Tối rơdêi Chin phuh Việt Nam pơtối pơhlêh tơdroăng mơdró, pro tơ’lêi hlâu ăm mâu khu mơdró kâ châu Âu, tung mê Airbus, po rơdâ tơdroăng cheăng, ‘no liăn cheăng tơtro ƀă luât Việt Nam, Ngế pro xiâm hnê ngăn tơnêi têa loi tiah kố ƀă tơdroăng tơrŭm cheăng tơniăn lĕm luâ 40 hơnăm rơtế prôk, tơrŭm cheăng pơla Việt Nam ƀă grup Airbus kô pơtối mot tung hneăng mơnhông nếo, ai pơxúa tâ, tơƀrê, xua ki pơxúa dêi tá péa pâ.

Pôa Wouter van Wersch môi tuăn khât ƀă mâu rơkong tơpui tối dêi Ngế pro xiâm hnê ngăn tơnêi têa, tối rơdêi Việt Nam cho môi tơdroăng kơjo gum xiâm dêi Airbus, khu pơkuâ ngăn hlo rôh tơ’lêi hlâu ki kân ƀă rơhêng tŏng gum, tơrŭm krá tơniăn ƀă Việt Nam; ôh tá xê to tung tơbleăng tơƀai mê ối mơjiâng tơrŭm cheăng tơnêi têa tơrŭm cheăng ton troh tá ah, mơdêk ivá ăm kơvâ tơƀai Việt Nam.