Hâi tơkŭm xah hêi ro mơđah, tơbleăng tơmeăm pơxiâm tăng cheăng pêi, tơdjêp tơmeăm OCOP tơkŭm po a cheăm Phú Thiện, kong pơlê Gia Lai ai 17 tíu chôu ‘măn tơmeăm dêi 10 cheăm, tơbleăng tơmeăm pêi lo ing chiâk deăng, tơmeăm uâ pơliê mơdiê ƀă tơmeăm ki má môi tiô khôi vâi krâ nah. Tâi tâng pơrá djâ tơdroăng ki tơbâ pêi cheăng dêi mơngế vâi kơdrâi ƀă khôi túa lĕm tro ki má môi dêi kơpong tơnêi Gia Lai.

Veăng hâi tơkŭm xah hêi ro, Kâu lăk ƀô̆ teăn ếo pơtâk plơi Amil, cheăm Phú Thiện ai 6 ngê̆ nhân; rế tơbleăng tơbleăng tơmeăm rế mơđah tơbleăng tơdroăng teăn ếo pơtâk tiô khôi vâi krâ nah. Jâ Kpă H’Uyên, Kăn pơkuâ Tôh teăn ếo pơtâk Plơi Amil, cheăm Phú Thiện tối:

“Châ jâ pôa, nôu pâ hnê ing ối kŭn xua mê chôa ‘lâng á hâk vâ tơdroăng cheăng kố. Á pói vâ rak tơdroăng teăn ếo pơtâk ăm rơxông kơ’nâi xua mê rơtế nâ o rế pêi, rế hnê troăng teăn ƀă kŏng. Tơmeăm kêi đeăng, ngin xup um, tơbleăng tung măng pơlê pơla vâ tê. Rêm khế, pêi lo liăn xuân châ dâng 10 rơtuh liăn”.

Ôh tá xê tơdroăng teăn ếo pơtâk, kơchâi kâ tiô khôi vâi krâ nah dêi kuăn pơlê mâu hdrông kuăn ngo xuân dế chiâng troăng mơnhông cheăng kâ dêi vâi kơdrâi a kong pơlê Gia Lai. Nâ Rčom H’Liên, ối a thôn Plei Knông, cheăm Phú Thiện đi đo tơbleăng tung Facebook tơdroăng ki rơkê pế pơchên mâu kơchâi dêi mơngế Jarai môi tiah kơchâi pôm loăng, ká trích pêi ê pin, í pôh kâm ƀă hlá ê. Kơnôm măng pơlê pơla, mâu kơchâi kâ tiah hmâ tung tơdroăng rêh ối pơlê pơla châ hên tơmối achê hơngế ‘nâi troh. Nâ Rčom H’Liên tơbleăng tơmeăm a Hâi tơkŭm xah hêi ro:

"Rơpŏng á hiăng tê mâu kơchâi kâ môi tiah ká trích ê, kơchâi pôm loăng sao, í pôh, kâm sap ing ton nah. Sap ing xúa măng pơlê pơlê, ngin châ pú hmâ ƀă nhŏng o achê hơngế troh rôe gum hên. Kơnôm mê, rơpŏng á ai tơ’nôm pêi lo liăn, tơdrêng amê tơbleăng châ mâu kơchâi kâ ki phá tơ-ê dêi kuăn pơlê hdrông kuăn ngo’’.

Ing mâu tơmeăm djâ hên khôi túa lĕm tro troh mâu troăng pêi tŏng gum tăng cheăng pêi a pơlê, vâi kơdrâi hdrông kuăn ngo Gia Lai dế chôa ‘lâng xông mơ-eăm, tơniăn tơdroăng rêh ối ƀă ivá pêi cheăng ƀă troăng tơmiêt pêi rơkê dêi tơná. Mâu tơdroăng mơ-eăm mê gum mơnhên hnoăng cheăng dêi ngế vâi kơdrâi tung mơnhông cheăng kâ, rak khôi túa lĕm tro vâi krâ nah ƀă mơjiâng pơlê rế hía rế mơnhông mơdêk.