Sap ing lối 70 tơdroăng tơbleăng tối ki kơnía ‘na mâu mố đô̆i hlâ tung mâu rôh tơplâ, lối 2 khế hdrối Đô̆i ki tăng rôu, tơkŭm kơxêng kiâ mố đô̆i K75 kong pơlê Lâm Đồng hiăng pêi pro 32 rôh lăm ngăn, pơtroh lối 800 ngế veăng rơtế ƀă mâu rơxế ki chiâ, kui lối 2.100 met khô̆i tơnêi, tăng rôu, tơkŭm châ 26 to kơxêng kiâ mố đô̆i a 9 to cheăm, bêng tung kong pơlê, Trung tă Trần Xuân Hồ, Đô̆i trưởng Đô̆i K75, Khu pơkuâ ngăn lêng kong pơlê Lâm Đồng, ăm ‘nâi, tung pơla pêi pro hnoăng cheăng đô̆i đi đo châ xo tơdroăng ki tŏng gum kơhnâ dêi kăn pơkuâ ƀă kuăn pơlê dêi kong pơlê kố.

“Mâu cheăm bêng malối cho Hô̆i đong tŏng gum mâu cheăm, bêng ngin lăm chu troh pêi cheăng ngin tŏng gum khât, tá mâu rơxế, tơmeăm, tá mâu liăn ngân vâ tơkŭm tăng rôu. Kuăn pơlê a cheăm bêng kố xuân tŏng gum, môi tuăn khât ôh tá kal chêl thiê̆n, ‘nhiê tah ki klâi ôh”.

Ƀă tơdroăng ki tăng rôu, tơkŭm kơxêng kiâ mố đô̆i a tíu ki ê, Hneăng má 1 dêi tơdroăng cheăng pêi thâ 500 hâi măng, kong pơlê Lâm Đồng pêi pro kơtăng khât cheăng xo xâk kơxêng vâ mơnhên tối inâi ngế mố đô̆i hlâ mê a 11 to ilâng kiâ mố đô̆i tung pơlê. Thươ̆ng tă Trần Thanh Sơn, phŏ pơkuâ Chính trị Khu pơkuâ ngăn lêng kong pơlê Lâm Đồng, ăm ‘nâi, mâu ilâng kiâ ƀă mâu tơnâp kiâ mố đô̆i hiăng tơkâ luâ hên rôh ‘mêng pro, mê tơdroăng ki rôu, tơdah xo kơxêng kiâ mố đô̆i trâm hên xơpá.

Rêm ngế kăn ƀô̆, mố đô̆i pêi pro hnoăng cheăng pơrá kơhnâ khât “tơkâ luâ kong tôu, kong mê” ƀă đi đo hnê pơchân dêi tơná athế rak tơniăn tơdroăng la rế hía rế kơhnâ krâu khât:

“Hyôh kong prâi tung hneăng ki kố ôh tá tơniăn khât. Kong mêi pơtối la nhŏng o xuân ối mơ-eăm pêi. Pêi sap ing kơxo troh kơhâi dế troh kơxê măng xuân ối mơ-eăm tơbleăng pêi klêi tơdroăng tro má môi. Túa pơkâ xo xâk, kơxêng pêi tro tiô pơkâ dêi Khu pơkuâ ngăn lêng pơkâ, ing mê pơhlêh, tơdah xo kơxêng kiâ tá troh xo xâk, kơxêng ƀă mơdrếo tơnâp vâ pôi tá tro nhôm”.

Tung 4.776 to tơnâp kiâ mố đô̆i tá hâi ‘nâi inâi a 11 to ilâng kiâ, khu ki ai tơdjâk troh kong pơlê Lâm Đồng hiăng xo xâk kơxêng pơcháu ăm Viện Pháp y Quân đội, Khu pơkuâ ngăn lêng vâ séa ngăn ADN. Kŏng an kong pơlê Lâm Đồng hiăng mơjiâng 16 tíu ki tơdah xo túa tơkŭm, tơdah xo 1.371 túa dêi nhŏng o vâi tiô peăng nôu dêi mâu ngế mố đô̆i tá hâi ‘nâi inâi châ tơbleăng, tơkâ luâ 5 ngế tâng vâ pơchông ƀă tối hdrối.

