A Đông Mô đô̆i gâk tơkăng kong tíu tê mơdró ngi kong têa ê Lệ Thanh, troăng pêi “Rêm măng tĭng gum môi rơpŏng kơtiê kơpong tíu tơkăng kong’’ châ pêi pro ƀă 52 đảng viên pơkuâ 132 rơpŏng kuăn pơlê, ki hên cho rơpŏng kơtiê. Mô đô̆i tŏng gum hâi pêi cheăng, hnê mơhno kuăn pơlê rak ngăn loăng plâi, rak ngăn dêi kơdrum chiâk deăng, mơdêk châ tơƀrê pêt mơjiâng tơmeăm. Nâ Hi Kri, hdrông kuăn ngo Hre, rơpŏng kơtiê a pơlê Bi, cheăm Ia Dom, kong pơlê Gia Lai, cho môi tung mâu ngế châ mô đô̆i gâk tơkăng kong tŏng gum.

Tơdroăng rơtế, hnê mơhno tâi ihiâm mơno dêi mâu ngế lêng gum rơpŏng nâ Hi Kri ai tơ’nôm liăn ngân vâ rak ngăn dêi kơdrum deăng pêt mơjiâng tơmeăm khoăng ƀă tơdroăng rêh ối.

“Phiu ro ‘nâng, ối ƀă mô đô̆i mê tơniăn ‘nâng. A tíu tơkăng kong mê rơpŏng á xuân ối achê ƀă mô đô̆i, mô đô̆i gum rơpŏng ngin hên ‘nâng. Rơpŏng á mơnê hên’’.

Ôh tá xê to rơtế prôk ƀă kuăn pơlê tung pêi cheăng, pêt mơjiâng tơmeăm, kăn ƀô̆, mô đô̆i Đông tơkăng kong Tíu tê mơdró ngi lâp plâi tơnêi Lệ Thanh ối tơmâng tŏng gum mâu rơpŏng ai hnoăng tơnêi têa, mơngế ai hnoăng ƀă kăch măng. Rêm khế, tíu pêi cheăng tơkŭm lăm pôu, kơ-êng, diâp kơxuô tơmeăm, khăm ngăn ivá ƀă xing xoăng pơkeăng tê kơtê ăm mâu rơpŏng ki ai hnoăng tung pơlê. Mâu tơdroăng pêi cheăng ki tuăn pâ gum tŏng gum rak ngăn tơdroăng rêh ối, mơhno ihiâm mơno pôu râng hnoăng dêi ngế lêng ƀă mâu ngế hiăng pleăng, tah lôi dêi tơdroăng krê tơná vâ pêi cheăng ăm Tơnêi têa.

Mô đô̆i rong châ - tamo 4/4 cho pôa Rơchăm Nich, ối a thôn Moóc Đen, cheăm Ia Dom, tâ nhên tơdroăng ki hơ-ui, tơrŭm mê ing mâu rôh châ mô đô̆i pôu kơ-êng, tŏng gum khăm pơlât châi tamo tung mâu rôh leh, Têt:

“Châi tamo tâng ôh tá teăm vâ lăm hngêi pơkeăng mê troh hngêi pơkeăng a pơlê Bi dêi mô đô̆i gâk tơkăng kong xuân châ khăm pơlât. Tối tơdjuôm, nhŏng o mô đô̆i gak tíu tơkăng kong drêng troh a hâi leh, hâi têt mê nhŏng o đi đo troh lăm pôu rơpŏng hngêi á, diâp ăm á kơxuô tơmeăm. Nhŏng o a pơlê tiah mê tê, kơbố xuân hơ-ui, xuân kơnía tâi tâng’’.

