Hâi lơ 18/4, Khu tŏng kum mơngế chó chêng tơvê kŏng ƀă gâk kring hnoăng vâi hdrêng kong pơlê Dak Lak tơkŭm po Hneăng hôp kheăn kơdeăn mơngế chó chêng tơvê kŏng, vâi hdrêng kuăn tê ƀă mơngế tŏng kum ki hên tung kong pơlê roh má I, hơnăm 2023. A Hneăng hôp, 16 ngế chó chêng tơvê kŏng ƀă 16 ngế vâi hdrêng kuăn tê ki kơhnâ rơkê hiăng châ Khu tŏng kum mơngế chó chêng tơvê kŏng ƀă gâk kring hnoăng vâi hdrêng kong pơlê Dak Lak kheăn kơdeăn xua mâu tơdroăng mơ-eăm tơkâ hluâ pá puât mơ-eăm tung tơdroăng rêh ối.  

Xuân tung roh kố Khu tŏng kum vâi hdrêng chó chêng tơvê kŏng ƀă kuăn tê Việt Nam diâp Ƀâng kheăn kơdeăn ăm 5 khu pú hên, 1 ngế krê xua rơkê tung tơdroăng tŏng kum mơngế chó chêng tơvê kŏng, vâi hdrêng kuăn tê kong pơlê Dak Lak hneăng hơnăm 2020 – 2023. Kŏng ti pêi cheăng tiô rơnó môi khu Xổ số kiến thiết Dak Lak diâp 18 hnoăng liăn hriâm rơkê (2 rơtuh/môi hnoăng) ăm vâi hdrêng kuăn tê, vâi hdrêng chó chêng tơvê kŏng ki kơhnâ rơkê.