Mơnhên tối dêi Kuân khu 7, ăm hlo, tung Hneăng má 1 Tơdroăng cheăng pêi thâ 500 hâi măng, Lâm Đồng hiăng tơbleăng pêi pro krá tơniăn, tơƀrê, tơniăn 6 nhên; tơbleăng tơdroăng, hnê tối tơdâng tơ’mô, tơdjâk trâu hngế; tăng rôu, tơkŭm ƀă khŏm mơ-eăm, pôu râng hnoăng ƀă mơnê khât; cheăng xo túa a mâu ilâng kiâ mố đô̆i châ pêi pro tơdâng tơ’mô, kơtăng, tơƀrê. Pôa Đinh Văn Tuấn, Phŏ kăn hnê ngăn Vi ƀan kong pơlê, ngế pơkuâ khu ki tăng rôu, tơkŭm ƀă mơnhên inâi kiâ mố đô̆i kong pơlê Lâm Đồng, ăm ‘nâi, apoăng dêi hneăng má 1 cheăng pêi thâ 500 hâi măng cho ivá vâ kong pơlê pơtối tăng rôu, djâ mâu ngoh mố đô̆i ki hlâ vêh dêi ƀă pơlê xiâm, rơpŏng hngêi ƀă pú hmâ:

“Lâm Đồng hiăng pêi klêi 3 khế hdrối nah. Cho tíu pêi cheăng rĕng má môi tung 4 kong pơlê dêi kuân khu. Kố cho tơdroăng ki ro tung Khu hnê mơhno ƀă mâu khu ki veăng tơdrêng tung pêi pro hnoăng cheăng”.

Đăi tă Nguyễn Thanh Quảng, Phŏ pơkuâ ngăn Đảng Khu pơkuâ ngăn lêng kong pơlê, Phŏ Khu hnê mơhno tăng rôu, tơkŭm ƀă mơnhên inâi kơxêng kiâ mố đô̆i kong pơlê Lâm Đồng, tối:

“Tung hneăng ki kố ai hnoăng cheăng pin tá hâi pêi klêi mê cho cheăng tăng rôu, tơkŭm kơxêng kiâ mố đô̆i. Túa pơkâ dêi Khu hnê mơhno râ kong pơlê pơcháu ăm khu ki tăng rôu ƀă pin mơ’no tơdroăng pơkâ pêi 50 to kơxêng kiâ mố đô̆i mê nôkố pin nếo châ 26 to kơxêng kiâ mố đô̆i. Hneăng má 1 tá hâi klêi, tá tơniăn”.

Mot tung hneăng má 2 cheăng pêi thâ 500 hâi măng, sap ing nôkố troh hâi lơ 27/7/2027 kong pơlê Lâm Đồng pơkâ pêi tăng rôu, tơkŭm châ 124 to kơxêng kiâ mố đô̆i. Ƀă mâu ngế ki veăng pêi tơdrêng hnoăng cheăng, rôh tăng rôu ôh tá xê to rôh ki tơbriât ƀă hâi khế mê ối cho rôh mơnê mâu ngế ki hiăng hlâ xua Tơnêi têa. Ƀă hnoăng cheăng dêi tơná, ƀă tơdroăng ki kơhnâ ƀă khŏm mơ-eăm, kong pơlê Lâm Đồng dế mơ-eăm djâ tơ’nôm mâu ngoh ki hiăng hlâ vêh dêi ƀă pơlê xiâm, mơhno tơdroăng ki tơkôm dêi mâu nhŏng o ƀă mâu vâi pú.