Kố cho rơkong mơnhên dêi Pôa Hồ Chí Minh, Kăn xiâm hnê ngăn tơnêi têa a hơnăm 1945 ‘na tíu cheăng, hnoăng cheăng dêi tơdroăng tơpui kâ ƀă kong têa ê. Ƀlêi trâng Điện Biên Phủ 1954 cho ki chuât dêi chêng lâp plâi tơnêi, chuât têi a Hneăng hôp Geneva, pâm tơ’nhê tâi tâng tơdroăng ki vâ mot plâ tơbriât dêi thưk yân Pơhlăng, pơklât thế vâi ‘nân a kơƀăng tơpui tơno ƀă Chin phuh Yân chuh kŏng hoa. Pôa Bùi Thanh Sơn, Phŏ Ngế pro xiâm hnê ngăn tơnêi têa mơnhên, Tơdroăng pơkâ Geneva 1954 cho môi tơdroăng ki hdró tung tơdroăng roh ton nah tơpui kâ ƀă kong têa ê kăch măng Việt Nam, djâ ki tơbâ troăng tơmiât, troăng pêi ƀă ngê̆ thuât tơpui kâ ƀă kong têa ê dêi Pôa Hồ Chí Minh:

‘’Tơdroăng tơpui kâ, kĭ tơkêa ƀă pêi pro Tơdroăng pơkâ Geneva cho kơxop mơ-éa hên túa ki rơkê tơtro trâu hơngế mơhno khôi túa lĕm má môi dêi khu rơkê tơpui kâ ƀă kong têa ê ƀă tơpui kâ Việt Nam, hiăng châ xúa rak mơnhông, xúa ki rơkê tơtro ƀă mơnhông mơdêk tung tơpui kâ, kĭ tơkêa ƀă pêi pro Tơdroăng pơkâ Paris 1973 la ngiâ ah xuân môi tiah tung mơjiâng, mơnhông mơdêk tơnêi têa ƀă gâk kring Tơnêi têa hâi kố’’.

Mâu rơxông kơ’nâi đi đo hâk tơngăm ‘na ƀlêi trâng Điện Biên Phủ tối krê ƀă mâu roh tơplâ xâ lêng kong têa ê tối tơdjuôm vâ rơtế mơ-eăm hên tâ, khŏm mơ-eăm hên tâ tung roh mơjiâng tơnêi têa hơniâp lĕm, rơdêi ‘nâng, mơnhông kro mơdrŏng. Phŏ Yăo sư – Tiê̆n sih Nguyễn Đức Hòa, Hngêi trung Đăi hok Sài Gòn, tối:

‘’Tiô á tối, ki kơnâ, tơdjâk dêi tơdroăng ki kal xuân ối trâu rơdâ ƀă pin thế ‘nâi mơnhông. Lâp plâi tơnêi hiăng ‘nâi troh um méa khên tơnôu môi hdroâng mơngế ƀlêi trâng a Điên Biên Phủ, mê lâp plâi tơnêi xuân kal hlo môi tơnêi têa Việt Nam rơdêi ‘nâng, mơnhông kro mơdrŏng. Tiah mê tơdroăng pâ vế tung ngôa ‘na tơdroăng rơdêi ‘nâng dêi Điện Biên Phủ ôh tá  hiá tung hiâm mơno kuăn pơlê Việt Nam ƀă kuăn pơlê lâp plâi tơnêi’’.

Hdrối mâu tơdroăng ki ôh tá tơniăn tung lâp plâi tơnêi nôkố, xúa ki rơkê mâu túa ki rơkê tơtro ing tơdroăng tơplâ xâ, Việt Nam hiăng tơleăng tro mâu tơdroăng tơrŭm cheăng tơpui kâ tiô tơdroăng ki rak krá pơkâ, ƀeăn ƀĕng tung troăng pêi ƀă tơpui kâ, mơdêk tơdroăng ki tơrŭm nhŏng o, rak krá tơpui kâ ƀă tơrŭm cheăng. Kơnôm mê, rế rak tơdroăng rêh ối hơniâp lĕm, tơniăn, gâk kring krá tơniăn krê, hnoăng pơkuâ ƀă tâi tâng tơnêi tơníu, rế mơdêk tơrŭm cheăng kum mơnhông cheăng kâ – rêh ối pơlê pơla.