Tơdroăng ki tâp ‘mế 2 to kơxêng kiâ mố đô̆i hlâ tung môi rôh tơplâ hơnăm 1962 châ pôa Trần Xuân Lý, 71 hơnăm, kuăn pơlê thôn Trung Lương 1, tơbleăng. A thôn Trung Lương 1, cheăm Tuy An Tây, khu ki ai tơdjâk tăng hlo 2 to kơxêng kiâ châ kơxuô tung môi ché, rơtế ƀă mâu kế tơmeăm ki ê. Pơchông ngăn ƀă tơdroăng ki tơbleăng dêi ngế ki tối ăm ‘nâi, khu kố mơnhên kố cho kơxêng kiâ mố đô̆i ƀă hlối tơkŭm tiô pơkâ.

Nôkố 2 to kơxêng kiâ mố đô̆i kố châ ‘măn rak, xối pleăng a Ilâng kiâ mố đô̆i Tuy An Tây, cheăm Ô Loan, kong pơlê Dak Lak. Riân troh nôkố, tung rôh pêi cheăng thâ 500 hâi măng tăng rôu, tơkŭm ƀă mơnhên inâi kơxêng kiâ mố đô̆i, Đô̆i K51 hiăng tăng, tơkŭm châ 54 to kơxêng kiâ mố đô̆i a kong pơlê Dak Lak ƀă kong pơlê Mondulkiri, kong têa Kul.