Dak Lak ai pơxúa ‘na tơnêi, tơmeăm pêi lo ing chiâk deăng ƀă tíu ối tơdjêp Tây Nguyên ƀă Peăng hdroh tơdế Tơnêi têa. Laga, vâ mơdêk ivá tơxup, kong pơlê kal pơhlêh sap ing mơnhông ngăn tung mâu kế tơmeăm chiâng mơnhông ngăn tung tuăn ngoâ rơkê, kong ngê̆ ƀă ki kơnâ dêi thăm mơdêk.

A rôh hôp, mâu kăn mơhno môi tung mâu tơdroăng ki tá hâi pêi tơƀrê kân cho tơdjêp pơla hriăn plĕng khoa hok ƀă tơdroăng púi rơhêng vâ tiô tơdroăng ki ai khât tá hâi tơniăn. Hên tơdroăng ki tơƀrê klêi hriăn plĕng tá hâi xúa tung tơdroăng ki ai khât tung mơjiâng pro, tung pơla khu mơdró kâ, khu pêi cheăng tơrŭm ối pá châ trâm mâu khu ki rơkê plĕng ƀă ‘na kong ngê̆ tơtro.

Mâu túa tơmiât pêi pơxiâm pêi cheăng xuân trâm pá ‘na tơnêi tơníu mơnhông ƀă kơxô̆ liăn tŏng gum. Vâ pro kơdroh kơtăn pơla hriăn plĕng ƀă ki ai khât, mâu khu ki rơkê plĕng vâ mơ’no tê mơdêk rơdêi tơrŭm Tơnêi têa – hngêi trung – khu mơdró kâ, mơdêk hnoăng cheăng tơdjêp dêi mâu khu tơrŭm ối a dế, mơdêk hnê tối ƀă tê mơdró klêi kơ’nâi hriăn plĕng, malối cho tung mâu kơvâ cheăng ki xiâm môi tiah kơphế, tiu, sầu riêng.