Ngoh Y Doăn Niê, ối a buôn Alê A, bêng Buôn Ma Thuột ai tối tơbleăng ‘na tơdroăng ki cài đặt VNeID a phôn râng kŏng ki rơkê plĕng tơná hiăng châ pêi pro kơtăn ing hâi kố châ 2 hơnăm ƀă nôkố hiăng châ cài đặt troh a kơlo má 2. Nếo achê pơla kố, klêi kơ’nâi tơ’mot bêng, Tơdroăng “Bình dân học vụ số” hiăng châ pêi pro a bêng, ngoh ối hnê tối ‘na tơdroăng ki pro hlá mơ-éa a phôn râng kŏng dêi tơná, ƀă ngoh hiăng chêh tối ‘na mâu tơdroăng ăm dêi kuăn kơnốu tơná hbrâ vâ lăm pêi cheăng a kong têa Hàn Quốc a mơ’nui hơnăm kố:

“Hbrâ tŭm têk mâu hô sơ, á chêh bro ƀối tiô tơdroăng hnê tối dêi kăn ƀô̆ hdrối mê, ki apoăng á mot đăng nhập a Cổng thông tin dịch vụ dêi Khu xiâm ngăn ‘na Kŏng an, pơtối mê, troh a tơdroăng đăng nhập tài khoản mot tung dịch vụ công dêi tơnêi têa ƀă chêh tối dêi tài khoản. Klêi mê nếo, mot tung dịch vụ ki ăm pin hộ chiếu ƀă hnối chêh tối tŭm têk mâu tơdroăng tơná pin mot a mục nộp hô sơ trực tuyến. Klêi kơ’nâi hiăng chêh tối tro, tŭm têk mâu tơdroăng ki mê, pin tiê drăng thanh toán trực tuyến tiô kơ tài khoản ƀă mơdrếo hộ chiếo a hngêi. Klêi thanh toán mê tơkôm 15 hâi kơ’nâi ah kô hiăng kêi”.

Klêi kơ’nâi pơkâ thế pêi pro 3 pơla măng tĭng, tơdroăng “Bình dân học vụ số” dế châ po rơdâ tro tiô tơdroăng a Dak Lak. A hên cheăm hiăng mơjiâng mâu Tôh Kŏng ngê̆ kơxô̆ pơlê pơla, cho xo tơná kăn ƀô̆, mâu ki veăng cheăng a cheăm vâ tơ’lêi hlâu tung tơdroăng lăm pôu, hnê tối a tơrêm hngêi trăng dêi kuăn pơlê. Pôa Y Păm Ƀyă, Kăn tôh ngăn ‘na Tôh Kŏng ngê̆ kơxô̆ ƀuôn H’ra Ea Hning, cheăm Dray Bhăng, kong pơlê Dak Lak tối ăm ngin ‘nâi, klêi kơ’nâi châ hriâm kố, pôa hiăng hlê plĕng nhên ƀă hiăng chiâng vâ hnê tối ăm kuăn pơlê chiâng chêh bro dêi xêh mâu tơdroăng tung trực tuyến, trối mâu hlá mơnhên tơnêi tíu, inâi on veăng-rơpŏng hngêi, phĭu khăm pơlât tamo châi, phĭu ƀaoh hiêm pơlê pơla.

“Á troh a pơlê kô krếo thế teăng mâ dêi 430 rơpŏng tung pơlê troh a Hngêi hôp dêi pơlê vâ “hnê tơdrêng ăm vâi krâ-nhŏng o”, tơdroăng hnê tiah mê ga gum ‘na tơdroăng chêh tối rĕng, tơ’lêi há. Klêi mê, vâ pơtối hnê i rơhí rơhó, pơtối gum ăm nhŏng o ki ê tung rơpŏng hngêi tơná ‘na tơdroăng chêh bro kố. Ing mê, rế hía rế ai hên vâi krâ-nhŏng o tung pơlê rơkê nhên khât ‘na chêh bro tung kŏng ngê̆ ƀă ing phần mềm VNeID”.

