A kơpong hdroâng kuăn ngo, tơnêi ối, tơnêi pêi kâ ƀă tơdroăng cheăng pêi xuân ối cho mâu tơdroăng ki kuăn pơlê, kuăn pơlê ki tâ phĭu tơmâng khât. Pôa Puih Kơk, Kuăn pơlê, a pơlê Ia Grăng 1, cheăm Ia Grai, kong pơlê Gia Lai, púi Tơnêi têa ai troăng hơlâ tŏng kum tơtro ƀă mâu rơpŏng ki xơpá.

“Rơhêng vâ Tơnêi têa tơmâng ngăn troh tơnêi ối ƀă tơnêi pêi kâ dêi vâi krâ nhŏng o, kơjo gum mâu ngế ki ai tơdroăng rêh ối xơpá, tăng cheăng pêi a hngêi, a pơlê vâ mơnhông cheăng kâ rêh ối”.

Rơtế tơdroăng ki tơmâng ngăn 'na tơdroăng cheăng kâ, kuăn pơlê Rơmah Nhiên, ối a pơlê Ia Răng 2, cheăm Ia Grai, púi vâ ai tơ'nôm tơdroăng cheăng pêi a pơlê, kơdroh tơdroăng ki vâi hdrêng thế lăm pêi cheăng hơngế.

“Cheăng pêi a pơlê cheăm ôh ti ai, mâu vâi hơnăm ối nếo a Gia Lai lăm pêi cheăng hngế hên, cheăng pêi a pơlê ôh tá ai. Rơhêng vâ Đảng, Tơnêi têa tơmâng ngăn hên tâ nếo troh tơdroăng kố vâ gum vâi krâ nhŏng o mơnhông cheăng kâ tung la ngiâ”.

Kuăn pơlê Ndong Brừm, mơngế K'Ho a cheăm Dam Rông 3, kong pơlê Lâm Đồng, pói tơngah Kuô̆k hô̆i tŏng kum kơxô̆ liăn mơnhông kơpong hdroâng kuăn ngo, malối cho hngêi trăng troăng klông ƀă mâu troăng hơlâ tŏng kum cheăng kâ.

“Rơhêng vâ Kuô̆k hô̆i tơmâng ngăn ‘no liăn pro troăng prôk, hngêi pơkeăng pơlât, hngêi trung hriâm ƀă tŏng gum tơdroăng rêh kâ ối ăm kuăn pơlê; pơtroh liăn ăm tơtro vâ pro kơdroh kơtăn pơla mơnhông mơdêk ƀă mâu kơpong, gum kuăn pơlê hluăn ing kơtiê krá ton”.

Mâu rơkong pâ thế sap ing pơlê cheăm xuân pơkâ thế pêi pro klêi troăng hơlâ tơnêi tơníu, rak tơniăn hnoăng pơxúa ăm kuăn pơlê ƀă lêi tah mâu tơdroăng tơvâ tung pơla pêi pro. Jâ H’Nhip Ƀuôn Krông, kuăn ngo Rơđế a ƀuôn Čuôr, cheăm Ea M’Droh, kong pơlê Dak Lak, rơhêng vâ rĕng châ tŏng gum chêh pro hlá mơ-éa mơnhên hnoăng rak xúa tơnêi vâ tơniăn tơdroăng cheăng kâ.

“Nôu pâ xoăng ăm á 4 sào tơnêi achê Vi ƀan cheăm vâ pêi kâ, la troh nôkố xuân tá hâi châ klâ hlá mơ-éa hnoăng rak xúa tơnêi. Á rơhêng vâ rĕng châ rĕng gum pro hlá mơ-éa vâ tơnêi chêh inâi á, hmiân tuăn pêi kâ”.

Pôa Phạm Thanh Liêm, Kăn hnê ngăn Vi ƀan kơpong tíu pêi cheăng Trường Sa, kong pơlê Khánh Hòa, pâ thế pơtối chêh pro klêi troăng hơlâ mơnhông cheăng kâ rêh ối a têa kơxĭ ƀă tíu pêi cheăng ăm kơpong tíu pêi cheăng.

“Rơhêng vâ Kuô̆k hô̆i pơtối chêh pro klêi troăng hơlâ tŏng mơnhông mơdêk cheăng kâ rêh ối a kơxĭ, tŏng gum kuăn pơlê tơnăng ká, ‘no liăn pro troăng prôk gum ăm cheăng tơnăng ká. Krê ƀă kơpong tíu pêi cheăng Trường Sa, rơhêng vâ Kuô̆k hô̆i pơtối tơmâng ngăn, chêh pro klêi troăng hơlâ tŏng gum vâ tơ’mot kơxô̆ liăn pro troăng klông, gum tung cheăng mơnhông cheăng kâ rêh ối pơlê pơla tro ƀă ‘mâi mơnhông pơlê pơla cheăm bêng, gâk kring”.

Kuăn pơlê Tây Nguyên – Peăng Hdroh tơdế tơnêi têa rơhêng vâ, tơƀrê dêi hneăng hôp ôh tá xê to a kơxô̆ mâu hlá mơéa châ pơkâ, mê ối a ivá rak tơniăn kơxô̆ liăn, tŏng gum tơdroăng rêh ối krá tơniăn ƀă pơhlêh tơdroăng rêh ối kuăn pơlê.