Pêi cheăng ƀă Khu xiâm ngăn Hnê hriâm ƀă Hnê mơjiâng tuăn ngôa rơkê kong pơlê, pôa Tạ Anh Tuấn, Kăn hnê ngăn Vi ƀan kuăn pơlê dêi kong pơlê Dak Lak, pơkâ thế kơvâ cheăng hbrâ mơjiâng “Tơdroăng tơkêa bro mơnhông hnê hriâm kong pơlê Dak Lak hơnăm 2025-2030”. Tung mê, tối nếo tâi tâng mâu tơdroăng dế xúa tung hnê hriâm, tah ki mơhno a ngâ, hnê ai pơxúa tơƀrê.

Tung pơla mâu hnoăng ‘na hok tro hriâm rơkê, hnê hriâm tơ’nôm ăm mâu ngế ôh tá ‘nâi chư châ tơƀrê, mê tơdroăng ki tơbrê dêi hnê hriâm xuân cho tơdroăng ki thế pơ’lêh dêi kơvâ hnê hriâm Dak Lak. Kơlo ki xiâm vâ tơ’noăng mơgêi râ má pái mâu hơnăm hdrối dêi kong pơlê đi đo cho a khu mơ’nui râ. 2 rôh tơ’noăng mot lâm 10 kố nah, lâm ki tơdâng 3 môn tơ’noăng mot lâm 10 a kơpong peăng mâ Hâi lu ôh tá châ điêm hên.

Tơdrêng amê cho tơdroăng ôh tá tŭm thái cô, ôh tá ai tŭm kế tơmeăm hnê hriâm, hên veăng hriâm pơtân, ôh tá tơ’mô ai kơpong ki tơ’lêi hlâu, ai kơpong ki xơpá. Pôa Tuấn tối, mâu tơdroăng ki mê kal rĕng châ tŏng kum vâ tơdroăng hnê tơƀrê tơdjuôm dêi kong pơlê.