Tung dế măng tĭng khế 10, nâ Bàn Mùi Diết, ngế kuăn ngo Dao, ối a thôn 12,  cheăm tơkăng kong Ia Rvê, troh ing kơxo má a tíu pêi cheăng Vi ƀan cheăm vâ veăng rah kơxô̆ xo tơnêi pro hngêi ối. Mâi nâ lăm pêi cheăng a kong têa ê, nâ ối a hngêi păn rak péa ngế kuăn ối tơxĭn. Hngêi dêi nâ dế mơjiâng pro pơtân a tơnêi dêi nôu pâ. Tơdroăng rêh ối ki hên kơnôm pêt kơchâi, păn í, pê lo liăn drêng châ drêng ôh. Xua mê, tơdroăng châ xo tơnêi pro hngêi ối pro nâ ôh tá kâi kơtôa dêi hiâm mơno phiu ro.

“A phiu ro pá kâi tối, drêng châ tơnêi têa ăm tơnêi pro hngêi ối, tơnêi pê kâ môi tiah kố a phiu ro khât, mơnê Tơnêi têa hên ‘nâng”.

Rơtế ƀă tơdroăng phiu ro mê, pôa Đặng Tòn San, ối a thôn 13, hiăng ai vâ chê 10 hơnăm rêh ối a tíu tơkăng kong Ia Rvê la rơpŏng hngêi xuân hâi ai tơnêi ối, tơnêi pê kâ. Vâ pêi cheăng rêh ối, pôa San lăm pêi cheăng vâi ukố umê. Drêng Tơnêi têa tơbleăng luât tŏng gum ăm tơnêi, pôa San tơngah ‘nâng tơkôm tơrêm hâi vâ châ xo tơnêi, ing mê, kô ai tơnêi pêi cheăng kâ tơniăn a pơlê tơná.

“Hdrối nah, á ôh tá ai tơnêi, nôkố Tơnêi têa kơjo kum tơnêi ăm kuăn pơlê, mơnê hên, hdrối nah a lăm pêi cheăng vâi tê, nôkố ai tơnêi pê kâ á kô mơ-eăm pêi cheăng kơhnâ akố tê”.

Ƀă mâu rơpŏng kuăn pơlê môi tiah nâ Diết, pôa San, tơnêi ối cho tơdroăng ki pro tơniăn tuăn; tơnêi pê kâ cho xiâm ki vâ chôa mơnhông tơdroăng rêh ối, kơdroh kơnôm to a lăm pêi cheăng vâi tiô rơnó. Tiô tăng ngăn dêi cheăm tơkăng kong Ia Rvê, lâp tung cheăm ai 155 rơpŏng kal châ kum xoăng ăm tơnêi ƀă túa pro hlá mơ-éa tro luât ‘na tơnêi tíu.  Tung mê, 92 rơpŏng tá hâi ai tơnêi ối, tơnêi pê kâ, rơtế ƀă hên rơpŏng kal kơjo kum pê klêi hlá mơ-éa tro tiô luât xúa tơnêi.

Pêi pro tiô Pơkâ kơxô̆ 104 dêi Ngế pro ciâm hnê ngăn Chin phuh ‘na mơnhông cheăng kâ - pơlê pơla rơtế ƀă kring vế tơniăn, cheăng lêng tung kơpong Tây Nguyên ƀă Pơkâ kơxô̆ 28 dêi Hô̆i đong Kuăn pơlê kong pơlê Dak Lak ‘na luât pơkâ tŏng gum tơnêi ƀă mâu kuăn ngo cheăm Ia Rvê mơjiâng troăng hơlâ xoăng tơnêi tơtro ƀă tơdroăng kal vâ khât.

Kơpong tơnêi ối châ pơkâ ai tơnêi vâ chê 8ha, drô troăng kân pơla mâu thôn 8 troh thôn 10, klâ chiâng 198 rơpŏng. Tiô troăng hơlâ, rêm rơpŏng châ xoăng ăm 400m2, mê 200m2 tơnêi ối ƀă 200m2 tơnêi pêt loăng plâi ton hơnăm.

Hdrối vâ tơbleăng, inâi mâu rơpŏng kuăn pơlê ki châ xo tơnêi, lơgât kơchuâ nhên ƀă mâu pơkâ tơdjâk troh châ tơbleăng ăm hên ngế hlo tung 15 hâi a tíu pêi cheăng Vi ƀan kuăn pơlê cheăm. Khu pơkuâ  ngăn thôn  xuân po tơbleăng hlối ai tá mâu kăn pơkuâ, Măt trâ̆n Tơnêi têa ƀă kuăn pơlê.

