Tung 9 khế dêi hơnăm 2026, tơdroăng cheăng kâ a mâu cheăm, bêng kĭng têa kơxĭ dêi Dak Lak pơtối tơniăn; tê mơdró, tơdroăng tê mơdró môi tơdroăng, ôm hyô ƀă tơnăng, păn ká xi xŏng ai pơ'lêh tơƀrê. Ai 09/15 to cheăm, bêng pêi klêi, tơkâ hluâ pơkâ xo hnoăng liăn ngân hơnăm 2026. Ai 06 to cheăm, bêng hrá mơ'no liăn cheăng tơnêi têa. Tung mê, cheăm Tuy An Đông mơ'no liăn cheăng tơnêi têa 0%, cheăm Xuân Cảnh vâ chê 30%, Xuân Lộc lối 56.5% ƀă bêng Sông Cầu vâ chê 57%.

Laga, pêi chiâk deăng, kơmăi kơmok, mơjiâng pro hngêi trăng, rak ngăn tơnêi tơníu, mơjiâng pro, mơ'no liăn cheăng ối hên tơdroăng pá puât. Tơdroăng rah xo bro lế lĕm, tơpui ƀă pêi pro tơmeăm khoăng tơnêi têa mâu kong pơlê ối trâm hên tơvâ tơvân. Tơdroăng ôh tá tŭm kăn ƀô̆ rơkê, tơmeăm khoăng kŏng ngê̆ thong tin tá hâi tơdâng tơ'mô, dế tơdjâk troh ki dâi lĕm, tơdroăng pêi cheăng, malối tung mâu kơvâ tơnêi tơníu, pơkâ hdró, mơjiâng pro, liăn ngân, mơ'no liăn cheăng ƀă kŏng ngê̆ thong tin.

Tung 03 khế mơ’nui hơnăm, kơxô̆ hnoăng cheăng ki u ối hên, ki má lối cho mơ’no liăn ăm mung mâu kơxô̆ liăn, pêi kêi đeăng mâu tơmeăm khoăng, tơdroăng tơkêa bro. Drêng rơnó 4 tung hơnăm xuân cho rơnó kong mêi mơhot, kô tơdjâk troh tơdroăng pêi pro, xua mê tâng ôh tá ai tơdroăng pêi pro tơtro mê pá vâ châ mâu pơkâ tơtêk.

A roh hôp tơno tơdroăng kal, mâu kong pơlê tối ăm ‘nâi hiăng mơnhên hnoăng cheăng, troăng pêi tiô rêm khế tung rơnó 4 tung hơnăm ƀă dế pơtối séa ngăn, kêi đeăng tơdroăng pơkâ pêi tơtêk. Pôa Đỗ Hữu Huy, Kăn hnê ngăn Vi ƀan kong pơlê tối, thế tơmâng ngăn mâu cheăm, bêng ai hên tơmeăm ki kơnâ mơjiâng pro kân kal pêi pro thế ai troăng pêi inhên, hrâ hré vâ châ mâu pơkâ tơtêk. Pôa tối ăm ‘nâi kô mơnhên KPI ƀă kăn ƀô̆ ối ako, ki má lối cho Kăn pơkuâ hnê ngăn cheăng Đảng ƀă Kăn hnê ngăn Vi ƀan râ cheăm.

“Vâ tơniăn kêi đeăng 10 pơkâ tơtêk dêi rơnó 4 tung hơnăm, rêm cheăm, bêng thế séa ngăn rêm pơkâ ƀă pơcháu tơdroăng cheăng ăm rêm kăn ƀô̆, chêh nhên hâi khế kêi đeăng rêm tơdroăng cheăng. Khu pơkuâ tơdroăng cheăng xo ‘noăng chư chêh 10 túa pơkâ kố ƀă mâu pơkâ ki ê vâ tơkŭm tâi tâng, tơbleăng Kăn hnê ngăn Vi ƀan kong pơlê kĭ tơbleăng tơdroăng vâ pêi KPI rơnó 4 dêi mâu kăn hnê ngăn Vi ƀan mâu cheăm, bêng’’.

Drêng ai tơdroăng kong mêi mơhot mâu khế mơ’nui hơnăm 2026, mâu cheăm, bêng kĭng têa kơxĭ Dak Lak hiăng pêi kêi đeăng tâi tâng khu pêi cheăng amê ƀă séa ngăn kơpong ki tơ’lêi tơdjâk râ vâ troăng xĕn kuăn pơlê ing rĕng. Mâu cheăm, bêng xuân pơkâ troăng pêi tơniăn kơpong păn ká xi xŏng a têa kơxĭ ƀă kĭng têa kơxĭ; tơniăn ăm plong tuk prôk lăm.

Kăn pơkuâ kong pơlê Dak Lak pơkâ mâu cheăm, bêng thế pro tơdrêng troăng pêi inhên, tối nhên tơdroăng rêm rơpŏng kô chiâng xĕn xua kong prâi pro ôh tá tơniăn, rơxế ki xĕn ƀă tíu tơdah xĕn, khŏm ôh tá ăm ai tơdroăng ôh tá ‘nâi pro ti lâi drêng trâm, kơdrâ.