Kơxê lơ 18/10, a Tíu pêi cheăng Chin phuh, pôa Lê Minh Hưng, Ngế pro xiâm hnê ngăn tơnêi têa hiăng tơpui tơno ƀă jâ Brigitte Haas, Ngế pro xiâm hnê ngăn kong têa Liechtenstein. A rôh tơpui tơno, pôa Lê Minh Hưng mơnhên Việt Nam ngăn nhuô̆m tơrŭm cheăng ƀă Liechtenstein, khĕn kơdeăn hnoăng cheăng ƀă ki rơdêi dêi Liechtenstein tung mâu kơvâ cheăng khoa hok - kŏng ngê̆, pơhlêh nếo tơmiât pêi rơkê, liăn ngân, kŏng ngê̆ ƀă mơnhông mơngế pêi cheăng rơkê.

Tơpui tơno 'na troăng hơlâ tơrŭm cheăng tung la ngiâ, péa Ngế pro xiâm hnê ngăn tơnêi têa môi tuăn pơtối mơdêk tơpui tơno khu râ kăn xiâm, mơdêk mâu troăng hơlâ tơrŭm cheăng ƀă po rơdâ tơrŭm cheăng tung mâu kơvâ péa pâ ai hlâu tơmeăm ki vâ mơnhông rơdêi ƀă  kô kơjo gum dêi rơpó tơrŭm cheăng dêi rơpó môi tiah liăn ngân, khoa hok – kŏng ngê̆, pơhlêh nếo tơmiât pêi rơkê, pơhlêh kơxô̆ ƀă mơjiâng pro kŏng ngê̆ rơxông nếo.