Mâu tơdế khế 4 kong tô ó, kong York Đôn tô môi tiah prâu on, 8 ngế ối tung Tíu rak ngăn loăng pơlái kơxô̆ 1, Khu rak ngăn loăng pơlái kuăn kiâ kong Kơdrum kong ilâng tơnêi têa York Đôn (Dak Lak) xuân dế gô̆m văng mâu hlá nhâ ki răng vâ chôu hbrâ mơdât on chếo. Pôa Nguyễn Hữu Tạo – Kăn phŏ ngăn loăng pơlái kuăn kiâ kong Kơdrum kong ilâng York Đôn tối, dế cho rơnó rơ-iêo, mơni kô tơ’lêi tro on chếo hiăng tâk troh kơlo V, cho kơlo ki rơ-iêo ó khât.

Vâ hbrâ mơdât on chếo, khu kố hiăng tơrŭm ƀă khu pơkuâ ki ê xing xoăng vâ chê 200 ngế kăn ƀô̆, mâu ngế cheăng vâ lăm pơtrui ngăn rak vế ƀă hbrâ mơdât on chếo kong.

“Tâi tâng mâu tíu gâk, đô̆i gâk athế gâk plâ hâi plâ măng a mâu tíu ki tơ’lêi tro on chếo, pêi pro tơdroăng ki chôu mâu hlá nhâ ki răng vâ hbrâ mơdât tơdroăng ki on chếo kong. Tơkéa vâ tối cho chôu a mâu tíu kố hlo chếo mê pin chôu vâ kơdroh kế ki chiâng chếo, ƀă troh hâi kơ’nâi mê lăm chôu tíu ki ê nếo, xua mê kô rak tơniăn tâng ai on chếo mê gá chếo ôh tá troh lâp lu tơdjâk troh kong loăng. Má péa, bro chiâng tơnêi lĕm vâ kuăn kiâ ki ối tung kơdâm tơnêi, nhâ huăn vâ kuăn kiâ kong kâ vâ rêh”.

Rơtế ƀă hnoăng cheăng hbrâ mơdât on chếo dế châ tơbleăng tung lâp lu kong pơlê, mâu tíu pêi cheăng ối ai khu ki lêng rak ngăn loăng pơlái kuăn kiâ kong ƀă mâu ngế ki pơkuâ kong xuân tơmâng ngăn khât troh tơdroăng mơdêk ivá hbrâ mơdât on chếo kong.

Pôa Hồ Văn Lành, kăn phŏ khu rak ngăn loăng pơlái kuăn kiâ kong Krông Năng -Ƀuôn Hồ, ăm ‘nâi, kơnôm ai tơdroăng ki hbrâ rơnáu tro ‘na mâu ngế cheăng xuân môi tiah kế tơmeăm ƀă mâu túa pơlâ hbrâ mơdât on chếo, rôh on chếo a kơpong 299 ối tung cheăm Čư̆ Klông, tơring Krông Năng, tro on chếo apoăng khế pŭn kố hiăng châ tơpâ.

“Drêng châ tâng tơdroăng tơbleăng ai roh on chếo, ngin hiăng tơrŭm ƀă Đô̆i ki rak ngăn loăng pơlái rak vế kong ƀă hbrâ mơdât on chếo kong kơxô̆ 3, tung tung Khu rak ngăn loăng pơlái kuăn kiâ kong Dak Lak, ngế ki pơkuâ kong ƀă khu kăn pơkuâ, khu tơrŭm pơtroh lối 40 ngế tơkŭm tơpâ on. Tâi tâng pêi pro tiô pơkâ 4 tơdrêng vâ tơpâ on, ƀă ivá mơ-eăm dêi nhŏng o mê rôh on chếo hiăng châ tơpâ tơdrêng, ôh tá ai tơdroăng ki rơ-iêo”.

Tiô pôa Nguyễn Quốc Hưng – Kăn pơkuâ Khu rak ngăn loăng pơlái kuăn kiâ kong kong pơlê Dak Lak, nôkố, hiăng vâ chê tơdế tâi tâng ƀăng tơnêi kong a kong pơlê, tơ’mô dâng 237 rơpâu ha dế tung tơdroăng ki tơ’lêi tro on chếo. Tung mê 189 ha mơni kô tơ’lêi tro on chếo ƀă lối 48 ha a râ ki kô tơ’lêi on chếo rơ-iêo. Xua mê, khu rak ngăn loăng pơlái kuăn kiâ kong, mâu ngế ki pơkuâ kong lơ Vi ƀan hnê ngăn mâu cheăm dế tơkŭm tung hnoăng cheăng hbrâ mơdât on chếo kong.

Pôa Nguyễn Quốc Hưng tối nhên:

“Sap ing klêi kơ’nâi Têt Lo hơnăm nếo troh nôkố, ngin hiăng hbrâ rơnáu mơjiâng mâu túa pơkâ klêi kơ’nâi mê tơbleăng tơdâng tơ’mô troh a mâu tíu rak ngăn loăng pơlái kuăn kiâ kong tơring, 3 Đô̆i ki rak ngăn loăng pơlái cơ đô̆ng vâ tơrŭm ƀă mâu cheăm tơring pêi pro hnoăng cheăng hbrâ mơdât on chếo kong. Malối, tung pơla rơnó tôu ó apoăng khế 4 kố, Khu rak ngăn loăng pơlái kuăn kiâ kong kong pơlê xuân hiăng mơjiâng Khu Séa ngăn ki tơrŭm hbrâ rơnáu séa ngăn, pơkâ kơtăng mâu ngế ki pơkuâ kong a mâu tơring môi tiah: Ea Súp, Ea Kar, M’Drak, Čư̆ Mgar, Ƀuôn Đôn, Krông Bông, Lak ƀă hên tơring ki ê athế rak vế hnoăng cheăng hbrâ mơdât on chếo kong.

Ngin xuân séa ngăn hnoăng cheăng hbrâ mâu rơxế, mâu ngế cheăng, mâu liăn ngân dêi mâu ngế ki pơkuâ kong vâ hbrâ mâu túa pơkâ pro tiah lâi drêng ai tơdroăng mê athế ai túa pơkâ hbrâ mơdât on chếo kong teăm tơdrêng má môi”.