Lối 120 km cho troăng prôk ngoh Vũ Thế Lực rơtế ƀă khu kuăn pơlê pêi chiâk deăng a cheăm Ea Ning, kong pơlê Dak Lak, tơkâ luâ vâ troh a kơdrum hdrê dêi pôa Lê Tùng Linh a cheăm Trường Xuân, kong pơlê Lâm Đồng. Vâi vâ mơnhên xiâm kối hdrê tiu hdrối vâ 'no liăn roê vâ pêt. Ƀă mơngế ki pêt tiu môi tiah ngoh Lực, rah xo ôh tá tro hdrê môi tiah ƀă tơdroăng ki hía tâi hên hơnăm pêi cheăng, thế vêh pơxiâm nếo môi hneăng pêi cheăng ki nếo.

“Tí tăng 'nâi plĕng ing măng mê hên 'nâng la rôe hdrê mê lăm tăng 'nâi plĕng troh xiâm, troh a kơdrum ki apoăng ăm ga tơtro khât. Hngêi mơ'no liăn cheăng môi tiah ngin mê xâu má môi cho mơ'no liăn rôe hdrê, pêt kơxái tiu 2-3 hơnăm, drêng ai plâi nếo 'nâi ôh tá xê hdrê tiu Tùng Linh, mê cho hdrê ki pơklep, drêng mê ah ôh tá ai hâi khế pêi pro xếo”.

Tơdroăng tô tuăn hmâ hlo hdrê ôh tá xê khât dêi ngoh Lực cho tơdroăng tô tuăn tơdjuôm dêi hrĭng rơtuh ngế kuăn pơlê a Tây Nguyên, ƀă xuân cho tơdroăng ki pôa Lê Tùng Linh tô tuăn tung tơdroăng mơnhông hdrê tiu inâi tơná.

Hơnăm 2014, drêng rak ngăn kơdrum tiu dêi rơpŏng hngêi, pôa châ hlo môi xiâm tiu ki ai tơdroăng ki xông kân phá tơ-ê. Pôa hiăng mơdoh hên hơnăm séa ngăn, rah xo ƀă mơdâ pro hdrê. Troh hơnăm 2021, hdrê tiu Tùng Linh châ mơ'no tê a kơchơ. Hdrê tiu kố ai rêi xông rơdêi, loăng kân lĕm, kâi trâng ƀă pơreăng. Sap ing xiâm ki apoăng, pôa chôa 'lâng mơjiâng kơdrum pêt hdrê, nôkố ai dâng 8.000 xiâm tiu vâ mơdâ pro hdrê.

Hơnăm 2023, kơxái tiu Tùng Linh châ mơnhên cho kơxái tiu ki apoăng; hơnăm 2025, kơdrum loăng châ mơnhên cho kơdrum loăng ki apoăng, ai ivá mơ'no tê dâng 700.000 kông hdrê rêm hơnăm. Tiu hdrê Tùng Linh xuân châ Khu xiâm ngăn Khoa hok ƀă Kŏng ngê̆ hbru ăm hlá mơ-éa mơnhên inâi.

Ƀă pôa Linh, mơnhông châ hdrê tiu ki nếo cho môi tơdroăng châ tơƀrê, la djâ hdrê tro xiâm kối troh a kŏng mơngế ki pêt nếo cho tơdroăng ki tơmâng ngăn khât. Xua tâng roê tro hdrê ki ôh tá xê khât, kuăn pơlê ôh tá xê to tro lŭp liăn ngân mê ối tro lŭp hâi khế ƀă rôh ki vâ pêi cheăng. Châ pơ-ô pơ-eăng cho Kuăn pơlê pêi chiâk deăng Việt Nam rơkê má môi 40 hơnăm Pơ'lêh nếo, pôa Linh xuân ối tô tuăn tơdroăng ki hdrê ôh tá xê khât ƀă pói vâ mâu kơ koan ki ai tơdjâk troh rơtế veăng pêi pro vâ kring vế kuăn pơlê ki pêi chiâk deăng.

“Châ rah xo cho ngế kuăn pơlê pêi chiâk rơkê mê hâk mơnê khât. Á rơhêng vâ tiah kố, kơ koan ai hnoăng pơkuâ, veăng tơdjuôm ivá tơrŭm pro tiah lâi tah lôi tơdroăng hdrê tiu ki hêak ôh tá ai khât ki tê mơdró tung kơchơ. Vâ ăm mâu hdrê ki khât troh ƀă vâi krâ nhŏng o tơná, tâng roê roê hdrê ki ôh tá xê khât mê gá chiâng pá ăm kuăn pơlê”.

Pôa Nguyễn Văn Anh, Kăn hnê ngăn kuăn pơlê pêi chiâk deăng cheăm Trường Xuân, kong pơlê Lâm Đồng, ăm 'nâi hdrê tiu Tùng Linh kơxái xông rơdêi, kâi trâng ƀă pơreăng ƀă ai plâi kơtốu hên:

“Ngin ro khât drêng ngoh Linh cho môi tung 96 ngế kuăn pơlê pêi chiâk dêi Việt Nam hơnăm 2026. Ngoh Linh ôh tá xê to ngế ki ‘nâi, pêt hên, tê rơdâ hdrê tiu ai hên tơdroăng ki lĕm tro ƀă hyôh kong prâi tơnêi tơníu a Tây Nguyên tối tơdjuôm ƀă a hên kong pơlê ki ê tối krê. Ngoh Linh xuân ai hên ivá veăng gum ăm tơdroăng cheăng pơlê pơla, tơdroăng cheăng tŏng gum a kong pơlê”.

Ing môi xiâm tiu ki tơviah tung kơdrum hngêi, pôa Lê Tùng Linh hiăng kơhnâ tí tăng 'nâi plĕng, mơnhông chiâng hdrê tiu dó inâi dêi tơná, po tơ'nôm rôh ăm mơngế pêt tiu. La ki pơxúa dêi mơngế pêi chiâk deăng rơkê ôh tá xê to ối tung tơdroăng cheăng kâ, mê ối a hnoăng cheăng ƀă pơlê pơla.