Tơbleăng a hâi leh Tơrŭm, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế kal pơtối rak vế pêi pro hnoăng cheăng dêi Măt trâ̆n, mâu khu tơrŭm cheăng tung khu, mâu ƀok xối, yah chĭng ƀă mâu ngế kuăn pơlê pâ nhoăm tung tơdroăng ‘mâi mơnhông tơrŭm môi tuăn ing pơlê cheăm. Tung mê, Măt trâ̆n thế achê kuăn pơlê, hlê kuăn pơlê, pêi tro hnoăng cheăng tơmâng tơkŭm ƀă teăng mâ ăm tuăn tơmiât, tơdroăng púi vâ ki khât dêi kuăn pơlê. 

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa púi vâ mâu ƀok yah, mâu ngế cheăng ‘na kơvâ loi tĭng tiô khôp, mâu ƀok phop ƀă mâu ngế kuăn pơlê pâ nhoăm pơtối rak vế pêi pro tơdroăng ki lĕm dêi tơná tung tơdroăng hnê ‘na thế ai hiâm mơno lĕm, kơhnâ hriâm, pơlĕm dêi rơpó, pêi tơdroăng cheăng pleăng hnoăng tơná hlối tơdjêp ƀă mâu kuăn pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối tiah kố, mâu tơdroăng hriăn plĕng tơdjuôm pơla kuăn pơlê mâu hdroâng kuăn ngo, mâu ngế loi tĭng tiô khôp kal châ hnê mơhnhôk, vâ tơdroăng tơrŭm môi tuăn rế thăm krá kal ing mâu tơdroăng rơtế pêi pro, mâu hnoăng cheăng rơtế tối vâi ‘nâi.