A bêng Mũi Né, kong pơlê Lâm Đồng, tôh pêi cheăng ukố utá dêi Kŏng an kong pơlê troh a hngêi jâ krâ Nguyễn Thị Tiếp, 79 hơnăm, vâ xo mauh ADN. Jâ Tiếp ai péa ngế o kơnốu cho mố đô̆i Nguyễn Văn Nô, hlâ hơnăm 1968 ƀă Nguyễn Văn Ốm, hlâ hơnăm 1973. Lối tơdế chal hiăng tơkâ luâ, rơpŏng xuân ối tơkôm tăng hlo kơxêng dêi péa ngế mô đô̆i kố. Cheăng xo mauh ADN a hngêi hiăng pro tơ’nôm tơdroăng ki tăng hlo nhŏng o. Jâ Lê Thị Tư, kuăn kơdrâi jâ Tiếp, ƀriê tung tuăn mơno tối:

“Rơpŏng ngin ro khât drêng châ xo mauh ADN. Kố cho tơdroăng ki tơngah dêi rơpŏng hngêi sap ing ton nah, la hdrối nah tá hâi ai rôh vâ pêi pro. Nôkố, rơpŏng tơngah kô rĕng tăng ‘nâi inâi, hơnăm ‘na ngế nhŏng o mê”.

Xuân a bêng Mũi Né, rơpŏng pôa Trần Văn Hùng xuân tá hâi tăng hlo tơnâp kiâ mố đô̆i Trần Văn Năm, ngoh pôa hlâ hơnăm 1966. Klêi kơ’nâi hên hơnăm tơkôm, pôa Hùng tơngah tơdroăng ki xo mauh vâ pơchông ADN kô gum rơpŏng mơnhên châ tíu tâp ‘mế ngoh pôa:

“Tơdroăng ki xo mauh ADN vâ tăng, mơnhên inâi mố đô̆i gá ai pơxúa khât. Rơpŏng rơhêng vâ rĕng tăng hlo mâu nhŏng o, ai tíu vâ tơbâ, chôu nhang, xuân cho tơdroăng ki hơlêm ƀă tơngah sap ing ton nah”.

Tung hneăng má 1 tơdroăng cheăng pêi thâ 500 hâi măng, kong pơlê Lâm Đồng hiăng po 32 rôh lăm ngăn, khu ki ai tơdjâk hiăng tăng rôu, tơkŭm châ 26 to kơxêng kiâ mố đô̆i, xo mauh vâ séa ngăn ADN ƀă 17 ngế. Tơdrêng amê hlối xo mauh 3.625 to tơnâp kiâ ki ai tŭm tơdroăng vâ séa ngăn a 11 to ilâng kiâ mố đô̆i, rĕng tâ tơdroăng pơcháu 3 khế. Kŏng an kong pơlê Lâm Đồng xuân xo 1.371 mauh ADN dêi nhŏng o, rơpŏng hngêi ngế mố đô̆i.

Tơbleăng rôh má 2 kố, Lâm Đồng tiô tối hdrối kô xo dâng 1.074 mauh ADN dêi nhŏng o ngế mố đô̆i. Tơdrốu tôh pêi cheăng châ mơjiâng, ai 3 tôh tơniăn ƀă 3 tôh lăm tăng ukố utá, troh tơdrêng a hngêi mâu nhŏng o rơpŏng ki hiăng hên hơnăm, tro châi tamo râ lơ xơpá tung tơdroăng ki prôk lăm. Rơtế ƀă xo mauh, khu kŏng an tơrŭm ƀă kăn pơkuâ cheăm bêng séa ngăn, mơnhên inâi, hơnăm, mơhnhôk mâu rơpŏng veăng, rak tơniăn ôh tá tro lôi mâu ngế ki ai tŭm tơdroăng. Đăi ŭi Hoàng Đăng Hải, Ƀơrô Kăn sat Pơkuâ ngăn mơ-éa ‘na tơniăn pơlê pơla, Kŏng an kong pơlê Lâm Đồng, ăm ‘nâi:

“Tơná á châ xoăng pơkuâ mâu tôh pêi cheăng ukố umê, troh a hngêi xo mauh ADN dêi nhŏng o mâu mố đô̆i. Ngin veăng ƀă hiâm mơno pôu râng khât, mơ-eăm pêi klêi hnoăng cheăng châ pơcháu”.