Dak Lak nôkố ai 667 long hoăng têa, tung mê peăng mâ hâi Lu ai 253 long, peăng mâ hâi Lo ai 414 to long. A peăng mâ hâi lu, bú ai 130 to long châ kơlo têa tâk tiô hmâ, châ 51%, iâ tâ kơlo 63% dêi rơnó kô hơnăm hdrối. A peăng mâ hâi lo, kơdó têa a mâu long tâk 70% troh 100% tiô pơkâ vê hdró dêi long. Kơnhŏng têa a mâu kroăng Srêpok,  kroăng Pa, kroăng Kỳ Lộ  ƀă hên têa kroăng ki ê xuân a kơlo iâ tâ lơ hên vâ chê dâ dâng tung hên hơnăm.

Jâ Đặng Thị Thủy, Phŏ pơkuâ ngăn chiâk deăng ƀă Hyôh kong prâi Dak Lak, ăm ‘nâi El Niño kô pro kong tô mơdrăng, ôh tá ai têa tâk ó tung rơnó tô mơdrăng 2026-2027. Têa mêi hơnăm kố tối hdrối iâ tâ lối tơdâng tung hên hơnăm sap 20-40%. Peăng mâ hâi lo mơni kô ôh tá ai tê ăm 2.500 ha báu rơnó xeăng tôu ƀă 40.000 ha báu rơnó rơxăm; peăng mâ hâi Lu kô tro tơdjâk sap 68.000 troh 100.000 ha loăng plâi, dâng 42.000 rơpŏng kuăn pơlê kô ôh tá ai têa vâ xúa.

Kơvâ ngăn ‘na chiâk deăng tối hdrối thế pơ’lêh hâi khế mơdâ pêt báu ngăn tiô kơnhŏng têa ƀă rah xo hdrê ki tơtro vâ mơdâ. Jâ Đặng Thị Thủy tối mâu troăng hơlâ pêi.

“Tiô pơkâ rêm hơnăm, sap hâi lơ 20/12/2026 troh hâi lơ 10/01/2027 cho hâi khế mơdâ hdrê báu ki troh dêi rơnó Xeăng tôu. Tâng kong tô, kuăn pơlê kal thế pro hrá tâ hâi khế mơdâ vâ ví tro lŭp hên. Mâu kơpong ôh tá khăng khoăng, kô chiâng vâ hbrâ têa toh mê kuăn pơlê thế mơdâ pêt rĕng tâ tơdroăng hiăng pơkâ hdrối. Pakĭng mê, Khu xiâm ngăn Hnê loăng plâi ƀă ngăn ‘na pơkeăng kơdê ôa hdrong dêi kong pơlê tơrŭm ƀă mâu kong pơlê tăng ‘nâi plĕng mâu hdrê báu ki tơtro vâ pơ’lêh hdrê ki ton vâ hbrâ, mơdât tô mơdrăng khăng khoăng”.

Pôa Nguyễn Thiên Văn, Phŏ kăn hnê ngăn Vi ƀan kong pơlê Dak Lak, pơkâ thế mâu khu râ, kơvâ cheăng, kong pơlê pơtối rak ngăn, pêi cheăng tá hâi pơtê; hbrâ kơdĭng têa a mâu rơchôa, kơdroh têa lo xêh. Mâu kong pơlê séa ngăn ƀăng tơnêi pêt loăng plâi, hơ'lêh hâi khế mơdâ pêt, rah hdrê báu ki tơtro; hnê kuăn pơlê tôh têa ‘nâi kơdĭng, kơdĭng têa ƀă thâ 'mâi rơnêu, pro mâu tíu ki hiăng tơ’nhiê a rơchoâ mơ’no têa vâ xúa.

Pakĭng mê, kơjo kum tơmeăm kơdĭng êa ƀă hbrâ troăng hơlâ, mơdât on chếo kong. Tơdrêng amê, tŏng kum tơmeăm hdoăng têa ƀă hbrâ rơnáu tơdroăng hbrâ mơdât on chếo kong. Pôa Nguyễn Thiên Văn tối nhên:

“Pin thế hbrâ rơnáu, teăm hbrâ ví pơkuâ ngăn rơkê tung hbrâ, mơdât xía vâ xua kong tô mơdrăng. Thế kơjo pêi ahdrối tơdroăng mơ'no têa ôu kâ hum roh ăm kuăn pơlê, malối cho kơpong hơngế, hơngo, kơpong hdroâng kuăn ngo. Khu xiâm ngăn 'na Chiâk deăng ƀă Hyôh kong prâi tơrŭm ƀă mâu kong pơlê, khu xiâm, kơvâ cheăng ki ai tơdjâk troh pơtối ngăn nhên kơnhŏng têa, ivá mơ'no têa dêi tơrêm tíu; hbrâ tơ'nôm, pêi klêi mâu túa pơkâ hbrâ ví xía vâ, tơdrêng amê mơjiâng túa pơkâ, túa hbrâ, mơdât on chếo kong’’.