Tơdroăng tơkêa bro châ tơbleăng tung kơpong tơnêi rơdâ dâng 5.700 m², xua Kŏng ti pêi cheăng tiô rơnó môi khu Ôm hyô Phú Tài pro xiâm mơ'no liăn cheăng. Tơdroăng tơkêa bro ai túa pơkâ tiô tối hdrối dâng 431 toăng, ai 419 toăng hngêi ối pơlê pơla tung toăng hngêi kân xŏn 24 râ ƀă 12 toăng hngêi ối tê mơdró iâ râ xŏn 5 râ. Tâi tâng kơxô̆ liăn mơ'no dâng 817 rơtal liăn; tơdroăng pêi pro tiô tối hdrối kêi đeăng séa ngăn, ăm xúa rơnó III/2028.  

Tơpui a rôh leh, Thươ̆ng tươ̆ng Đặng Hồng Đức - Ngế xiâm phŏ pơkuâ Kŏng an tối ăm 'nâi, tơmeăm khoăng vâ veăng kum pơkâ tơpui ƀă pêi pro tơdroăng kal vâ hngêi ối, 'mâi hơ'lêh tơdroăng rêh ối ăm kăn ƀô̆, mâu Kŏng an kuăn pơlê, kum tơniăn tơdroăng rêh ối, hmiân tuăn pêi cheăng ƀă pêi pro hnoăng cheăng gâk kring, tơniăn tung pơlê pơla.