Dak Lak nôkố ai lối 4.100 toăng plong tuk, tung mê ai 428 toăng plong tuk ai ki têi 90CV dế tơnăng ká xi xŏng a têa kơxĭ. Drô 189 km kĭng têa kơxĭ, lối rơpâu rơpŏng kuăn pơlê rêh ối, păn ká xi xŏng ƀă tê mơdró ká xi xŏng ƀă ôm hyô a têa kơxĭ. Tung pơla mot tung rơnó mê khía mơhot, khu ki ai tơdjâk ƀă kuăn pơlê, kong pơlê Dak Lak hiăng hbrâ rơnáu hên troăng hơlâ hbrâ ví khía mơhot têa kân lân lu, rak tơniăn ăm kuăn pơlê, kế tơmeăm ƀă kơdroh iâ ki tro tơ’nhiê mâu kế tơmeăm khoăng.

Kơpong kơno Vũng Rô, cheăm Hòa Xuân Nam, nôkố ai 140 toăng plong tuk sap ing kong pơlê hmâ tot ối. Kố cho kơpong ki ôh ti ai khía, châ ngăn cho tíu ki hmuâ ối tơniăn dêi mâu plong tuk tung pơla khía mơhot têa kân lân lu. Pakĭng cheăng rak vế tơkăng kong têa kơxĭ, khu ki ai tơdjâk gâk kăng kong tíu pêi cheăng đi đo tơrŭm hbrâ ví ƀă khía mơhot têa kân lân lu, tŏng gum kuăn pơlê tơnăng ká xi xŏng ƀă kuăn pơlê rêh ối a têa kơxĭ.

Tơdroăng ki hbrâ rơnáu dêi mâu khu ki ai tơdjâk gum kơdroh iâ tơdroăng ôh tá mơhúa, pro tơdroăng loi vâ vâi krâ kuăn pơlê pơtối tơnăng ká xi xŏng a têa kơxĭ tơniăn, veăng gum rak vế hnoăng pơkuâ ƀă mơnhông cheăng kâ kong pơlê.