Chôu vế tơdroăng tơná hâk vâ ƀă tơdroăng ngê̆ thuât kuăn ngo, ngoh Đinh Văn Anging hơ’muăn tối: Lối 10 hơnăm hdrối nah, môi tung mâu roh ki trâm mâ, tơpui tơno, mơhriâm, mơđah rơtế ƀă mâu vâi meh nhŏng, vâi ngoh nâ, vâi ngê̆ nhân a cheăm Tơ Tung, ngoh ối mơhúa châ ngê̆ nhân Đinh Plơnh, cho krâ pơlê Đak Pơkao ‘nâi ngoh cho ngế ki kơhnâ mơ-eăm, ing mê, hiăng pleăng hnê ăm ngoh tơrêm túa tôu chêng koăng, tơrêm tơdrá têng nêng:

“Dế ối tơxĭn nah, á hmâ tiô dêi jâ pôa, nôu pâ lăm ngăn vâi krâ pơlê po mơdĭng, drêng mê nah, á tá hâi ’nâi tơmiât tơdroăng ki klâi hên. Bú ‘nâi to mơhriâm tôu chêng koăng, mâu prôa ki ê ăm i ro iâ, kơ’nâi mê, á hiăng kơhnâ mơ-eăm tơmâng mơngế pôa, mơngế thái mơ-eăm hnê ăm á, mê cho mâu tơdroăng rơngê ting ting Bơhnéa, idrâp chêng koăng, cho túa lĕm tro dêi hdrông kuăn ngo tơná, pin athế mơhriâm xo túa lĕm tro mê”.

Ing mâu roh trâm mâ, mơhriâm ki mê nah, môi hneăng ki xông pơhlêh rơtế mot khâp tung hiâm mơno ‘na tơdrá chêng koăng, tơdrá rơngê ting ting, mâu tơdrá ki mê hiăng pơxiâm chúa vế, ối pâ khât tung  hiâm mơno ngoh. Kơnôm ai tơdroăng hnê djâ dêi pôa Đinh Plơnh, krâ pơlê, mê ngoh Đinh Văn Anging chôa ‘lâng hmâ ƀă prôa t’rưng, hơkâ, chêng koăng ƀă mâu tơdrá rơngê ting ting Bơhnéa. Hiăng hên hơnăm kơhnâ mohriâm, pêi pro krâu khât tiô dêi hiâm mơno tơná púi vâ, Anging hiăng chiâng tôu, rêi lối 10 túa prôa dêi vâi krâ. Ôh tá xê to chiâng tôu chêng koăng, rêi mơđah mâu prôa têng nêng, ngoh ối rơkê rơngê ting ting tơdrá ki păng ‘nâng dêi kuăn ngo, xua tá tuăn tá mơno, ngoh hiăng djâ tơdrá vâi krâ jâ nôa ki hiăng hnê ‘măn ăm sap nah, ngoh ai krôk hơdruê lĕm tơleăng, ing mê, tơdrá rơngê, ting ting châ mơngối tro tiô khôi hmâ dêi kong ngo Tây Nguyên. Tung idrâp rơngê ting ting , idrâp hơkâ, idrâp chêng koăng dêi ngoh tôu, mơđah, mơngế ki hmâng trối châ vêh rêh ối ƀă dêi khôi túa, vêa vong chal vâi krâ roh ton nah a pơlê pơla ƀă hiâm mơno ki hâk git, rak vế tơdroăng, tơmeăm khoăng dêi pơlê pơla.

Ing mâu roh ki mơhriâm tôu chêng koăng, hriâm rơngê ting ting a pơlê cheăm, ngoh Anging rế hía rế châ veăng mơđah a hên mâu roh ki mơđah túa lĕm tro ki kân dêi kong pơlê Gia Lai, mâu roh ki mơđah ngê̆  thuât koh mot hơnăm nếo, tơdroăng ki tơbleăng tối, tơrŭm ƀă kơvâ ôm hyô ƀă tơdroăng “Chêng koăng mơ’nui măng tĭng” hmâ châ tơkŭm đi đo a Plông kân Đại Đoàn Kết, bêng Plei Ku. Um méa dêi ngế rơtăm Bơhnéa ki ai kéa prâp, mâ hleăng bâ tung rơmoăng ki kơxon tiô khôi hmâ dêi pơlê, um méa ngoh têi tơhráu drêng têa hơkâ, hiăng pro hên ngế ki ngăn, ki hlo ía tối ngoh cho mơngế rơkê păng ‘nâng.

“Rêm roh châ lăm mơđah tôu chêng koăng, rêi têng nêng, á tâ dêi tung hiâm mơno hâk vâ păng ‘nâng. Á xuân hiăng hmâ djâ mâu vâi o, vâi muăn tung pơlê lăm mơđah tôu chêng koăng tung leh koh tơdah a Um meăn Pôa Hồ, tôu chêng koăng mơ’nui măng tĭng a tơring Kƀang (hdrối nah). Tâng vâ tối, hiâm mơno ki mơjo pâ mê pơrá hiăng mot khâp tiô idrâp hơkâ, idrâp chêng ƀă idrâp koăng”.

