Tơdroăng Khu pơkuâ hnê ngăn cheăng Đảng mơjiâng Khu kăn séa ngăn vâ tối mơnhên tro tơdrăng tơdroăng tơbleăng pêi pro hlá mơ-éa Pơkâ kơxô̆ 71, tơdroăng kal 'na hnê hriâm phôh thong, tung mê, tơkŭm mơnhên 4 tơdroăng ki kân, mê cho: Tơdroăng hnê hriâm phôh thong; Hlá mơ-éa hriâm; Tơmeăm khoăng, kơƀăng tăng hngêi trung ƀă Tơdroăng tơkŭm tăng khu pêi cheăng, khu thái cô hnê.

Xông tơpui a hneăng hôp, pôa Trịnh Văn Quyết, ngế pơkuâ hnê mơhnhôk cheăng kal kí tơnêi têa, Ngế pơkuâ khu kăn séa ngăn pơkâ thế tung pơla séa ngăn thế "tối tơdrăng, tối khât, tối tro", pêi troh tui lui, xua "rêm kơxop hlá mơ-éa hriâm, rêm lâm hriâm, rêm ngế thái cô pơrá tơdjâk troh tơdroăng tung la ngiâ dêi chât rơtuh ngế hok tro ƀă tơdroăng loi tơngah dêi chât rơtuh rơpŏng hngêi".

Ing mê, veăng kum djâ tơdroăng hnê hriâm phôh thong rak vế pêi pro tro luât, tơniăn, mơdêk ki rơkê păng 'nâng, chiâng tơdroăng ki xiâm vâ mơnhông rĕng ƀă krá tơniăn dêi tơnêi têa.