Pôa Vương Hải Bằng, Kăn cheăng tung Khu pơkuâ hnê ngăn Đảng kong pơlê Thiểm Tây, Kăn pơkuâ hnê ngăn Đảng pơlê kong kơdrâm Diên An mơnhên hneăng lăm pôu dêi Kăn xiâm hnê ngăn Kuô̆k hô̆i cho rôh ki tơ'lêi hlâu vâ mơdêk tâ nếo tơrŭm cheăng pơla mâu kong pơlê Việt Nam ƀă pơlê kong kơdrâm Diên An.

Khĕn kơdeăn mâu tơdroăng châ tơƀrê mơnhông mơdêk dêi pơlê kong kơdrâm Diên An xuân môi tiah tơdroăng mơ-eăm dêi pơlê kong kơdrâm tung tơdroăng rak vế mâu "tíu chôu 'măn tơmeăm khoăng ton nah", Kăn xiâm hnê ngăn Kuô̆k hô̆i Trần Thanh Mẫn rơkâu pơlê kong kơdrâm Diên An pơtối mơnhông mơdêk ƀă pơkâ thế Diên An rơtế mâu kong pơlê Việt Nam thăm tơdjêp, mơdêk tâ nếo trâm mâ tơpui tơno pơla kuăn pơlê; thăm tơrŭm ôm hyô, malối cho "tơdroăng ôm hyô ton nah" tiô hvêa chêng mâu ngế kăch măng hdrối nah péa tơnêi têa; tơrŭm rak vế ƀă mơnhông mâu tơmeăm khoăng ton nah, khôi túa lĕm tro, mơdêk trâm mâ pơla kuăn pơlê.