Kong pơlê Dak Lak vêh mơnhên kŏng ngê̆ kơxô̆ cho ki xiâm vâ mơjiâng khu kăn pơkuâ ngăn tơdroăng cheăng cho iâ ngế, la rơkê khât, pêi cheăng châ tơƀrê. Xua ti mê, tơdroăng ki pêi pro, chêh bro mâu hlá mơ-eá tung kơmăi cho tơdroăng cheăng thâ rĕng pêi pro ƀă tâi tâng mâu cheăm, bêng. Pakĭng mê, tơdroăng “Bình dân học vụ số” hiăng châ thăm mơdêk hên tâ vâ mơnhông ki rơkê dêi mơngế kuăn pơlê tung xúa mâu tơmeăm ứng dụng ki rơkê plĕng.

Pôa Nghiêm Văn Chuẩn-Kăn pơkuâ hnê ngăn Đảng uỷ cheăm Dray Bhăng, kong pơlê Dak Lak tối ăm ngin ‘nâi, cheăm hiăng mơjiâng 24 tôh cheăng ‘na kŏng ngê̆ kơxô̆ pơlê pơla, a 24 to thôn pơlê. Ki xiâm dêi tơdroăng cheăng kố, mê tung khế 8 kố ah, ai lối 9.700 rơpŏng kuăn pơlê dêi cheăm, rêm rơpŏng ki vâ iâ ai 1 ngế ki rơkê chêh bro tung ứng dụng VNeID ƀă chiâng pêi pro mâu tơdroăng ki xúa ing ứng dụng ki kố. Troh tâi hơnăm 2025, mơni kô mơ’no pro trực tuyến tơdrêng ăm mâu tơdroăng vâ chêh bro tung hlá mơ-éa.

“Tôh ki cheăng  ‘na kŏng ngê kơxô̆ pơlê pơla xua kơnôm ngin hiăng hnê tối rơkê ƀă hbrâ ăm tơdroăng lăm troh tơrêm toăng hngêi vâ hnê ăm vâi krâ-nhŏng o, hnê ăm mâu ngế ki teăng mâ tung rơpŏng hngêi chiâng rơkê khât tung tơdroăng ki vâ chêh bro tŭm têk mâu tơdroăng chêh tối tung măng internet. Pói tơnah dêi ngin mê teăng mâ rêm rơpŏng hngêi troh a mơ’nui hơnăm 2025 ah kô ai lối 90% rơpŏng hngêi ki chiâng vâ chêh bro tŭm mâu hlá mơ-éa tung măng internet kố”.

Maluâ pơkâ pêi pro tơdroăng kố tá hâi teăm ton, tơdroăng “Bình dân học vụ số” hiăng chôa ‘lâng vâ tah lôi tơdroăng ki lot ‘na chêh bro tung kŏng ngê̆ kơxô̆ a mâu pơlê cheăm dêi Dak Lak. Ki rơkê plĕng dêi kuăn pơlê xuân hiăng châ mơnhông, ôh ta xê to gum ăm vâi krâ-nhŏng o châ hlê plĕng nhên mâu tơdroăng ki chêh tối tung trực tuyến mê ối cho ki xiâm vâ khu kăn hnê ngăn mơjiâng mâu kăn pơkuâ ki iâ ngế, la pêi cheăng châ tơƀrê. Tơdroăng ki rơtế pêi pro, kâi chân ƀă “hnê tơrêm ngế pơrá pêi pro” dêi mâu tôh kŏng ngê̆ kơxô̆ pơlê pơla xuân hiăng po ăm tơdroăng pói tơngah ki nếo ăm mâu  tơdroăng ki vâ rak vế krá kâk ‘na cheăng kŏng ngê̆, khu kăn hnê ngăn ƀă kuăn pơlê.