Lăm ngăn tíu ki mơjiâng pro Tơdroăng tơkêa bro Hno têa kân Tham Lương - Bến Cát - Rạch Nước Lên, Ngế pro xiâm hnê ngăn tơnêi têa tối nhên, kố cho troăng ki mơ'no têa ƀă troăng prôk ki xiâm xŏn 64km, pơkâ thế mâu khu ki mơjiâng pro thế tăng hên kơmăi kơmok, rơxế, mơngế pêi cheăng, tơkŭm pêi drêng kong prâi tơ'lêi hlâu vâ kêi đeăng tơdroăng tơkêa bro.

Lăm ngăn Tíu mơ jiâng pro tíu ôh tá ăm têa châ lân lu kơpong Pơlê kong kân Hồ Chí Minh ai ngăn troh tơdroăng ki pơ ‘lêh hyôh kong prâi (pơla rôh má 1) a kơpong thông cho mơ’no têa Tân Thuận, troăng Trương Đình Hợi, bêng Xóm Chiếu. Pôa Lê Minh Hưng, Ngế pro xiâm hnê ngăn tơnêi têa pơkâ thế rêm pâ ki tơdjâk troh mơdêk tuăn mơ-eăm pôu râng hnoăng cheăng, thâ pê klêi mâu tơdroăng ki ối tơvâ tơvân, ví pro mơhrê liăn ngân 'no mơjiâng tơmeăm khoăng dêi Tơnêi têa ƀă pơlê pơla.

Ngế pro xiâm hnê ngăn tơnêi têa pơkâ thế. Vi ƀan Pơlê kong kân Hồ Chí Minh tơrŭm nhên tơniăn, môi tuăn troăng hơlâ liăn ngân ƀă troăng hơlâ pơkâ vâ rĕng châ xúa thông cho mơ’no têa Tân Thuận tối krê ƀă tâi tâng tơdroăng tơkêa bro mơdât têa lu tối tơdjuôm, kum ăm tơdroăng rêh ối pơlê pơla.