A kơpong têa kơxĭ Xuân Đài, hên plong tuk pơtăng dêi rơpó lo a mâu tơdrong păn tung dế ving têa kơxĭ, chơ djâ mơdrăn ăm xi xŏng kân i kâ. Ngoh Đỗ Xuân Thạnh, Tôh kơphô̆ Phú Mỹ, bêng Sông Cầu, cho môi tung mâu ngế ki vê plong lo akố sap ing kơxo má. Ngoh Thạnh ăm 'nâi, klêi kong prâi pro ôh tá tơniăn mơ'nui hơnăm nah, rơpŏng ngoh châ mung 1 rơtal liăn vâ 'mâi rơnêu tơdrong păn, păn 13.000 to xi xŏng hdrê nếo ki kân. Lối 7 khế rak ngăn, hdrê xi xŏng hiăng kân vâ châ tê, tơmối xuân hiăng kok ahdrối vâ tí tăng rôe. Ngoh Thạnh phiu ro tối:

“Tâng vâ tối păng ‘nâng mâu xi xŏng nôkố châ dâng 2 lăng 1 to, tê châ lối 200.000 liăn/to xi xŏng kân, tơ'mô ƀă 800.000 troh a 900.000 liăn/kg. Tâi tâng kơxô̆ liăn châ xo ing rơnó tê xi xŏng rôh kố châ lối 2 rơtal liăn. Á tơmiât kô mơdrếo hngêi rak liăn, kơxô̆ liăn ki u ối 'mâi mơnhông ƀă păn tơ'nôm hên tâk péa xôh kơxô̆ xi xŏng dêi rôh kố. Tâng tơdroăng păn châ tơtêk khât mê dâng 2 hơnăm kơ'nâi ah nếo kô kâi mơnhông môi tiah hdrối rơnó  têa kân lân lu mê nah”.

Xuân rơtế ối a Tôh kơphô̆ Phú Mỹ, bêng Sông Cầu, ngoh Đỗ Ngọc Quang dế chôa 'lâng vêh mơnhông păn xi xŏng a ving têa kơxĭ Xuân Đài. Rôh kong prâi pro ôh tá tơniăn mơ'nui hơnăm nah pro rơpŏng ngoh tro lŭp lối 2 rơtal 500 rơtuh liăn, tung pơla ối chĕn kơxô̆ liăn mung ing hngêi rak liăn. Kơnôm châ ai troăng hơlâ tŏng kum, ngoh châ kơdroh chĕn, kơdroh liăn tơkâ ƀă mung tơ'nôm 800 rơtuh liăn vâ 'mâi vêh mơnhông păn nếo. Tung 2 rôh vêh păn kơ'nâi mê, 1 rôh dế xông kân lĕm, rôh ki tá hiăng troh khế vâ tơnăng xo tê dêi.

“Á kơ’neh hdrê tung tơdrong păn môi xôh a khế 4 dâng 7.000 to; roh  pơtối a khế 5 ƀă khế 8, tâi tâng dâng 10.000 to nếo. Nôkố pơtối tê roh ki apoăng klêi mê, pơtối vêh păn nếo, hmôu pơ păn roăng tiah mê đi đo”.

Kong prâi pro ôh tá tơniăn a mơ'nui hơnăm 2025 pro lŭp ó ăm kơpong ki xiâm păn ká xi xŏng a ving Xuân Đài, ƀă dâng 1.500 rơpŏng a bêng Sông Cầu ƀă Xuân Đài tro tơdjâk, vâ chê 100.000 tơdrong păn tro lŭp, hía tâi tâng kơnâ dâng 1.900 rơtal liăn, tung mê, bêng Sông Cầu châ vâ chê 2/3. Pôa Huỳnh Đình Quang, Phŏ Kăn hnê ngăn Vi ƀan bêng Sông Cầu tối ăm ngin 'nâi, bêng hiăng pêi cheăng ƀă mâu khu ki ăm mung liăn vâ tŏng kum kơdroh liăn laih, mơdrếo chĕn, xing xoăng tơ'nôm kơxô̆ liăn kum mơngế ki păn vêh mơnhông păn nếo. Kơnôm ing mê, kơpong păn hiăng 'mâi mơnhông dâng 80%. Tung la ngiâ, bêng pơkâ thế kuăn pơlê hơ'lêh túa păn, xúa khoa hok kŏng ngê̆ vâ hbrâ ví xía vâ, mơdêk ivá hbrâ ví kong prâi pro ôh tá tơniăn, pơreăng tâ tú, tơmiât vâ pêi pro tung 'mâi mơnhông ƀă mơdêk cheăng tơniăn.

