Hâi lơ 12/10, Đô̆i K52, Khu xiâm pơkuâ ngăn lêng kong pơlê Gia Lai tơrŭm ƀă khu râ pơkuâ cheăng bêng An Nhơn Bắc hiăng tơkŭm tơ'nôm môi to kơxêng kiâ mố đô̆i a tôh kơphô̆ Lộc Thuận. Tiah mê, tung pơla tí tăng, Đô̆i K52 hiăng tơkŭm châ tâi tâng 3 to kơxêng kiâ mố đô̆i rơtế ƀă mâu tơmeăm môi tiah vŏng mố đô̆i, kơdjiăn ếo, kơtong tâ liăn ƀă kéa, um hiăng tơklo, hlá mơ-éa chêh, loăng chêh, hdrui xâk, on drêi hmốu ƀă răng đăi liên.

Nôkố Đô̆i K52 tơrŭm ƀă mâu khu râ kăn pơkuâ cheăm pơtối séa ngăn, tí tăng a mâu tíu ki tơviah, rak tơniăn tơdroăng tí tăng, tơkŭm châ pêi pro krâu kơhnâ khât, ôh tá lôi kơxêng kiâ mố đô̆i.