Ai 8 kơxop hlá mơ-éa luât chêh hdrối hiăng châ tơkŭm tơpui tơno, veăng tơpui tối, mê cho: Luât Tơbriât há yă mơjiâng pro tơmeăm ('mâi hơ'lêh); Luât há yă tơmeăm khoăng ('mâi hơ'lêh); Luât Hngêi ối ('mâi hơ'lêh); Luât Mơnhông mơdêk khu tê mơdró kŭn ƀă krâ kơvâ; Luât 'mâi hơ'lêh, tơ'nôm mâu tơdroăng dêi Luât Tê mơdró, Luât Tơbriât, Luât Pơkuâ ngăn tê mơdró  ƀă kong têa ê, Luât Kring vế hnoăng pơxúa mơngế rôe xúa; Luât Mơđah tơbleăng rôe, tơbleăng xúa tơmeăm; Luât 'mâi hơ'lêh, tơ'nôm mâu tơdroăng dêi Luât Rak tơniăn, tơniăn pêi cheăng; ƀă mơ-éa chêh hdrối Luât ‘mâi hơ’lêh, tơ’nôm mâu troăng dêi luât ‘na pơtâp ivá, tơ’noăng ivá, ôm hyô, tíu chô ‘măn mơ-éa, tơdroăng xup um, tơmeăm ki kơniá mơhno khôi túa lĕm tro, mơđah tơbleăng, hlá tơbeăng.

Ki tơtrŏng má môi cho ‘na mơ-éa chêh hdrối ‘mâi rơnêu, tơ’nôm mâu troăng dêi luât Rak tơniăn krúa lĕm, tơniăn pêi cheăng, mâu kăn teăng mâ pơkâ thế po rơdâ mơngế ki veăng ƀaoh hiâm gum tung trâm xía vâ drêng pêi cheăng, tơdroăng châi xua pêi cheăng ki pơklât ƀă mâu troăng tŏng gum ki tơtro. Pơtối mê, kal hriăn plĕng pơkâ inhên tíu tŏng gum kơlo nâp dêi khu pêi cheăng ôh tá ai hơp đong pêi cheăng ối rơpŏng kơtiê, vâ chê kơtiê lơ rêh ối a kơpong hdrông kuăn ngo.