https://vov.vn/xa-hoi/vov-tay-nguyen-tuyen-dung-3-vien-chuc-lam-viec-tai-dak-lak-post1341425.vov

Rah mơngế pêi cheăng mê cho: 1 ngế kơnốu pêi cheăng tơplôu pơchuât nâl Rơđế; 1 ngế kơdrâi tơplôu, pơchuât nâl Jarai; ƀă 1 ngế chêh hlá tơbeăng.

‘Na pơkâ rah xo, ngế ki rah xo mê athế ai tŭm tơdroăng pơkâ tơdjuôm tiô pơkâ, tung mê ai Kuôk tĭch Việt Nam, tơdroăng rêh ối hrâ lĕm, ai ihiâm mơno kal kí, ihiâm mơno lĕm, ai tŭm ivá ƀă ai tŭm ƀâng hriâm, chưng chih tơtro ƀă tíu pêi cheăng.

Ƀă rah mơngế pêi cheăng tơplôu, rah chêh, tơpui nâl Rơđế, nâl Jarai, ngế ki vâ châ rah xo mê thế mơgêi râ đăi hok tơngi klêng; chiâng pơchuât, chiâng chêh nâl hdrông kuăn ngo, ai rơkong pơchuât lĕm ƀă chiâng tơpui nâl Xuăn. Ngế ki châ rah xo chiâng chêh văn, chêh hlá tơbeăng ƀă xúa mâu kơmăi tĭnh tŏng gum tung tơdroăng pêi cheăng tơbleăng tung internet măng pơlê pơla châ kơjo.

Ƀă ngế chêh hlá tơbeăng, ngế chêh thế mơgêi râ đăi hok tơngi klêng, ai rơkong pơchuât lĕm, chiâng chêh văn, chêh hlá tơbeăng ƀă tơxâng pơkâ ‘na xúa kŏng ngê̆ thŏng tin. Mâu ngế ki tơbleăng rah xo mê hiăng pêi cheăng 1 hơnăm tơngi klêng kơvâ hlá tơbeăng, tơplôu, rah chêh lơ chêh tơdroăng tơpui tung rơ’jíu, um tơvi, tung troăng hyôh măng châ kơjo.

Troăng rah xo mê cho: tơ’noăng rah xo, séa ngăn hô sơ rah xo.

Hâi khế tơdah hô sơ tung chôu pêi cheăng sap ing Hâi môi troh hâi Pơtăm, pơxiâm sap hâi lơ 15/10 troh tâi hâi lơ 30/10/2026. Ngế ki kĭ nâp phĭu kĭ veăng tơ’noăng tiô mâuh nếo má môi a Ƀơrô Hành chính - Tổng hợp, Cơ quan thường trú khu vực Tây Nguyên – Đài Tiếng nói Việt Nam, kơxô̆ 19A Lê Duẩn, bêng Buôn Ma Thuột, kong pơlê Dak Lak.

Kơxô̆ liăn nâp hô sơ vâ rah xo cho 500.000 liăn/môi ngế. Ngế ki veăng rah xo ôh tá nâp tơ’nôm liăn ki klâi pakĭng kơxô̆ liăn kố. Kơxô̆ liăn ôh tá mơdrếo ôh tâng ôh tá châ rah xo.

Vâ ‘nâi tơdroăng inhên mê krếo phôn a pôa Nguyễn Hữu Hùng, Kăn pơkuâ ƀơrô Hành chính - Tổng hợp, kơxô̆ phôn: 0905.044.466