“Tơring mơhnhôk vâi krâ nhŏng o păn tro tơdrong păn, kơxô̆ ƀă kơpong pơkâ; tơdrêng amê, xúa khoa hok kŏng ngê̆ pơhlêh ing tơdrong păn ƀă plong tiô túa hmâ nah pơhlêh chiâng tơdrong păn ƀă hlâm HDPE krá kâk tâ, kơdroh tro lŭp drêng kong mêi khía mơhot kân. Drêng rơnó mêi khía troh, vâi krâ nhŏng o tơkŭm lăm tơnăng mơ’no tê, 'mâi rơnêu tơdrong păn. Ƀă xi xŏng ki ôh tá mơhúa tro tâ pơreăng, kal teăm tơbleăng tơdrêng vâ khu kăn pơkuâ ƀă kơvâ pêi chiâk deăng chu tŏng kum ăm vâi krâ nhŏng o."

Păn tơnăng ká xi xŏng cho kơvâ cheăng ki rơdêi a peăng mâ hâi lo kong pơlê Dak Lak la đi đo trâm tơdroăng ki tro lŭp tung rêm rơnó khía mơhot têa kân lân lu, kal hbrâ rơnáu kơxô̆ liăn ki kân vâ 'mâi mơnhông tơdroăng ki tro lŭp, 'mâi mơnhông tơdroăng ki păn tơnăng ká xi xŏng. Bu krê ƀă mâu ngế ki mung liăn păn tơnăng ká xi xŏng dêi Agribank a Tíu pêi cheăng Phú Yên, roh kong prâi pro ôh tá tơniăn a mơ'nui hơnăm nah hiăng pro vâi tro lŭp troh 6.000 rơtal liăn. Rơtế prôk ƀă mâu ngế ki tro lŭp, ‘mâi mơnhông tơdroăng ki xahpá, mê hngêi rak liăn hiăng kơjo kum, kơdroh liăn tơkâ tơdrêng amê hlối ăm mung tơ'nôm kơxô̆ liăn. Krê kơpong păn ká xi xŏng a ving têa kơxĭ Xuân Đài, lối 300 ngế ki mung châ kơdroh liăn tơkâ, tơdrêng amê hlối châ mung tơ'nôm 240 rơtal liăn. Pôa Phan Thông Thái, Kăn pơkuâ ngăn hngêi rak liăn Agribank ai tíu pêi cheăng a Phú Yên, tối ăm 'nâi:

“Ngin tơhrâ kô đi đo ai tŭm kơxô̆ liăn ăm mung xuân pêi pro tro tơdroăng ăm mung tro hâi khế, 'no liăn vâ tŏng kum mâu rơpŏng păn ká xi xŏng xuân môi tiah uâ mơdiê mung 'no liăn pêi cheăng. Tơdroăng xúa liăn dêi kuăn pơlê ngin xuân séa ngăn krâu khât, vâ kuăn pơlê 'no liăn tro tơdroăng, tơƀrê má môi. Ƀă tơdroăng kố, kơvâ păn ká xi xŏng kô vêh tơniăn tiah hmâ nếo sap ing hơnăm kố troh tâi hơnăm kơ'nâi ah nếo”.

Rơnó tơnăng xo xi xŏng ki apoăng klêi kơ'nâi kong prâi pro ôh tá tơniăn dế ăm hlo mâu tơdroăng ki tơƀrê ƀă mơngế păn ká xi xŏng a kơpong ving têa kơxĭ Xuân Đài. Sap ing tơdroăng ki xúa lĕm tro kơxô̆ liăn 'mâi mơnhông troh tơdroăng pơkâ dêi kong pơlê ƀă ivá mơ-eăm dêi mơngế păn, tâi tâng hiăng châ mơhno ƀă mâu kơdroăng ká xi xŏng hbrâ vâ tê, ôh tá xê ăm hlo to tơdroăng păn dế vêh mơnhông mê ối po troăng prôk krá tơniăn ăm kơvâ păn ká xi xŏng ki phá tơ-ê kố.