hngêi trung kô chiâng veăng pêi cheăng hlối a kơchơ mơdró ki dế kal vâ pêi cheăng nôkố’’.

Tiô Pơkâ pơ'lêh nếo, mơdêk ki rơkê plĕng hnê cheăng pêi thôn pơlê troh hơnăm 2030, Dak Lak pơkâ rêm hơnăm hnê, tơ'nôm tơdroăng cheăng pêi ăm dâng 10.000 ngế pêi cheăng thôn pơlê, kơxô̆ ngế ai cheăng pêi klêi kơ'nâi hnê hriâm lối 85%; kơjo mơngế pêi cheăng kơpong hdroâng kuăn ngo, kơpong hơngế, hơngo.

Pôa Nguyễn Quang Thuân, Phŏ kăn pơkuâ Khu kăn ƀô̆ kong pơlê Dak Lak tối tiah kố, vâ tơdroăng pơkâ kố chiâng ai khât, tơdroăng tơdjêp pơla tíu hnê cheăng pêi ƀă tíu xúa mơngế pêi cheăng châ mơnhên cho môi tơdroăng ki kal.

“Mâu hngêi trung, mâu tíu hnê cheăng pêi tơrŭm ƀă mâu khu mơdró kâ, khu ngăn ‘na mâu kơvâ cheăng tung kong pơlê ƀă kong pơlê ki ê, thăm nếo cho mâu khu mơdró kâ a kong têa ê vâ mơdêk ki rơkê plĕng tung hnê mơjiâng, xuân môi tiah tơkŭm po hnê cheăng pêi, tơkŭm po pêi cheăng ăm hok tro, sinh viên; vâ klêi kơ'nâi ai ƀăng, chư̆ng chih, mâu vâi o tơxâng hlối tơdroăng cheăng, ôh tá êa hnê mơjiâng nếo ăm mâu khu mơdró kâ”.

Môi lâm hnê cheăng pêi kô ton bu to lâi khế, la ki kơnâ ôh tá pơtê to a hlá mơ-éa mơnhên. Ki kal tâ cho ngế ki hriâm ai tơ'nôm rôh tăng cheăng pêi, tăng xêh cheăng pêi ƀă ai tơ'nôm kơxô̆ liăn pêi lo. Drêng tơdroăng cheăng châ rah xo tơtro ƀă tơdroăng kal vâ ƀă tơdjêp ƀă tíu tê klêi kơ'nâi hriâm, kơxô̆ liăn ing tơdroăng pơkâ dêi tơnêi têa nếo mot tung tơdroăng rêh ối, po tơ'nôm rôh vâ kuăn pơlê, malối cho hdroâng kuăn ngo, kơdo mơ-eăm xêh.