A Kơpong cheăng kâ Vân Phong, mâu tơdroăng tơkêa bro nếo tung kơvâ cheăng kơmăi kơmok tŏng kum dế po tơ'nôm tíu ăm tơdroăng mơjiâng pro. Pakĭng Hngêi kơmăi pro tuk HD Hyundai Việt Nam, akố dế  pêi pro  Tơdroăng tơkêa bro Hngêi kơmăi mơjiâng tơmeăm tung tuk dêi Miboo Vina, kơxô̆ liăn 'no 528 rơtal liăn, châ tơngah tơ'nôm ivá ăm kơvâ pro tuk. Pôa Nguyễn Văn Trãi, Kăn pơkuâ Miboo Vina, tối ăm 'nâi:

“Ki xiâm cho tơdroăng pêi cheăng lăp răp, uâ bro, pôa hâng meăm cho ki xiâm xuân cho kih sư Việt Nam, mâu ngế ki pơkuâ pêi cheăng xuân hên cho mơngế Việt Nam. Nôkố pin pêi cheăng xuân lĕm 'nâng. Môi khu kế tơmeăm ki hiăng klêi mơjiâng pro a pá gong, teăng ăm hdrối nah vâi pro tâi tâng tung hngêi kơmăi Hyundai. Nôkố ivá cheăng dêi vâi ôh tá bê, ngin djâ kế tơmeăm mot vâ vâi tơkŭm pro rĕng tâ, mơdêk kơxô̆ tuk tung môi hơnăm’’.

Rơtế ƀă mơjiâng, kơmăi kơmok, ôm hyô pơtối cho ivá ki kân dêi tơtêk. 9 khế, Khánh Hòa tơdah lối 20,4 rơtuh ngế tơmối, tơmối lâp plâi tơnêi lối 7,1 rơtuh ngế; pêi lo liăn vâ chê 68.000 rơtal liăn, tâk 21%. Festival Têa kơxĭ Khánh Hòa 2026, Hâi mơdĭng Mơhno túa lĕm tro hdroâng kuăn ngo Chăm roh má VI ƀă Miss World 2026 pro mâu tơdroăng ki má môi, veăng mơđah tơbleăng um méa, mơhno túa lĕm tro ƀă tơmeăm ôm hyô dêi kong pơlê.

Ôm hyô mơnhông 2 kơxô̆ hnối toi mơnhông tơdroăng tê mơdró, rơxế pơto, tê mơdró dêi mâu kong pơlê. Jâ Thái Thị Lệ Hằng, Kăn pơkuâ Khu ngăn Túa lĕm tro, Tơ'noăng ivá ƀă Ôm hyô kong pơlê Khánh Hòa, ăm 'nâi, kơvâ ôm hyô ối pơtối rak hnoăng cheăng ki apoăng cheăng kâ dêi Khánh Hòa tung mâu khế la ngiâ:

“Pói tơngah la ngiâ ah kô châ tơdah môi khu tơmối kong têa Sinuâ cho hên, pơtối ai mâu khu tơmối ki ê ing mâu kong têa ki ê; kơchơ tê mơdró tung tơnêi têa xuân châ tơmâng khât. Khu kô pơtối tí tăng mâu khu tơrŭm cheăng vâ tơkŭm po tơ'nôm hên tơdroăng, hên tơdroăng cheăng vâ mơhnhôk tơmối ôm hyô, tung mê xuân ối tơmâng khât troh khôi túa lĕm tro cho ki xiâm dêi cheăng kâ ôm hyô, mơnhông tơ'nôm hên tơmeăm ôm hyô ki má môi ‘’.

'Na mâu tơdroăng ki tá hâi pêi pro klêi, kơlo tâk 8,7% dêi kơvâ cheăng kơmăi kơmok cho iâ tâ tơdroăng pơkâ mơ'no. Kơxô̆ liăn logistics, tơdroăng ki ôh tá tơniăn dêi kơchơ mơdró lâp plâi tơnêi ƀă pơkâ mơ'no on tơhrik pơtối pro pá ăm tơdroăng pêi cheăng kơmăi kơmok dêi kong pơlê. Vâ hmâ ƀă tơdroăng ki nếo, mâu khu mơdró pâ thế ai troăng hơlâ tŏng kum kơmăi kơmok uâ pơliê, mơjiâng pro ai pơxúa hên, mơnhông kơmăi kơmok tŏng kum ƀă tah ki xơpá ăm mâu kơvâ cheăng ki mơnhông mơdêk hrá.

Jâ Trịnh Thị Hồng Vân, Kăn hnê ngăn Hô̆i đong khu tơrŭm cheăng Kŏng ti Yến sào Khánh Hòa tối ăm 'nâi, mơhé púi vâ ai troăng hơlâ tŏng kum pêi cheăng, khu mơdró kâ xuân ngăn tơdroăng mơ-eăm dêi tơná cho ki xiâm:

“Tung pơla kong pơlê dế xơpá tiah kố, 'na kơxô̆ cheăng kơmăi kơmok, kŏng ti xuân kô mơ-eăm vâ ai ivá tâk dâng 30/35%, ƀă kô mơ-eăm pêi pro tơdroăng pơkâ kố ‘’.

Tiô pôa Nguyễn Việt Hùng, Kăn hnê ngăn Vi ƀan kong pơlê Khánh Hòa, tơdroăng tơtêk dêi kong pơlê ối a kơlo tơngah. Troh nôkố, kong pơlê nếo mơ'no liăn cheăng tơnêi têa châ 70%, tơleăng châ 106/257 tơdroăng tơkêa bro trâm pá. Tâng mơ'no 100% ƀă tơleăng tơ'nôm tơdroăng tơkêa bro, Khánh Hòa kô rak vế tơdroăng tơtêk lối 11% dêi 9 khế. Pôa Nguyễn Việt Hùng tối tiah kố, tơdroăng tơtêk hên 'nâng, la tơdroăng tơtêk dế kơnôm ivá pêi pro dêi khu cheăng kal kí:

“Hên tơdroăng tơkêa bro ki xiâm ki Tíu xiâm tơnêi têa dế tơmâng ngăn, ki kal cho pin ai pơhlêh tơdroăng kố há lơ ôh? Hnoăng cheăng dêi pin cho mơgrúa tơnêi tơníu, kố cho ki xiâm vâ tơdroăng tơkêa bro chiâng ai khât tiô pơkâ. Tơdroăng tơkêa bro 'no liăn cheăng cho pin mơdêk, la mơdêk ki xiâm cho ing ivá pêi cheăng. Ki pá mê nhŏng o pin rơtế tơkâ luâ.‘’

Tơdroăng châ tơƀrê 9 khế hiăng pro xiâm kối vâ Khánh Hòa pêi klêi tơdroăng pơkâ mơdêk 2 kơxô̆ hơnăm 2026. Ƀai toăn peăng hdrối cho pơhlêh kơxô̆ liăn 'no pêi cheăng, pêi lo kế tơmeăm, ôm hyô ƀă ki pơxúa Vân Phong chiâng ivá mơdêk ki khât, krá tơniăn.