Tiô rơkong krếo thế dêi Pơtáu kong têa Đan Mạch – pôa Frederik X ƀă kơdrâi Pơtáu, klêi mê, pôa António Costa, Kăn xiâm hnê ngăn Hô̆i đong Châu Âu ƀă pôa Bart De Wever, Ngế pro xiâm hnê ngăn kong têa Ƀih, kơxo kố (19/10), pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế ƀă kơdrâi pôa ƀă khu râ kăn xiâm Việt Nam lo lăm pôu râ Tơnêi têa kong têa Đan Mạch, lăm pôu păng 'nâng Khu tơrŭm châu Âu (EU) ƀă kong têa Ƀih sap hâi lơ 19 -24/ 10 hơnăm 2026.

Hneăng lăm pôu râ Tơnêi têa troh a kong têa Đan Mạch dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa cho tơdroăng ki kal tung tơrŭm cheăng péa tơnêi têa, mơhno tơdroăng tơmiât pêi la ngiâ, khŏm mơ-eăm rak cheăng kal kí ƀă tơdroăng loi tơngah pơla kăn pơkuâ péa tơnêi têa, tơdrêng amê, pro ivá nếo ăm tơrŭm cheăng Việt Nam-Đan Mạch tâk troh a râ ki nếo.

Ƀă EU, rôh lăm pôu cho rôh vâ péa pâ pro trâu hơngế tâ nếo mâu tơdroăng tơrŭm cheăng ki kal, ki má lối cho 'na tê mơdró, 'no liăn cheăng, khoa hok - kŏng ngê̆, hnê mơjiâng mơngế pêi cheăng, ing mê mơjiâng tơrŭm cheăng Việt Nam-EU chiâng um méa tung tơdroăng tơrŭm cheăng ASEAN-EU.

Ƀă Ƀih, rôh lăm pôu vâ péa pâ pro tơdroăng ki hơ'lêh ki kal 'na tơrŭm cheăng tung mâu kơvâ cheăng Ƀih ai ivá rơdêi ƀă Việt Nam dế tơkŭm tŏng kum môi tiah khoa hok - kŏng ngê̆, kế ki chiâng hrik mơ’no hyôh măng, on tơhrik ki vêh pro, pêi chiâk deăng krúa ƀă pơhlêh nếo tơmiât pêi rơkê, logistics ƀă kơno tuk rơkê.