A hneăng hôp, kuăn pơlê mâu bêng Sông Cầu, Xuân Đài ƀă cheăm Xuân Thọ pâ thế kong pơlê Dak Lak rĕng tah lôi pá puât a mâu tơdroăng tơkêa bro ton xŏn, 'no liăn mơjiâng tơmeăm khoăng hbrâ ví xía vâ kong prâi pro ôh tá tơniăn tơnêi tơhnâp kĭng têa kơxĭ, tơleăng mơnhên ki u ối a tơdroăng tơkêa bro kơphô̆ Sông Cầu ƀă pơkâ tíu chiâ xo prêi kum tơdroăng kal vâ mơjiâng pro a tíu.

Mơgêi hneăng hôp trâm mâ kuăn pơlê, pôa Nguyễn Thanh Nghị tơmâng xo mâu rơkong pâ thế dêi kuăn pơlê, pơkâ thế khu râ kăn pơkuâ ƀă kơ koan cheăng kong pơlê Dak Lak klâ xoăng, tơleăng mơnhên klêi mâu tơdroăng ối tung hnoăng pơkuâ. Tơdrêng amê, tối nhên vâ mơnhông tơmeăm ki ai hlâu, ki pơxúa, kong pơlê Dak Lak kal rĕng pêi klêi tơdroăng pơkâ pêi cheăng a râ cheăm, bêng, pro xiâm vâ tơbleăng pêi mâu hnoăng cheăng mơnhông cheăng kâ - rêh ối.