Pŭn ngế thái cô  dêi kong pơlê Dak Lak hiăng hâk tơngăm châ pơxá inâi Thái cô hnê rơkê, mê cho: pôa Phạm Đăng Khoa, Kăn hnê ngăn Khu mơhnhôk hriâm, Ngế pơkuâ ngăn Hnê hriâm ƀă hnê mơjiâng tuăn ngôa rơkê; pôa Đỗ Tường Hiệp, kăn phŏ pơkuâ; jâ Thái Thị Mỹ Bình, cheăng tung Ƀơrô ngăn hnê hriâm ƀă hnê mơjiâng tuăn ngôa rơkê kong pơlê Dak Lak ƀă pôa Quách Đình Bảo, Ngế pơkuâ hngêi trung râ má môi Ea Hleo, tơring Ea Hleo.

Tơbleăng rơkâu, Kăn hnê ngăn Vi ƀan kong pơlê  Dak Lak tơmâng xo ƀă khêĕn kơdeăn mâu hnoăng hiăng pêi châ tơƀrê, pleăng hnoăng tơná dêi mâu thái, mâu cô ‘na kơvâ hnê hriâm ƀă hnê mơjiâng tuăn ngôa rơkê dêi kong pơlê tung mâu hơnăm hdrối mê hía nah. Pakĭng mê púi vâ, ƀă tơdroăng mơ-eăm khât, tơrŭm môi tuăn dêi rơpó tung pơkuâ hnê mơhno, pơkuâ djâ dêi mâu kăn ƀô̆ rak ngăn, kơhnâ pêi cheăng tá hiâm tuăn dêi thái cô, mâu ngế pêi cheăng dêi kơvâ hnê hriâm, kơhnâ tung hnê hriâm dêi mâu vâi o hok tro, kơvâ hnê hriâm ƀă hnê mơjiâng tuăn ngôa rơkê kong pơlê Dak Lak kô tơkâ luâ xơpá pê klêi hnoăng cheăng pơcháu.