Ing mâu tơdroăng pêi ki nhên tung rak ngăn tơdroăng rêh ối, tơdroăng pêi cheăng pơtâng tối kuăn pơlê tơveăng gak kring tíu tơkăng kong. Đăi ŭi Trần Tuấn Linh, Cheăng kal kí phŏ Đông mô đô̆i gak tíu tơkăng kong lâp plâi tơnêi Lệ Thanh, tối ăm ngin ‘nâi, đông lêng hiăng pêi pro hên tơdroăng tơmiât troh tíu pêi cheăng môi tiah mơjiâng hngêi Tuăn Pâ, hngêi Tơrŭm, lăm pôu, kơ-êng rơpŏng ai hnoăng, tŏng gum kơxô̆ liăn kih thuât mơnhông cheăng kâ. Ing mê, kuăn pơlê ai tơ’nôm liăn ngân tơniăn tơdroăng rêh ối, tơdrêng amê mơdêk hlê plĕng, pôu râng hnoăng cheăng tung tơrŭm kring vế, gak ngăn tơniăn a pơlê.

“Ing mâu troăng pêi gum kuăn pơlê mơnhông cheăng kâ mê kuăn pơlê kơpong tíu tơkăng kong xuân hiăng ai tơdroăng ki loi tơngah ƀă Mô đô̆i gâk tíu tơkăng kong. Ki rơhêng vâ tối rơtế ƀă mô đô̆i gâk tơkăng kong trối môi “tơneăn rêh” pêi cheăng, pêt mơjiâng tơmeăm, prôk a kơpong tíu tơkăng kong đi đo tơrŭm ƀă Mô đô̆i gak tơkăng kong, khu cheăng tung kơpong, tíu tê mơdró ngi kong têa ê tơniăn lĕm, gak kring tơniăn pơlê pơla’’.

Drô troăng tíu tơkăng kong dêi kong pơlê Gia Lai, tơdroăng tŏng gum rêh kâ ối kuăn pơlê đi đo ƀă hnoăng cheăng pơtâng tối, hnê mơhnhôk kuăn pơlê veăng gâk ngăn, kring vế troăng tơkăng, tơniăn khât. A Đông mô đô̆i gak tíu tơkăng kong Ia Puch, kăn ƀô̆, mô đô̆i ối a pơlê, tơrŭm ƀă khu râ kăn pơkuâ cheăng Đảng, khu râ kăn pơkuâ ƀă mâu ngế ki kuăn pơlê loi tơngah pơtâng tối, mơhnhôk kuăn pơlê mơdêk kơchăng, hbrâ veăng rak ngăn, kring vế tơniăn. Trung tă Nguyễn Đăng Dũng, Ngế Mơhnhôk kuăn pơlê, Đông mô đô̆i gak tíu tơkăng kong Ia Puch, tối:

“Tơdroăng cheăng mê đi đo lăm troh a tơrêm pơlê cheăm vâ ‘nâi tơdroăng, “pái kuâ, pŭn rơtế” ƀă kuăn pơlê, klêi mê tơbleăng tối ăm krâ pơlê, kăn pơkuâ thôn pói vâi krâ kuăn pơlê rơtế ƀă khu râ kăn pơkuâ hnê ngăn cheăng Đảng, mâu kăn hnê ngăn ƀă kăn ƀô̆ mô đô̆i gak ngăn, kring vế tơniăn. Pakĭng mê, ối hnê mơhnhôk, pơtâng tối kuăn pơlê rak ngăn dêi kơdrum deăng, chiâk deăng, pêt mơjiâng kế tơmeăm.’’

Rơtế ƀă tơdroăng kuâ tơrŭm ƀă kuăn pơlê, ‘nâi tơdroăng tung pơlê, mâu tơdroăng pêi, môi tiah: “Gum o troh hngêi trung”, “Kuăn roăng đông mô đô̆i gak tíu tơkăng kong”, “Hngêi hơtô tơkăng kong” ƀă tơdroăng lăm kơ-êng, tơpui tơno, tŏng gum kuăn pơlê rôh leh, Têt pơtối gum vâi krâ-nhŏng o pêi pro tro tiô troăng hơlâ rêh ối pơlê pơla, tŏng gum rơxông ối nếo ƀă mâu rơpŏng pá puât.

