Khu ngăn Túa lĕm tro – pơlê pơla, Hô̆i đong hnê ngăn kong pơlê Dak Lak hiăng lăm ngăn a mâu kơ koan, kơvâ cheăng ai tơdjâk troh ‘na tơkŭm pêi cheăng dêi mâu tíu hnê hriâm klêi kơ’nâi ‘mot tơkŭm, pêi châ tơdroăng púi rơhêng vâ hnoăng cheăng hơnăm hriâm 2026-2027 ƀă mâu hơnăm ki pơtối. Klêi kơ’nâi ‘mot tơkŭm, Dak Lak kơdroh tơdế mâu tíu hnê hriâm kông lâp, chu ối 625. Tơdroăng vêh tơkŭm po mâu hngêi trung lâm hriâm pro lế lĕm tíu pêi cheăng pơkuâ ngăn, tơkŭm mâu liăn ngân ăm hnê ƀă hriâm.

Laga, tung pơla kố xuân pơkâ mâu tơdroăng ôh tá tơniăn tung xing xoăng mâu thái cô, malối cho a mâu hngêi trung ki kân, ai hên phân hiê̆u kơtăn hngế ing dêi rơpó.

Nôkố kong pơlê Dak Lak ai vâ chê 33.000 ngế thái cô, tung pơla tiô pơkâ kơlo cho kal lối 35.000 ngế. Ki rơhêng vâ tối, maluâ ối kal thái cô a hên râ hriâm, môn hriâm, kong pơlê xuân ối ai 686 ngế thái cô rơlối hên, ki hên cho tung mâu môn Ngữ văn, Lịch sử, Địa lý. Tung pơla mê, mâu môn Tiếng Anh, Tin học, Mỹ thuật, Âm nhạc ƀă Hnê hriâm pơtâp ivá ối kal thái cô.

Tơdroăng ki vâ xing xoăng pơtroh thái cô pơla mâu tíu hnê nếo châ tơdế tơdroăng rơhêng vâ, chiâng pá tung tơdroăng rah xo ƀă hợp đong thái cô xuân ối hên.

Pakĭng mê, kơlo mâu ngế cheăng a mâu hngêi trung klêi kơ’nâi ‘mot tơkŭm xuân tá hâi tơtro ƀă ki ai khât. Ai hên hngêi trung phân hiê̆u kơtăn ing dêi pó lối chât km, la mâu ngế cheăng khăm pơlât bu ai to môi ngế. Khu ngăn kong pơlê, cheăm bêng ƀă hnoăng cheăng mâu kăn ƀô̆ Dak Lak pâ thế Khu xiâm ngăn hnê hriâm ƀă hnê mơjiâng tuăn ngoâ rơkê séa ngăn, ‘mêi rơnêu kơlo mâu ngế cheăng tiô pơkâ ƀă ki kal tơdroăng cheăng dêi mâu tíu hnê hriâm, rak tơniăn pêi châ tơdroăng púi vâ rak ngăn ivá mâu hok tro.

Môi tơdroăng tơvâ ki ê cho tơleăng mơnhên troăng hơlâ tŏng gum mâu kăn ƀô̆ pơkuâ ki u ối klêi kơ'nâi rah xo. Mâu kăn ƀô̆ pơkuâ ki ton hiăng châ xing xoăng ăm tíu pêi cheăng ki nếo, maluâ pro thái cô, ôh tá ối tung tơdroăng séa ngăn rah iâ mơngế. Tơdroăng kố pro mâu ngế ki ai hiâm mơno vâ pơtê cheăng la tá hâi châ tơleăng mơnhên. Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak pâ thế Khu xiâm ngăn cheăng pêi rĕng 'mâi rơnêu hnê mơhno vâ tah lôi pá puât ăm mâu kong pơlê, rak tơniăn hnoăng pơxúa ƀă tơniăn hiâm mơno khu kăn klêi kơ'nâi rah xo.