Pôa Trịnh Văn Quyết, Kăn cheăng tung Khu xiâm kal kí, Kăn pơkuâ pơtâng tối tơdroăng kal Tíu xiâm tơnêi têa veăng ƀă xông tơpui a rôh leh. Sap hơnăm 1946 troh hơnăm 1965, Pôa Hồ Chí Minh, Kăn xiâm hnê ngăn tơnêi têa hneăng apoăng hiăng 11 xôh vêh lăm pôu, pêi cheăng ƀă Đảng ƀô̆, khu râ kăn pơkuâ, khu lêng ƀă kuăn pơlê kong kân. Mâu rơkong hnê dêi Pôa Hồ chiâng kế tơmeăm ihiâm mơno kơnía, mơhno troăng prôk la ngiâ ăm tơdroăng mơnhông mơdêk dêi Hải Phòng ing mâu rơxông.

Kheăn kơdeăn mâu tơdroăng châ tơƀrê dêi pơlê kong kân hiăng châ, pôa Trịnh Văn Quyết pơkâ thế Hải Phòng tơdrăng hvái ngăn, tơkŭm lêi tah mâu tíu ki kreăng ‘na troăng tăng ƀăng tơnêi, mơngế pêi cheăng ki rơkê ƀă pơhlêh troăng pêi tơtêk. Pơlê kong kân kal pêi pro lĕm tro mâu hnoăng cheăng ki xiâm, tung mê rak kơlo tơtêk péa kơxô̆ krá tơniăn ing hơnăm 2026 ƀă mâu hơnăm pơtối; mơnhông ki tơ’lêi hlâu ing troăng pêi ki phá tơ-ê, mơdêk tơtêk kơnôm a khoa hok kŏng ngê̆, pơhlêh tơmiât pêi rơkê ƀă pơhlêh xúa măng internet.