Tơdroăng Droh rơtăm pleăng dêi hnoăng a rơnó pơtê hriâm hơnăm 2026 a Dak Lak tơ’mot lối 130.000 ngế đoàn viên, droh rơtăm veăng, ƀă vâ chê 4.000 tơdroăng cheăng tŏng gum rêh ối pơlê pơla. Mâu khu ki pêi cheăng a Rơnó pơtê hriâm pêi 144 to tơmeăm, xoăng cheăng ƀă kơxô̆ liăn ‘no vâ chê 2 rơtal liăn. Cheăng tŏng gum mâu phô̆m vâ xông kân châ tơbleăng pêi ƀă 318 to lâm hnê klê tê kơtê ƀă vâ chê 5.000 hnoăng liăn hriâm rơkê ăm mâu hok tro xơpá.

Tâi tâng 102 to cheăm, bêng tung kong pơlê pơrá pơtroh khu ki hnê ‘na Bình dân học vụ số, gum mơdêk ivá cheăng ‘na xúa kong ngê̆ kơxô̆, pơhlêh chêh pro hlá mơ-éa ƀă pơtroh xo liăn ôh tá ƀă liăn mâ xếo ăm lối 145.000 ngế mâu phô̆m vâ xông kân, vâi hdrêng, kuăn pơlê.

Klêi kơ’nâi rôh pêi cheăng a rơnó pơtê hriâm, tơdroăng tŏng gum kuăn pơlê xúa kong ngê̆ kơxô̆ pơtối châ mơdêk rơdêi tung Tơdroăng cheăng pêi 44 hâi măng  “Droh rơtăm Dak Lak djâ troăng ahdrối tung pơhlêh xúa kong ngê̆ kơxô̆”. Mâu khu ki hnê hiăng gum pêi pro lối 64.700 hồ sơ ki pơtroh ing troăng hyôh internet, hnê ăm lối 27.200 rơpŏng tê mơdró, khu tê mơdró xúa liăn pơtroh xo ing QR lơ tíu tê tơmeăm ing troăng hyôh internet.

Tiô ngoh Y Lê Pas Tơr, Phŏ pơkuâ ngăn Đoân Droh rơtăm kong pơlê, Kăn hnê ngăn Khu ngăn Droh rơtăm Việt Nam kong pơlê Dak Lak, mâu khu dế tơtrŏng hnê vâ klêi kơ’nâi châ gum, kuăn pơlê chiâng vâ pêi xêh tung kơmăi kơmok kơxô̆.

“Klêi kơ’nâi mâu tơdroăng cheăng pêi pro a rơnó pơtê hriâm mê ngin hiăng lôi ăm mâu vâi pú pơtối pêi cheăng, sap ing klêi kơ’nâi “rơnó pơtê hriâm hnê xúa internet” pơhlêh chiâng tơdroăng cheăng 44 hâi măng mê vâi pơtối tơdjêp mâu tơdroăng cheăng dêi tơná. Ngin xuân hnê mơhno klêi kơ’nâi mâu rôh pêi pro ki kân kố mê ôh tá xê hnoăng cheăng dêi á hiăng mơgêi hnoăng cheăng tŏng gum a cheăm bêng, a tíu pêi cheăng, malối cho tơdjâk troh pơhlêh xúa kong ngê̆ cho hnoăng cheăng pêi đi đo ƀă athế tro ƀă mâu hnoăng cheăng, mâu tơdroăng hnê mơhno dêi râ Đảng ƀă kăn pơkuâ cheăm bêng nếo”.