Jâ Siu H’Ler, Kăn pơkuâ Đảng ủi, Kăn hnê ngăn Hô̆i đong kuăn pơlê cheăm Ia Puch, mơnhên tối, tơrŭm cheăng pơla Mô đô̆i ƀă khu râ kăn pơkuâ hnê ngăn cheăng Đảng, khu kăn hnê ngăn kuăn pơlê rế hía rế châ mơnhông krá tơniăn, mơjiâng chiâng ivá ki rơdêi tung tâi tâng rêm khu râ vâ mơnhông cheăng kâ - rêh ối pơlê pơla ƀă kring vế, gak ngăn tơniăn tơkăng kong.

“Mâu vâi ngoh tung khu mô đô̆i gâk tíu tơkăng kong đi đo hbâ tơrŭm rơtế tơbleăng ăm khu râ kăn pơkuâ hnê ngăn cheăng Đảng, pêi pro mâu hnoăng cheăng tơdjâk troh tơniăn kring vế,  gak ngăn a mâu tíu pa kong tơkăng kong. Tơdrêng amê, gum kuăn pơlê xăm kơklêa, kơdroh kơtiê, mơjiâng thôn pơlê, tơrŭm ƀă mâu khu séa ngăn kring vế tơkăng kong dêi tơnêi têa’’.

Tơdroăng ki ai khât nôkố a mâu tíu tơkăng kong ăm hlo, kring vế, gak ngăn hnoăng pơkuâ rak tơnêi têa ôh tá xê kơnôm to a mâu tơdroăng séa ngăn, pơkuâ mê ối kal ai hiâm mơno môi tuăn, tơdjuôm ivá ki ó rơdêi dêi kuăn pơlê. Drêng kuăn pơlê loi tơngah, hbrâ tơrŭm ƀă khu cheăng, tơdroăng gâk kring kơpong tíu tơkăng kong châ pêi pro rơdêi ing pơlê. Đăi tă Đoàn Ngọc Báu, Chính ủi, Khu pơkuâ Mô đô̆i gâk tơkăng kong dêi kong pơlê Gia Lai tối ăm ngin ‘nâi, kố cho xiâm kối vâ mâu cheăm kơpong tơkăng kong châ rak tơniăn, pro tơ’lêi hlâu tung mơnhông pêt mơjiâng kế tơmeăm ƀă mơdêk tơdroăng rêh kâ ối tơrêm pơlê pơla.

“Pêi pro mâu hnoăng cheăng ‘nâi nhên tơdroăng a pơlê pơla, klêi mê ‘nâi mâu ngế vâ hbrâ kring vế, gak ngăn tơniăn kơpong tơkăng kong, tơdrêng amê kơhnâ păn mơnăn mơnôa, pêt mơjiâng kế tơmeăm vâ gum kuăn pơlê mơnhông cheăng kâ, rak vế khôi túa lĕm tro dêi pơlê pơla’’.

Rak krá hnoăng pơkuâ, kring vế, gak ngăn tíu tơkăng kong ƀă rak ngăn tơdroăng rêh ối kuăn pơlê cho péa hnoăng cheăng thế pêi krá. Ing mâu hâi pêi cheăng gum kuăn pơlê pêi chiâk cheăng, tơdroăng ki veăng gum ƀă mâu rơpŏng ai troăng hơlâ tơnêi têa tŏng gum troh tơdroăng mơhnhôk kuăn pơlê veăng kring vế, gak ngăn troăng tơkăng kong, rak ngăn tơneăn tơkăng, Mô đô̆i gâk tíu tơkăng kong dêi kong pơlê Gua Lai dế veăng gum pêi pro tơdroăng tâi tâng kuăn pơlê veăng gâk kring, mơjiâng kơpong tơkăng kong tơniăn lĕm, hơniâp ro.

Drêng tơdroăng rêh ối rế châ tŏng gum, tơdroăng loi tơngah ƀă pôu râng hnoăng dêi kuăn pơlê ƀă hnoăng cheăng gak ngăn, kring vế tơkăng kong xuân thăm rế châ tơbêng, mơjiâng xiâm kối vâ kơpong tíu tơkăng kong Gia Lai châ mơnhông krá tơniăn păng ‘nâng.