Pôa Nông Văn Gióng, kăn thôn 4, cheăm Ia Rvê, ăm 'nâi tung rôh apoăng pêi pro Tơdroăng tơkêa bro 104, thôn ai 6 rơpŏng châ xo tơnêi. Kố pơrá cho mâu rơpŏng ki ai tơdroăng rêh ối pá puât, rêh ối a pơlê kố hiăng hên hơnăm la tá hâi ai tơnêi vâ pêi kâ ƀă tơniăn tíu pro hngêi ối.

“Châ tơmâng khât ngăn dêi Đảng ƀă Tơnêi têa 6 rơpŏng kuăn pơlê kố châ tơnêi têa xoăng ăm tơnêi kố mê kuăn pơlê phiu ro khât. Nôkố troh xo tơnêi a tíu ki ai khât, 6 rơpŏng tung thôn á troh ing kơxo má ƀă prôk hên ngế".

Ai tơnêi ối nếo tŏng gum kơdroh môi iâ tơdroăng ki xơpá. Vâ kuăn pơlê châ tơniăn tung rêh ối, ai tuăn vâ mơ-eăm pêi cheăng kâ vâ hluăn ing kơtiê, cheăm Ia Rvê dế pro klêi hlá mơ-éa xing xoăng 266 ha tơnêi pêi kâ a mâu thôn 7, 12 ƀă 13. Tiô troăng hơlâ dêi kong pơlê, rêm rơpŏng kô châ  xing xoăng ăm 1 ha. Tơdrêng ƀă tơnêi pêi kâ, cheăm kô tơbleăng mâu troăng hơlâ tŏng kum liăn mung kơjo gum, hnê kih thuât, rah xo hdrê pêt, mơnăn păn tơtro ƀă hyôh kong prâi, tơnêi tơníu ƀă ivá pêi cheăng dêi rêm rơpŏng.

Pôa Nguyễn Huy Tiến, Kăn pơkuâ hnê cheăng Đảng cheăm Ia Rvê, ăm 'nâi cheăm kô pơtối séa ngăn mâu ngế, tơnêi tơníu ƀă mơdêk rĕng tơdroăng pêi pro troăng hơlâ, tơdrêng amê hlối tơdjêp tŏng kum tơnêi tơníu ƀă troăng hơlâ tăng cheăng pêi ăm kuăn pơlê.

"Tung la ngiâ Đảng ủi, Vi ƀan hnê ngăn kuăn pơlê cheăm pơtối hnê mơhno ƀơrô cheăng kâ pơtối séa ngăn vâ pêi pro hnoăng cheăng ăm tơnêi ối ƀă tơnêi pêi kâ, vâ kum ăm vâi krâ nhŏng o ai tơmeăm khoăng vâ pêi kâ, veăng kum pro tơniăn tơdroăng rêh ối a kơpong tíu tơkăng kong cheăm Ia Rvê. Tơdrêng ƀă ăm tơnêi, cheăm xuân ai mâu troăng hơlâ vâ tơbleăng mâu troăng hơlâ tăng cheăng pêi, pơ'lêh tơdroăng cheăng pêi vâ vâi krâ nhŏng o tơniăn tung rêh ối, châ pêi kâ tơniăn ta ah a kơpong tíu tơkăng kong".

Ing mâu ƀăng tơnêi apoăng troh tơdroăng pơkâ xing xoăng tơnêi pêi kâ, troăng hơlâ tŏng kum tơnêi tơníu a Ia Rvê dế chôa 'lâng pêi pro troh tơdroăng ki kal khât dêi kuăn pơlê hdroâng kuăn ngo. Ki tơƀrê dêi troăng hơlâ tŏng gum ôh tá xê to a kơxô̆ rơpŏng châ xing xoăng tơnêi, mê ối a tơdroăng kum kuăn pơlê ai tíu pro hngêi ối tơniăn, ai tơnêi vâ pêi kâ ƀă pêi lo liăn ton xŏn.

Kố xuân cho tơdroăng ki kal vâ kuăn pơlê hmiân tuăn pêi cheăng kâ, rêh ối ƀă kơpong tơkăng kong, veăng mơnhông cheăng kâ - rêh ối pơlê pơla ƀă rak vế tơniăn tung kơpong.