Tơheăm kơxop hlá mơéa luât hiăng châ tơpui tơno a rôh hôp, veăng ăm rơkong tơpui tối, mê cho: Luât Tơbriât tê (‘mâi hơ’lêh); Luât Tơbriât tê tơmeăm (‘mâi hơ’lêh); Luât Hngêi ối (‘mâi hơ’lêh); Luât Mơjiâng khu mơdró kâ kŭn ƀă krâ kơvâ; Luât ‘mâi hơ’lêh, ‘mot tơkŭm mâu tơdroăng dêi Luât Tê mơdró, Luât Tơxup tơbriâp, Luât Pơkuâ ngăn tơpui kâ tê mơdró, Luât Rak vế hnoăng pơxúa mâu ngế xúa; Luât roê tơmeăm, mơđah tơbleăng tơmeăm; Luât ‘mâi hơ’lêh, ‘mot tơ’nôm mâu tơdroăng dêi luât Tơniăn, krúa lĕm tung pêi cheăng; ƀă kơxop hlá mơ-éa Luât ‘mâi hơ’lêh, ‘mot tơ’nôm mâu tơdroăng dêi luât pơtâp ivá, tơ’noăng ivá, ôm hyô, tíu ‘măn chôu hlá mơéa, um phim, tơmeăm kơnía túa lĕm tro, mơđah tơbleăng, hlá tơbeăng.

Ƀă kơxop hlá mơ-éa Luât tơbriât tê kế tơmeăm (ki 'mâi hơ'lêh), kăn teăng mâ Khu ngăn 'na Luât kong pơlê Dak Lak tối tiah kố, kơxop hlá mơ-éa nếo pơtê a tơdroăng ki chêh tối mâu khu xiâm, kơvâ cheăng ƀă Vi ƀan râ kong pơlê, tá hâi pro nhên hnoăng cheăng ki nhên dêi rêm kơ koan.

“Troăng 9 'na hnoăng cheăng pơkuâ ngăn tơnêi têa ƀă tơdroăng ki tơbriât tê kế tơmeăm kal châ tơ'nôm, pơcháu ăm Chin phuh pơkâ nhên tơdroăng kố vâ pro nhên tơdroăng pơkuâ ngăn tơnêi têa, tơdrêng amê hlối pro nhên kong pơlê kơ koan ki lâi ai hnoăng cheăng, kum Vi ƀan hnê ngăn kong pơlê tung tơdroăng pêi pro hnoăng cheăng kố".

Veăng tơpui tối 'na kơxop hlá mơ-éa 'mâi rơnêu, 'mot tơ'nôm mâu tơdroăng dêi Luât tê mơdró, mâu kăn teăng mâ pơkâ thế pơkâ nhên tâ hnoăng cheăng tơbleăng, 'mâi rơnêu inâi kế tơmeăm, tơdroăng tê mơdró ối tung hnoăng pơkuâ tơnêi têa, rak tơniăn nhên hnoăng pơkuâ ƀă tơ'lêi hlâu tung tơkŭm pêi pro. Pôa Hồ Văn Dũng, Phŏ kăn pơkuâ Kơ koan teăng mâ kơpong XIV, tối rơkong tơpui dêi tơná:

“Pơkâ tiah mê cho bú pơtê a tơdroăng cho Khu xiâm ai hnoăng cheăng tơbleăng inâi kế tơmeăm, tơdroăng tê mơdró ối tung hnoăng pơkuâ, tá hâi tối troh tơdroăng kơ koan ai hnoăng cheăng pơkâ tơ'nôm inâi kế tơmeăm, tơdroăng tê mơdró ki ối tung hnoăng pơkuâ, mâu tơdroăng pơkâ mê, kơ koan ki mê. Pâ thế tơ'nôm pơkâ cho nhên vâ rak tơniăn nhên hnoăng ƀă pôu râng pro ƀă pro tơ'lêi hlâu tung tơkŭm pêi pro".

Ƀă kơxop hlá mơ-éa Luât 'mâi rơnêu, 'mot tơ'nôm mâu tơdroăng dêi Luât rak tơniăn, krúa lĕm tung pêi cheăng, tơdroăng ki châ mâu kăn tơmâng ngăn cho po rơdâ mâu ngế ki veăng roê ƀaoh hiêm drêng trâm xía vâ tung pêi cheăng, châi tamo xua pêi cheăng pơklât thế rơtế ƀă troăng hơlâ tŏng kum tơtro. Tiah mê, kal hriăn plĕng pơkâ nhên kơxô̆ liăn tŏng kum sap ing liăn ngân tơnêi têa lơ Khu râng liăn ƀaoh hiêm ôh tá ai cheăng pêi, pơlê pơla ƀă kơxô̆ liăn nâp dêi khu mơngế pêi cheăng ôh tá ai hlá mơ-éa chêh inâi pêi cheăng ối tung rơpŏng kơtiê, vâ chê kơtiê lơ rêh ối a kơpong hdroâng kuăn ngo, kum tơdroăng pơkâ ai tiô púi vâ drêng pêi pro.

Pakĭng mê, mâu kăn pơkâ thế séa ngăn tiô kơlo nâp, kơlo châ kâ liăn ƀaoh hiêm tro rong, châi tamo ƀă mơngế pêi cheăng a mâu kơpong ối tung kơpong II, III, IV, tung mê ai Dak Lak. Tơdroăng ki mơjiâng hê̆ kơxô̆ liăn kơdroh yă lơ kơlo liăn tŏng gum ki vâ iâ thế châ hriăn plĕng vâ rak tơniăn hnoăng pơxúa ăm mơngế pêi cheăng ki tro trâm tơdroăng ôh tá tơniăn ‘na ivá pêi cheăng xua trâm xía vâ lơ châi tamo. Pôa Nguyễn Phú Lập, Phŏ kăn hnê ngăn Liên đoân pêi cheăng kong pơlê Dak Lak, tối tơdroăng:

“Drêng pin hiăng pơkâ kơlo liăn khế ing kơlo liăn khế ki hên kơpong mê pin kô riân kơlo ki tơ’mô to lâi kơpêng hrĭng tung kơlo tŏng gum mê. Vâ drêng ai tơdroăng xía vâ ngăn tiô kơlo kơdroh tung pêi cheăng mê pin kô ai kơlo môi tiah mê. Ga nhên drêng pêi pro tung luât baoh hiêm xah hô̆i kô chêh thiê̆n ăm tơ’lêi tâ, vâ ví mâu tơdroăng drêng liăn ôh tá ‘nhó to lâi ôh la lăm pro mơéa gá pá khât drêng ai tơdroăng ki trâm xía vâ tung pêi cheăng lơ tơdroăng cheăng ‘na cheăng pêi”.