Khĕn kơdeăn tơmeăm ki ai hlâu, tơnêi tơníu ki rơlối tung tơdroăng tơrŭm cheăng pơla péa pâ, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Thiểm Tây ƀă mâu kong pơlê Việt Nam pơtối mơdêk tơrŭm cheăng 'na khoa hok - kŏng ngê̆, on tơhrik. Pêi chiâk deăng xúa kŏng ngê̆ rơxông nếo, hngêi trăng troăng klông, logistic, ki má lối cho troăng rơxế lơtreng, pêi pro rơdêi tơrŭm cheăng hnê mơjiâng mơngế ki rơkê, khôi túa lĕm tro, ôm hyô.  

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế péa kong pơlê rĕng môi tuăn mâu tơdroăng tơrŭm cheăng, mơdêk 'no liăn cheăng pơla péa kong pơlê, chiâng tơdroăng tơrŭm ki má môi pơla mâu kong pơlê péa tơnêi têa.