Nâ Đinh Thị Trang (25 hơnăm), ối a thôn Nước Vuông, cheăm Sơn Tây Thượng hdrối nah pêi chiâk deăng dêi tung rơpŏng hngêi. Sap ing mot cheăng a Khu pêi cheăng tơrŭm pêi chiâk deăng rak kong ƀă Tê mơdró Sơn Bua (Khu pêi cheăng tơrŭm Sơn Bua), cheăm Sơn Tây Thượng, kong pơlê Quảng Ngãi, nâ pơxiâm hriâm túa pêi ngăn ‘na kơmăi  kơmok, hmâ ƀă tơdroăng pêi, pơliê, têng lơ pro hngíu kế tơmeăm pêi lo ing chiâk deăng. Mot cheăng a Khu pêi cheăng tơrŭm, nâ Trang hlối ai liăn pê lo tơniăn, hlối ai rôh châ hriâm tơdroăng cheăng, hriâm vâ rế rơkê tơdroăng cheăng pêi:

“Á troh akố ki xiâm vâ pêi cheăng, hriâm cheăng, hriâm ing mâu tơdroăng dêi tơná hâi teăm ‘nâi, vâ pêi lo tơmeăm lĕm tâ há”.

Troăng prôk dêi Khu pêi cheăng tơrŭm cheăm Sơn Bua cho tơkŭm pêi pro, têng, pro, uâ pơliê tơmeăm ki pê lo ing chiâk deăng a tíu mê, gum kuăn pơlê ai cheăng pêi ƀă chôa ‘lâng mơjiâng kơpong pêi lo tơmeăm tơniăn a kơpong kong ngo. Ngế ki mơjiâng Khu pêi cheăng tơrŭm mê cho nâ Lê Thị Ánh (45 hơnăm), mơngế Ca Dong, ối a cheăm Sơn Tây Thượng. Hơnăm 2020, nâ Ánh pơtê pêi cheăng ăm Tơnêi têa, vêh dêi a pơlê mơjiâng Khu pêi cheăng tơrŭm Pê lo tơmeăm ki pêi lo ing chiâk deăng rak ngăn kong ƀă khu ngăn ’na Tê mơdró Sơn Bua tung tuăn tơmiât púi vâ djâ tơmeăm pêi lo ing chiâk châ tơbleăng tê a kơchơ mơdró kân.

Sap ing liăn tơnêi têa dêi ‘no pêi tơdroăng pơkâ mơnhông cheăng kâ - rêh ối pơlê pơla kơpong kuăn ngo ƀă kong ngo pơla hơnăm 2021 - 2030, Khu pêi cheăng tơrŭm Sơn Bua châ kơjo kum rôe kơmăi têng vâ uâ pơliê pro tơmeăm pê lo, rôe tơmeăm xúa tung pêi cheăng.

Nâ Lê Thị Ánh ăm ’nâi, rôh apoăng, Khu pêi cheăng tơrŭm pê lo mâu kế tơmeăm ki pro ing priât: mê cho priât têng khăng rơpâ, drôu priât, têa ngeăm priât; klêi mê po rơdâ tê rơmôe chế pro ing hlá plâi ối kong, pok, cau ƀă mâu loăng plâi ki chiâng pro pơkeăng. Troh nôkố, Khu pêi cheăng tơrŭm ai 7 tơmeăm châ mơnhên OCOP:

“Nôkố, tối tơbleăng ăm kuăn pơlê mê thế kơnôm  hngêi kơmăi kô mê. Po hngêi kơmăi mê thế lăm rôe, mê kuăn pơlê nếo khên pêt, khên pêi. Tâng pin hnê tối la ôh tá pêi ôh tá hlo ƀă mâ, vâi krâ nhŏng o kô ôh tá khên pêi. Ta ah vâi xuân ôh tá tơmiât troăng vâ pêi ƀă ôh tá kâi pơ’lêh tuăn tơmiêt vâ rế hlê rế mơnhông tung pêi cheăng kâ”.

Hdrối nah, hên rơpŏng kuăn pơlê hmâ lôi môi xiâm priât hŭn xêh sap 5 xiâm troh 6 xiâm tơdrêng môi rôh. Xiâm priât kăn hlối drêh dê  priât kuăn, hlối drêh dêi hnông priêt ki ku kŭn, priât ôh tá piê lĕm. Đảng viên Lê Văn Hiền (37 hơnăm), mơngế Ca Dong, hnê kuăn pơlê bú rak to môi troh péa xiâm priât tê, vâ kum ăm priât kăn tơkŭm dêi trếo kơhiâm drêh ăm dêi hnông priât. Ngoh Lê Văn Hiền ăm ‘nâi, hdrối nah, môi hnông priât tê ăm mơngế ki rôe bú dâng 20.000 - 30.000 liăn, kốkố châ khu pêi cheăng tơrŭm rôe ƀă yă kơnâ luâ tâ 3 rôh:

“Drêng hiăng ‘nâi nhên troh akố pêi cheăng mê á đi đo hbrâ rơnáu tơmiât thế djâ troăng ahdrối, pêi hdrối, pro ti lâi vâ kuăn pơlê kô châ hriâm ƀối mâu tơdroăng ki tơná hiăng hriâm, tăng ‘nâi plĕng. Ƀă mâu tơmeăm pê lo ing chiâk deăng ai tiô pơkâ mê pin thế hriĕn plĕng, ’no liăn cheăng bă tăng ngăn kuăn pơlê hiăng pêi pro môi tiah lâi”.

Pôa Nguyễn Xuân Thọ, Ngế pơkuâ ƀơrô ngăn cheăng kâ cheăm Sơn Tây Thượng Kinh, kong pơlê Quãng Ngãi ăm ‘nâi, mâu túa pêi cheăng dêi Khu pêi cheăng tơrŭm tơkŭm cheăm pêi chiâk, ƀă tê rôe tơmeăm pê lo ing chiâk deăng, veăng gum ăm kuăn pơlê ai cheăng pêi, uâ pơliê pro lĕm ƀă tê tơmeăm pêi lo ing chiâk deăng, mơdêk pê lo liăn ăm kuăn pơlê. Mâu khu pêi cheăng tơrŭm ai mâu ngế đảng viên pêi cheăng lĕm djâ troăng ahdrối tung pêi chiâk hiăng veăng pro pơ’lêh, túa pêi cheăng ăm kuăn pơlê.

“Nôkố, tung cheăm xuân ai hên Khu pêi cheăng tơrŭm. Rêm Khu pêi cheăng tơrŭm ai môi túa cheăng kâ krê. Khu pêi cheăng tơrŭm cheăm Sơn Bua ai túa tơrŭm cheăng pơxúa, ƀă mâu tơmeăm pê lo mê cho chế hlá plâi ối, priât kong, pok ƀă hên tơmeăm ki ê. Kơ’nâi mê, tơrŭm ƀă mâu Khu pêi cheăng tơrŭm ƀă mâu cheăm ki ê tung kong pơlê, ngin kô pêi lo hên tơmeăm ăm cheăm, klê mê tơkŭm ƀă mâu cheăm ki ê vâ chiâng khi pêi cheăng pê lo kế tơmeăm ăm mơnế vâ xúa’’.

Ing mâu tơmeăm hmâ dêi kong kế, đảng viên mơngế Ca Dong dế veăng ’no hnoăng po troăng pêi cheăng kâ nếo a Sơn Tây Thượng, kong pơlê Quãng Ngãi.