Ƀă ngoh Đinh Văn Anging, tơdroăng ki hơniâp ro ôh tá xê tot pơtê  to a vâi krâ-nhŏng o ki ngăn têa kŏng tríu hâk klêi kơ’nâi rêm roh mơđah a plông kân. Laga, tơdroăng ki ngoh tôu tuăn mê pro ti lâi vâ idrâp chêng, nâl rơngê ting ting dêi hdrông kuăn ngo châ pơtối mơdêk chhâk xơtó, eăng bâ tâ tung tơdroăng rêh kâ ối hâi kố ƀă a la ngiâ. Xua ti mê, pakĭng mâu roh ki lăm tôu chêng koăng a mâu roh mơđah, mê ngoh ối rak vế dêi ihiâm mơno kơhnâ khât vâ hnê ăm mâu vâi o, vâi muăn tung pơlê pơtối châ mơhriâm tơdrá rơngê ting ting, pro hmâ ƀă chêng koăng, hơkâ, prôa t’rưng, têng nêng ƀă mâu prôa kuăn ngo ki ê.

“Á hmâ djâ mâu vâi o, vâi muăn vâ mơhriâm rơngê ting ting, ƀă tôu chêng koăng, xua ai hên vâi krâ hmâ tối, mâu vâi hdrêng nôkố bu hâk git to tơdrá chal nếo, phôn râng kŏng, ti lâi vâ tơmâng tơdrá chêng koăng ki chuât ôh tá ro lơ mâu tơdrá rơngê ting ting ki xŏn plâi to lâi chôu, to lâi phut dêi jâ pôa pin hiăng hnê ‘măn ăm. Laga, á hlo vâi rơxông nếo nôkố tung pơlê ôh tá xê vâi ôh tá vâ, xua ga, vâi ta hâi ai toh chôu, lơ ôh tá ai mơngế ki vâ pơtối hnê mơhno ăm vâi, vâ i hlê plĕng nhên ki kơnía, ki kơnâ, ki tơtro dêi chêng koăng ƀă tơdrá rơngê ting ting”.

Ngăn ngế hok tro kŭn a hơnăm ki mê nah nôkố hiăng chiâng mơngế kân hdrah, chiâng rơkê hiăng chiâng môi ngế ki rak vế tơdroăng, kế tơmeăm khoăng dêi vâi krâ pơlê, ngê̆ nhân Đinh Plơnh, krâ pơlê Đak Pơkao, cheăm Tơ Tung, kong pơlê Gia Lai ôh tá kơtôa dêi tơdroăng ki ƀriê phiu ro ƀă hâk tơngăm. Ƀă mơngế thái ki hiăng hên hơnăm hnê mơhno rak vế khôi túa, vêa vong dêi hdrông kuăn ngo, tơdroăng ki kơhnâ mơ-eăm ƀă hiăng xông kân hdrah dêi ngoh Đinh Văn Anging ôh tá xê to ki rơkê plĕng dêi môi ngế hok tro, mê ối cho hiâm tuăn mơno pói rơhêng vâ châ pơtối pơla rơxông hdrối ƀă rơxông pơtối ah nếo.

“Á phiu ro, hâk mơnê kuăn cháu tung pơlê hiăng kơdo mơ-eăm mơhriâm rơngê ting ting, mơhriâm tôu chêng koăng vâ túa lĕm tro dêi hdrông Bơhnéa ôh tá tro hía lôi. Ƀă Anging cho ngế muăn ôh tá xê to ‘nâi rak vế tơdroăng kơnía vâi krâ nah ăm to dêi tơná, mê ối chiâng, ối ‘nâi xo mâu tơdroăng, tơmeăm khoăng vâi krâ roh nah vâ djâ hnê troh a tíu ki bâ eăng ƀă vâi o, vâi muăn ki ê pơrá châ hlo, châ ‘nâi ga lĕm tro, xuân rơhêng vâ rak vế, pêi pro ƀối. Mâu ƀai rơngê ting ting ki pá, mâu idrâp chêng pơkal ai tơdroăng ki kâi chân tá tuăn i hiâm, mê muăn hiăng chiâng kâi mơhriâm ƀă pơtối hnê mơhno ăm khu pú hơnăm ối nếo, cho ‘ló rơkê păng ‘nâng. Ai ti mê ‘nôi, khôi túa lĕm tro dêi hdrông Bơhnéa kô ôh tá tro mơhía lôi”.

Ing hiâm tuăn ki châ păn roăng tung pơla mâu hâi leh mơdĭng dêi pơlê pơla, ing mâu hnoăng hnê tối kơhnâ, krâu khât dêi mâu vâi krâ, meh nhŏng ki prôk ahdrối, mê ngoh Đinh Văn Anging hâi kố hiăng pơtối rak vế ƀă hnê mơhno túa lĕm tro dêi hdrông Bơhnéa. Ngoh hlê nhên tiah kố, tơmeăm khoăng, tơdroăng chal krâ nah châ ối ƀă chal nếo, drêng kuăn pơlê ‘nâi hlê dêi tơdroăng ki kơnía git vâi krâ, vâi ‘nâi mơnê nhoăm, ‘nâi pơtối mơhriâm, ‘nâi pơtối mơđah ƀă ‘nâi hnê ‘măn ăm chal kơ’nâi ah nếo. Ƀă rêm ngế vâi o ‘nâi hơdruê môi tơdrá rơngê ting ting, ‘nâi tôu tơdrá chêng mê cho ki xiâm vâ pơtối hmŏng lo rêi vâ huăn kân xŏn drêh lĕm lâp túa tơlá lĕm tro dêi hdrông kuăn ngo Bơhnéa tơná.